Read Batak Dairi 4 Musa 20 Bible Online

4 Musa 20 - Batak Dairi bible

4 Musa 20

¹I bulan sada sakat mo karina bangsa Israel i gurun pasir Zin janah merian i Kades. Matè mo si Miryam janah ikubur i sidi.

²Tikan sikali oda mo lot laè i permalamen kalak i. Nai roh mo kalak i mencingkoi si Musa dekket si Aron

³ninganna ngut-nguten, “Sellohen ngo akum matè kami i hadeppen JAHOWA rebbak dekket kaka-angginami!

⁴Kasa mo iarahken kènè kami mi gurun pasir ènda? Mada ngo asa matè kami isèn rebbak dekket pinakan nami?

⁵Merkadè mo arahenken ndènè kami mbungkas i Mesir nai mi bekkas mpersah siso kadè ndorok suanen? Oda lot pagè i sèn, oda lot kayu ara, anggur dekket ndalima. Salang laè pè oda giam lot!”

⁶Ipedaoh si Musa dekket si Aron mo dirina bai kalak i nai, nai cènder mo i gembar pèntu Undung-undung JAHOWA. Mersembah mo kalak i, nai ibendangi cuhaya pekiroh JAHOWA mo kalak i.

⁷Nina JAHOWA mo mbang si Musa,

⁸“Buat mo tongket silot i lebbè Pèti Perpadanen i, nai kono dekket si Aron kennah pepulungken karina bangsa i. I hadeppen kalak i karina kennah dokken taba delleng batu silot i sidi asa roh laè mercikal-cikal. Bagidi mo kono perohken laè ibas delleng batu idi nai asa ndorok mènum jelma nterrem dekket pinakan kalak i.”

⁹Nai laus mo si Musa mengaleng tongket i bagè sinidokken JAHOWA.

¹⁰Ipepulung si Musa dekket si Aron mo karinana bangsa i mi lebbè delleng batu i. Nai nina si Musa mo, “Dengkohken kènè mo, kènè alè sipengalo-ngalo! Kennah kuperoh kami ngo laè ibas delleng batu ènda nai lako bai ndènè?”

¹¹Nai ipekèkè si Musa mo tongket idi janah ipaluken mi delleng batu i dua kali. Nai mènter roh mo laè merbual-bual nderras kalohon, gabè ndorok mo mènum karina kalak i dekket pinakan.

¹²Tapi ipincang JAHOWA ngo si Musa dekket si Aron, nina mo, “Kumerna kurang tok kènè baKu lako petararken kuasangKu simbadia i ihadeppen bangsa Israel, oda ndorok nèngè kènè menguluken kalak i mbengket mi nagerri sienggo Kuperbagah taba kalak i.”

¹³Idi mo takal laè Meriba. I bekkas idi ngo kalak Israel ngut-nguten taba JAHOWA, janah i sidi ma mo ipacidah JAHOWA kuasaNa simbadia taba bangsa i.

¹⁴Nai i Kades nai, ipeberkat si Musa mo pasulakkenna lako menghadep raja Edom. Nina kalak i mo, “Ibas marga-marga Israel nai ngo kami simerpamili dèng dekket kènè Rajanami. Ibettoh kènè ngo sendah Rajanami barang bakunè kesusahen sempa taba kami.

¹⁵Laus ngo empung nami mi nagerri Mesir janah merian i sidi mercundut-cundut dekkahna. Oda ngo selloh ibaing kalak Mesir taba empung nami i dekket bai nami,

¹⁶nai dilo-dilo mo kami taba JAHOWA mengido pengurupien. Idengkohken ngo dilo-dilo nami idi janah ipasulak sada kalak malaèkat. Malaèkat idi mo menguluken kami mbungkas i tanoh Mesir nai. Bagèndari i Kades ngo kami, imo sada kuta i perbalengen ladang raja i.

¹⁷Kupido kami, asa ipaduè raja i nemmu kami memellus tarap nagerri èn. Oda pè menirpang kami dekket pinakan nami ibas dalan nai janah oda ma masuk mi juma barang mi pekken anggur ndènè. Oda pella kuènum kami laè i sumur raja i nai. Tarap dalan mbellen sambing i nai ngo kami merdalan soh karuar kami i ladang raja i nai.”

¹⁸Tapi ialoi kalak Edom mo, “Oda kuduè kami kènè memellus tarap ladang nami. Mula dak ijuljulken kènè, kujuhap kami ngo kènè.”

¹⁹Nina kalak Israel mo, “Tarap dalan mbellen i pè kami memellus, janah mula iènum kami barang pè iènum pinakan nami laè ndènè, kugagrar kami pè. Pellin memellus sambing ngo kessa kami.”

²⁰Nai nina kalak Edom nola mo, “Oda ndorok!” Nai berkat mo kalak i bak soridadu nterrem lako menjuhap kalak Israel.

²¹Nai balik mo kalak Israel janah menulusi dalan sidèban kumerna oda iduè kalak Edom kalak i memellus arap ladangna.

²²Nai itadingken karina kalak Israel mo Kades nai soh mo kalak i mi Delleng Hor,

²³i perbalengen Edom. I sidi idokken JAHOWA mo taba si Musa dekket si Aron,

²⁴“Oda ngo bengketten si Aron nagerri sienggo Kuperbagah idi bai bangsa Israel; matè nè mo ia kumerna enggo ialo kènè sidua perèntahKu i gembar laè mul Meriba.

²⁵Arahken mo si Aron dekket si Eleazar, anakna i, menangkeng mi delleng Hor.

²⁶Talkasi mo pakkèen si Aron janah pakèken bai si Eleazar. Matè i sidi mo si Aron.”

²⁷Iulaken si Musa mo bagè siniperèntahken JAHOWA idi. Menangkeng mo si Musa, si Aron dekket si Eleazar mi Delleng Hor inelnelli karina bangsa i.

²⁸Nai italkasi si Musa mo pakèen si Aron janah isellukken bai si Eleazar. Matè mo si Aron i babo delleng idi, nai susur mo balik si Musa dekket si Eleazar.

²⁹Karina bangsa i mendengkoh enggo matè si Aron, nai karina mo kalak i bonek tellupuluh ari dekkahna.