Read Batak Dairi 4 Musa 21 Bible Online

4 Musa 21 - Batak Dairi bible

4 Musa 21

¹Arad imo sada kuta kettan selatan nagerri Kanaan. Sinderrang idengkoh raja kuta idi kalak Israel roh memellus arap dalan Atarim, berkat mo ia menjuhap kalak i janah itaban mo barang piga-piga kalak bai kalak i nai.

²Nai ibulabanken kalak Israel mo taba JAHOWA bagèen, “Mula iberèken Kono ngo kemenangen mbellen bai nami meraloken bangsa i, kupetumpat kami mo kalak i dekket karina kutana.”

³Iuèi JAHOWA mo pengidoen kalak Israel i janah mengurupi kalak i menaluken kalak Kanaan. Nai iripasken kalak Israel mo kalak Kanaan i dekket karina kuta kalak i, nai igerari kalak i mo bekkas idi Horma.

⁴Nai itadingken kalak Israel mo Delleng Hor, merdalan menuju mi Suak Laut Akaba, lako mengkulilingi ladang Edom. Tapi i tengah ndalan mak nèngè sobar bangsa idi,

⁵janah ngut-nguten taba Dèbata dekket taba si Musa. Nina kalak i mo, “Kasa iarahken kono kami mbungkas i Mesir nai? Mada ngo lako memunuh kami i padang gurun èn? Pangaen poda lot i sèn, bagi laè pè oda lot. Enggo moyang atè nami kipangan pangaen ndèngap ènda.”

⁶Nai roh mo ibaing JAHOWA mbuè nipè merbisa mi tengah-tengah bangsa i. Nterrem ngo bangsa Israel matè itebbi nipè i.

⁷Nai roh mo bangsa idi menghadep si Musa janah mendokken, “Enggo merdosa kami kumerna ngut-nguten taba JAHOWA bak taba ko. Mersodip mo ko taba JAHOWA asa ipedaoh nipè-nipè ènda bai nami nai.” Nai isodipken si Musa mo bangsa idi.

⁸Nai idokken JAHOWA mo iteppa si Musa sada nipè ibas tambaga nai janah iampèken i babo sada tihang. Barang isè sinitebbi nipè, njuah mo iakap mula itengen nipè siniteppa ibas tembaga idi nai.

⁹Nai iteppa si Musa mo nipè ipas tembaga nai janah iampèken i babo sada tihang. Barang isè kalak sinitebbi nipè, ndorok malum mula i tengen mi nipè tembaga idi.

¹⁰Berkat nola mo kalak Israel, nai merundung-undung i kuta Obot.

¹¹Enggo kessa itadingken bekkas i, merundung-undung mo kalak i i bekkas kuta Abarim sienggo merumpak i gurun pasir kettan kebincaren ladang Moab.

¹²Nai mermalam mo kalak i i Napa Zered.

¹³I sidi nai berkat nola mo kalak i janah mermalam i kèparen laè Arnon, i gurun pasir arur sakat mi ladang kalak Amori. Laè Arnon imo kira baleng ladang kalak Moab dekket ladang kalak Amori.

¹⁴Kumerna i mo ibas ‘Bukku Pergerahaen JAHOWA’ tersurat: “.... Kuta Waheb, i ladang Sufa dekket napa-napana; Laè Arnon

¹⁵dekket tebing-tebing napa arur soh mi kuta Ar dekket kènter mi perbalengen ladang kalak Moab.”

¹⁶I sidi nai laus mo kalak idi mi bekkas sinigeraren Beer, lapatenna telaga-telaga. I sidi ngo nung idokken JAHOWA taba si Musa, “Dokken mo bangsa i merpulung; naing Kuberèken ngo laè bai kalak i.”

¹⁷Sidangna i mo iendèken bangsa Israel nangen èn, “Alè, telaga-telaga, arirken mo laèmu, kuhalopken kami mo merdengan endè.

