Read Batak Dairi 4 Musa 26 Bible Online

4 Musa 26 - Batak Dairi bible

4 Musa 26

¹Enggo kessa mentadi mballa i, idokken JAHOWA mo taba si Musa dekket si Eleazar, dukak imam Aron,

²“Kennah kerahen ndènè ngo karinana bangsa Israel mengèkutken horongna gennep. Karina anak laki simerumur duapuluh tahun mi babo sienggo ndorok gabè soridadu, kennah isuratken.”

³Iulaken si Musa dekket si Eleazar mo perèntah idi. Idilo kalak i mo karina anak laki simerumur duapuluh tahun mi babo janah pepulungken kalak i i lembeng Moab, i kèpar laè Jordan, i gembar kuta Jeriko. Enda mo kalak Israel simbungkas i Mesir nai:

⁴

⁵Ibas marga Ruben nai, dukak si Jakob situaen imo: Horong si Henokh, si Palu,

⁶si Hezron dekket si Karmi.

⁷Pulung karina anak laki bai kalak i nai buèna 43.730 kalak.

⁸Dukak si Palu imo si Eliab,

⁹janah dukak-dukak si Eliab imo si Nemuel, si Datan dekket si Abiram. Ukum si Datan dekket si Abiram enggo ipilih bangsa i, tapi gabè mersada nola mo kalak i dekket simengèkutken si Korah lako mengalo si Musa dekket si Aron lako mengalo JAHOWA.

¹⁰Nai ngangang mo tanoh i janah ibendut mo kalak i gabè matè mo kalak i rebbak dekket si Korah dekket simengèkutkensa tikan roh api lako mengelekkup 250 kalak anak laki. Gabè sada pernèngèten mo simasa i bai bangsa Israel.

¹¹Tapi ukum dukak-dukak si Korah oda dekket terbunuh.

¹²I marga Simeon nai imo: Horong si Nemuel, si Jamin, si Jakhin,

¹³si Zerah dekket si Saul.

¹⁴Anak laki i horong i nai buèna 22.200 kalak.

¹⁵I marga Gad nai imo: Horong si Zefon, si Hagi, si Syuni,

¹⁶si Ozni, si Eri,

¹⁷si Arod dekket si Areli.

¹⁸Anak laki i horong-horong kalak i buèna 40.500 kalak.

¹⁹I marga Juda nai: Horong si Syela, si Peres, si Zerah, si Hezron dekket si Hamul. Dua ngo anak si Juda imo si Er dekket si Onan enggo matè i tanoh Kanaan.

²⁰

²¹

²²Karina daholi ibas horong-horong kalak i nai buèna 76.500 kalak.

²³I marga Isasar nai imo: Horong si Tola, si Pua,

²⁴si Jasub dekket si Simron.

²⁵Buè daholi i horong-horong kalak i nai 64.300 kalak.

²⁶I marga Zebulon nai imo: Horong si Sered, si Elon dekket si Jahleel.

²⁷Buè daholi i horong-horong kalak i nai 60.500 kalak.

²⁸I pemparen si Josep nai, simeranakken dua daholi imo: Marga Manasye dekket marga Efraim.

²⁹I marga Manasye nai imo: Si Makhir, dukak si Manasye, imo bapa si Gilead; janah horong-horong sitersurat èn imo pinempar si Gilead.

³⁰Horong si Iezer, si Helek,

³¹si Asriel, si Sekhem,

³²si Semida dekket Hefer.

³³Si Zelafehad anak si Hefer oda lot merdukak daholi, pellin daberru ngo kesa. Gerar kalak i imo si Mahla, si Noa, si Hogla, si Milka dekket si Tirza.

³⁴Buè daholi i horong-horong kalak i nai 52.700 kalak.

³⁵I marga Efraim nai imo: Horong si Sutelah, si Bekher, dekket si Tahan.

³⁶Horong si Eran imo pinempar si Sutelah.

³⁷Buè daholi ibas horong-horong idi nai buèna 32.500 kalak. Idi mo horong-horong pinempar si Josep.

³⁸I marga Benjamin nai imo: Horong si Bela, si Asybel, si Ahiram,

³⁹si Sefufam dekket si Hufam.

⁴⁰Horong si Ared dekket si Naaman imo pinempar si Bela.

⁴¹Buè daholi ibas horong-horong idi 45.600 kalak.

⁴²I marga Dan nai: Horong si Suham.

⁴³Buè daholi i horong idi 64.400 kalak.

⁴⁴I marga Asyer nai: Horong si Jimna, si Jiswi dekket si Beria.

⁴⁵Horong si Heber dekket si Malkiel imo pinempar si Beria.

⁴⁶Lot ngo sada berru si Asyer mergerar si Serah.

⁴⁷Buè daholi i horong-horong idi nai 53.400 kalak.

⁴⁸I marga Naptali nai imo: Horong si Jahzeel, si Guni,

⁴⁹si Jezer dekket si Syilem.

⁵⁰Buè daholi i horong-horong idi nai 45.400 kalak.

⁵¹Pulung karina anak laki kalak Israel 601.730 kalak.

⁵²Nai nina JAHOWA mo taba si Musa,

⁵³“Pembagiken mo tanoh i bai marga-marga bangsa Israel mengèkutken buè gennep marga i.

⁵⁴Bakin mo i merkitè cara mertendung. Bai marga sinterremna kennah mbellang berèken, janah bai marga cituk bilangenna cituk ma mo berèken.”

⁵⁵

⁵⁶

⁵⁷Marga Lewi imo horong si Gerson, si Kehat dekket si Merari.

⁵⁸Masuk pinempar kalak i mo horong si Libni, si Hebron, si Mahli, si Musi dekket si Korah. Si Kehat imo bapa si Amram.

⁵⁹Jejap ngo si Amram dekket si Jokhebed, berru si Lewi. Ukum si Jokhebed idi tubuh i Mesir ngo. Dua kalak ngo anak si Amram dekket si Jokhebed imo: Si Aron dekket si Musa bak sada daberru, imo si Miryam.

⁶⁰Empat ngo anak si Aron imo: Si Nadab, si Abihu, si Eleazar dekket si Itamar.

⁶¹Matè ngo si Nadab dekket si Abihu sinderrang memèlèken api siso ikelemoken Dèbata.

⁶²Buè daholi simerumur sada bulan nai mi babo i marga Lewi 23.000 kalak. Jaè ngo kalak idi isuratken ibas denganna sada bangsa nai, kumerna oda terolih tanoh pusakka kalak idi i Israel.

⁶³Idi mo gerar-gerar sinibakin si Musa dekket Imam Eleazar tersèngèt horong-horong kalak Israel sinderrang ibaing kalak i pengkèrahen i lembeng Moab i kèpar laè Jordan i gembar kuta Jeriko.

⁶⁴Ibas kalak sinisuratken si Musa bak si Aron gerar-gerarna tikala i i gurun pasir Sinai, oda lot nè nggelluh giam sada kalak pè.

⁶⁵Enggo idokken JAHOWA kin ukum kalak i karina kennah matè i gurun pasir. Janah tuhuna ngo matè kalak i karina, laènken si Kaleb dukak si Jefune dekket si Josua dukak si Nun.