Read Batak Dairi 4 Musa 23 Bible Online

4 Musa 23 - Batak Dairi bible

4 Musa 23

¹Nai nina si Bileam mo taba si Balak, “Pajek mo isèn pitu langgaten baku, janah pepada mo i sèn pitu lembu tonggal dekket pitu biri-biri tonggal.”

²Ibahanken si Balak mo bagè sinidokken si Bileam i tabasa. I babo gennep langgaten ipèlèken kalak i mo sada lembu tonggal dekket sada biri-biri tonggal.

³Nai idokken si Bileam nola mo taba si Balak, “Cender mo tuan i i gembar pèlèen situtungen i. Ninganna i laus aku lebbè sigetjap menengen tah nggèut ma JAHOWA pejumpa dekket aku barang tah oda. Kubagahken pè nahan barang kadè idokken JAHOWA taba aku.” Nai laus mo pellin si Bileam mi babo sada uruk-uruk,

⁴janah roh mo Dèbata i si mendahisa. Nina si Bileam mo mbang Dèbata, “Enggo kupajek pitu langgaten janah memèlèken sada lembu tonggal dekket sada biri-biri tonggal i babo gennep langgaten.”

⁵Nai ibagahken JAHOWA mo bai si Bileam kadè sipatut dokenkenna, janah ipasulak mo ia balik mendahi si Balak lako pesakatken tennah JAHOWA tabasa.

⁶Balik mo si Bileam janah idapet dèng ngo si Balak tong cènder i gembar pèlèen situtungenna, rebbak dekket karina pengulu kalak Moab.

⁷Nai iruapken si Bileam mo alamat èn, “I Aram nai, delleng kan kebincaren adona, si Balak, Raja Moab mendiloi aku, nina ngo, ‘Roh mo ko, mengerana mo ko lako baku. Sumpahi mo bangsa Israel i!’

⁸Bakunè mo aku menumpahi, Mula Dèbata oda menumpahi? Bakunè mo aku menghukum, mula JAHOWA oda menghukum?

⁹Kuidah ngo kalak i i pucuk delleng nai, kutatap ngo kalak idi i uruk-uruk nai. Tengen mo, sada bangsa terpunjung oda mbengket mi bilangen bangsa sidèban.

¹⁰Pinempar si Jakob bagè arbuk oda terbilang; bangsa Israel oda langlang buèna. Katerra pè matè mo nemmu aku bagè kalak jujur, bage ajal kalak i mo nemmuken ajalku.”

¹¹Nai nina si Balak mo taba si Bileam, “Kasa bagi pemaingmu baku? Asa kuembah pè ko mi sèn lako menumpahi musuh-musuhku ngo. Tapi kepèken ipasu-pasu ko nola ngo kalak i.”

¹²Ialoi si Bileam mo, “Kadè sinidokken JAHOWA pellin i ngo kessa ndorok kura- naken.”

¹³Nai nina si Balak mo taba si Bileam, “Kita mo berkat rebbakken mi bekkas sidèban, i sidi nai mo ndorok idah kono pellin dèba ibas bangsa Israel nai. Sumpahi mo kalak i i sidi nai.”

¹⁴Nai iarahken si Balak mo si Bileam mi jampalen Zofim, i pucuk delleng Pisga. I sidi pè ipajek ma mo pitu langgaten janah memèlèken sada lembu tonggal dekket sada biri-biri tonggal i babo gennep langgaten idi.

¹⁵Nina si Bileam mo taba si Balak, “Tading mo ko lebbè i sèn, i gembar pèlèen situtungen tuan i, sinderrang laus aku menjumpai JAHOWA i sandi.”

¹⁶Idapetken JAHOWA mo si Bileam janah memagahken tabasa kadè sikennah dokenkenna, nai ipasulak mo ia balik mendahi si Balak lako pesakatken tennah JAHOWA i.

¹⁷Nai balik mo si Bileam janah idapet ngo si Balak tong dèng cènder i gembar pèlèen situtungenna, rebbak dekket pengulu-pengulu Moab. Ikusoken si Balak mo kadè sienggo idokken JAHOWA,

¹⁸nai iruapken si Bileam mo sukuten ènda, “Alè, Balak, dukak si Zipor, roh mo ko mi sèn, dengkohken mo kadè sinaing kudokken.

¹⁹Oda ngo bagè jelma ukum Dèbata murah peselsel janah lemmo atèna merluap. Mula merjandi Dèbata kennah iteppati! Mula mengerana Ia tentu kennah pesautenna!

²⁰Idokken ngo Aku memasu-masu; janah mula Dèbata memasu-masu mak ndorok Kusondati.

²¹Oda lot taridah kejahaten bai si Jakob; oda lot taridah kesuliten bai Israel. JAHOWA, Dèbata kalak i ngo, mendenganisa. Meroang ngo kalak i; Ia ngo Raja!

²²Dèbata ngo mengarak kalak i mbungkas i Mesir nai, bagè kerbo meriar ngo Ia mergeraha mengkepkepsa.

²³Oda lot tellap tabas-tabas bai si Jakob oda lot mergoldè tendung bai kalak Israel. Tersèngèt bangsa i dokenken ndèba ngo, ‘Tengngen mo kelengangen sinibaing Dèbata!’

²⁴Kèkè ngo bangsa i bagè singa inang-inang, janah cènder bagè singa tonggal. Oda gempang Ia kum mak dèng ikeriken sinijerngemna, janah icepcep daroh binatang sinijerngemna.”

²⁵Nai idokken si Balak mo taba si Bileam, “Enggo mi, mula oda nggèut kono menumpahi bangsa Israel; tapi ulang mo giam pasu-pasu kalak i!”

²⁶Ialoi si Bileam mo, “Otang enggo kudokken bai Tuan i magahken karina siniperèntahken JAHOWA ngo siku-ulaken?”

²⁷Nai nina si Balak nola mo, “Kita mo mi bekkas sidèban. Isè bettoh-betohen tah ipadiat Dèbata ngo ko menumpahi Israel baku i bekkas idi.”

²⁸Nai ibabai mo si Bileam mi pucuk Delleng Peor simendempakken gurun pasir.

²⁹Nina si Bileam mo taba si Balak, “Pajek mo pitu langgaten i bekkas èn janah pepada mo i sèn pitu lembu tonggal dekket pitu biri-biri tonggal.”

³⁰Ibahanken si Balak mo bagè sinidokken si Bileam. Ipèlèken mo sada lembu tonggal dekket sada biri-biri tonggal i babo gennep langgaten i.