¹⁸Telaga sinikurak kalak pungkuh-pungkuhna, dekket kalak pengulu bangsa ikurak merkitè tongket kepengulunkenna dekket merkitè tongket tanda kuasana.” I gurun pasir nai lompat nola mo kalak i mi Matana,

¹⁹janah i sidi nai mi Nahaliel, nai mi Bamot,

²⁰nai nola mi napa i ladang kalak Moab, i terruh pucuk Delleng Pisga mendempakken gurun pasir.

²¹Nai ipasulak kalak Israel mo pasulakkenna mendahi si Sihon, raja Amori, lako pesakatken tennah ènda,

²²“Duè mo kami memellus arap nagerri raja i. Oda pè kami sumirpang bak pinakan nami arap dalan i nai, janah oda mbengket mi juma barang mi pekken anggur ndènè barang mènum laè ibas telaga-telaga nai. Oda pè kami sumirpang i dalan mbelgah idi nai mema kulausi kami karina ladang raja idi.”

²³Tapi oda iduè Raja Sihon kalak Israel memellus arap nagerrina. Ipepulung mo soridaduna, nai berkat mi Jahas i gurun pasir janah ijuhap mo kalak Israel i sidi.

²⁴Tapi tikan geraha idi, nterrem ngo soridadu kalak Amori ibunuh kalak Israel. Nai itaban kalak Israel mo ladang kalak idi i Laè Arnon nai sakat mi Laè Jabok, imo perbalengen tanoh ladang kalak Amon, kumerna ntegguh kalohon ngo bentèng perbalengen idi.

²⁵Merkitè bagi mo itaban kalak Israel karina kuta kalak Amori, bagi dekket Hesybon dekket karina kuta-kuta kèdèk i sikulilingna, nai i sidi mo kalak i merian.

²⁶Hesybon imo kuta bekkas Raja Sihon. Pennah ngo ia mergeraha mengalo Raja Moab janah menaban nagerrina daohna soh mi Laè Arnon.

²⁷Kumerna i mo sipandè mernangen memaingken nangenna bagèen, “Merrohen mo kè mi Hesybon, mi kuta Raja Sihon. Ntedoh ngo kami mengidah kuta èn ipajek janah isasai mengolihi.

²⁸Masa ngo sikali i kuta èn nai soridadu si Sihon menesser bagè api. Mengelekkup kuta Ar i Moab, janah menaban uruk-uruk arur Laè Arnon.

²⁹Alè bangsa Moab, merjaya mo ko! Simenembah Kamos, ripas mo ko! Ibelli dèbatamu ngo kono gabè sinipuaren, karina daberru gabè tabanen raja Amori.

³⁰Tapi bagèndari ripas mo pinempar kalak i, mengèkutken dalan i Hesybon nai mi Dibon, i Nasyim nai mi Nofah i gembar Medeba.”

³¹Merkitè bagi merian mo bangsa Israel i ladang kalak Amori.

³²Nai nola ipasulak si Musa mo kalak laus menulusi dalan simendèna kalohon lako mengkubu kuta Jaezer. Nai itaban kalak Israel mo kuta idi bak kuta-kuta kèdèk i sikulilingna janah ipelaus mo kalak Amori sitading i sidi.

³³Enggo kessa i, sumirpang mo kalak Israel janah merdalan menuju Basan. Kèkè mo Raja Og i Basan nai rebbak dekket soridaduna lako menjuhap kalak Israel i kuta Edrei.

³⁴Idokken JAHOWA mo taba si Musa, “Ulang mbiar tabasa. Kuberèken pè kemenangen bamu. Talunkenmu mo ia, karina ginemgemna bak nagerrina. Bakin mo tabasa bagè pemakinmu taba Raja Sihon simemerèntah i Hesybon.”

³⁵Nai italuken janah ibunuh kalak Israel mo Raja Og, dukak-dukakna dekket karina ginemgemna; oda lot nè tading. Nai itaban janah i iani kalak i mo nagerri i.