Read Batak Dairi 4 Musa 19 Bible Online

4 Musa 19 - Batak Dairi bible

4 Musa 19

¹Ipasulak JAHOWA mo si Musa dekket si Aron

²lako pesakatken hatoren-hatoren ènda bai bangsa Israel: Buat mo sada lembu badar berru-berru siso lot tikasna janah oda nung dèng ipakkè merembah boban.

³Sohken mo lembu i taba Imam Eleazar. Kennah iembah mo pinakan idi mi ruar perundung-undungen, nai isèat mo i lebbè imam.

⁴Nai kennah ibuat Imam Eleazar mo situk daroh pinakan i janah ipispisken pitu kali menghuju Undung-undung JAHOWA.

⁵Bolet ngo pinakan i, dekket kolingna, jukutna, darohna dekket bitukana, kennah itutung i lebbè imam.

⁶Nai nola dèng ma kennah ibuat imam mo cituk kayu aras, sentang- kè rangin-rangin dekket sirambar bennang mbara, nai iambongken mo i mibagasen api simenutung lembu badar i.

⁷Enggo kessa bagi kennah itaptapi imam mo geddana janah meridi ia. Enggo kessa bagi ndorok mo ia mbengket mi bagasen perundung-undungen tapi melamun dèng ngo ia tong soh sundut mataniari.

⁸Kalak simenutung lembu idi pè kennah itaptapi ngo geddana janah meridi ia; tong dèng ngo melamun ia soh sundut mataniari.

⁹Nai kennah ipepulung kalak siso melamun mo abu lembu i janah igamparken mi bekkas simbersih i ruar perundung-undungen. Ipennep mo abu i i sidi asa ndorok ipakkè bangsa Israel lako mencampur laè kerja menguras dosa.

¹⁰Kalak sipepulungken abu lembu idi pè kennah itaptapi ngo geddana, tapi melamun ngo ia soh sundut mataniari. Merdalan ngo hatoren i soh sidekkah-dekkahna, bai kalak Israel barang pè kalak sidèban simerian menettap i tengah-tengah kalak i.

¹¹Melamun ngo barang isè dais mi bangkè sidekkah pitu ari.

¹²I ari petelluken dekket pepituken kennah ngo ia menguras dirina merkitè laè pengurasen, nai ipè asa mpanting ia. Tapi mula oda ngo iuras dirina i ari peteluken dekket i ari pepituken, hot ngo ia melamun.

¹³Kalak sidais mi bangkè janah oda iuras dirina melamun ngo i, kumerna mak dèng ipispis ia dekket laè pengurasen. Mengelamuni Undung-undung JAHOWA ngo ia janah kumernakenna i oda nè mo ia iètong bilangen ummat Dèbata.

¹⁴Mula lot kalak matè ibas sada Undung-undung, barang isè sambing lot ibagasen Undung-undung i barang pè mbengket mi bagasen, gabè melamun ngo sidekkah pitu ari.

¹⁵Karina kiong dekket koden siso mertutup, gabè melamun ngo i.

¹⁶Barang isè kalak dais mi bangkè kalak si matè ibunuh, barang pè matè geder-gederen i juma, gabè melamun ngo si- dekkah pitu ari. Bagi ma ngo dekket kalak simen- jamah kuburen barang pè tulan-tulan simatè.

¹⁷Lako menguras kalak simelamun idi, kennah ibuat ngo situk abu ipas lembu badar berru-berru sienggo itutung i nai mahan kesasaen dosa. Kennah ipemasuk mo abu i mi bagasen sada koden, nai ibaing mo laè sinibuat ibas laè menjarir nai.

¹⁸Mi siperlebbè, imo mula lot kalak matè ibas Undung-undung, kennah ibuat kalak siso melamun sentangkè hisop, isornepken mo i mi bagasen laè i, nai ipispisi mo undung-undung i dekket karina silot ibagasenna, bagi dekket jelma silot i sidi. Tupung sipeduaken, imo mula lot sada kalak dais mi bangkè, kuburen barang tulan kalak simatè, kennah ipispisi kalak siso melamun i mo kalak simelamun i, janah dos ngo carana.

¹⁹Kennah ipispisi ngo i ari petelluken dekket ari pepituken. I ari pepituken, pul mo ari me- nguras kalak simelamun idi. Kennah itaptapi kalak ngo geddana janah meridi. Mulai sundut mataniari, gabè mpanting mo ia.

²⁰Kalak sigabè melamun janah oda memaing kerja menguras diri, tettap ngo ia melamun kumerna mak dèng ipispisi dekket laè pengurasen. Mengelamuni Undung-undung JAHOWA ngo ia, janah oda nèngè iètong bilangen bangsa Dèbata ia.

²¹Soh mi amman sumendah ngo merlakku hatoren i. Kalak simemispisken laè pengurasen i pè kennah ngo menaptapi geddana, janah kalak sikenna laè i pè gabè melamun ngo soh sundut mataniari.

²²Ugasen sinijamah kalak simelamun idi pè gabè melamun ngo, janah kalak sidèban simenjamahsa pè gabè melamun ma ngo soh sundut mataniari.