Read Batak Dairi 4 Musa 25 Bible Online

4 Musa 25 - Batak Dairi bible

4 Musa 25

¹Sinderrangna merian i lembeng Sitim bangsa Israel, itebenai anak laki ibas kalak i nai mo merlangkah julu meddem, dekket daberru-daberru Moab si lot i sidi.

²Iarahken daberru-daberru idi mo kalak i mi pèsta-pèsta pemèlèen lako pesangapken dèbata kalak i. Dekket ma mo kalak Israel kipangan pangaen idi bak menembah sembahen kalak Moab.

³Kumerna menembah Baal kalak Israel i Peor, punguren mo JAHOWA taba kalak i janah nina mo taba si Musa,

⁴“Tangkup mo karina kalak simenguluken bangsa i janah bunuh mo kalak i i lebbè jelma nterrem lako pesautken perèntahKu, asa malap lagangKu taba bangsa i.”

⁵Nai idokken si Musa mo taba perhukum-perhukum Israel, “Karina kènè kennah memunuh jelma i gennep margana sienggo menembah Baal i Peor.”

⁶Sinderrangna derru-derru si Musa bak karina bangsa Israel i Pèntu Undung-undung JAHOWA, idah kalak i mo sada kalak Israel merembah sada kalak daberru Midian mbeng- ket mi bagasen Undung-undungna.

⁷Sinderrang idah si Pinehas dukak si Eleazar, kempu Imam Aron simasa i, kèkè mo ia itadingken mo pulungen i. Ibuat mo sada kujur

⁸nai ijalang mo anak laki bak daberru idi mi bagasen Undung-undung i. Ijuluk mo kalak i duana dekket kujur idi, nai mentadi mo bègu laus simasa bai kalak Israel i.

⁹Tapi sidang bagidi enggo mo lot matè 24.000 kalak.

¹⁰Nai nina JAHOWA mo taba si Musa,

¹¹“Mertuhu-tuhu ngo si Pinehas dukak si Eleazar, kempu Imam Aron membèla gerarKu i tengah-tengah kalak Israel, gabè malap pungurKu gabè oda nè saut Kuripasken bangsa i.

¹²Asa bagahken mo taba si Pinehas naing bakinenKu mo sada perpadanen dekketsa.

¹³Kutetapken mo ia bak pinemparna gabè imam soh sidekkah-dekkahna, kumerna mertuhu-tuhu ngo ia enggo membèla Aku, Dèbatana, janah enggo memaingken perdamèen tersèngèt dosa kalak Israel.”

¹⁴Kalak Israel sinibunuh rebbak dekket daberru Midian i si Zimri ngo gerarna, dukak si Salu, èkuten sada horong ibas marga Simeon nai.

¹⁵Daberru idi mergerar si Kosbi; berru si Zur, sada kalak pengulu i kaum Midian.

¹⁶Iperèntahken JAHOWA mo bagèen taba si Musa,

¹⁷“Alo mo kalak Midian, janah ripasken mo kalak i

¹⁸kumerna taki-taki jahat sienggo ibaing kalak i meradepken kènè i Peor, dekket kumernaken si Kosbi berru sada kalak pengulu kaum i Midian. Si Kosbi imo daberru matè ibunuh tikan masa mballa kumernaken simasa i Peor.”