Read Batak Dairi 4 Musa 28 Bible Online

4 Musa 28 - Batak Dairi bible

4 Musa 28

¹Ipasulak JAHOWA mo si Musa

²pesakatken bai bangsa Israel magahken kennah ngo iperdatèken kalak i gennep asa i tikki sienggo itentuken, ipèlèken pèlèen merumang panganen sipesennangken ukur JAHOWA.

³Enda mo pèlèen sikennah ipèlèken bai JAHOWA: Mahan pèlèen sigennep ari, dua anak biri-biri tonggal merumur sitahun siso mertikas,

⁴sada mo i mahan pèlèen siceggen, janah sada nai mahan pèlèen cibon.

⁵Rebbak dekket anak biri-biri i kennah ipèlèken sada kilo nditak isakkor dekket sada sellup minak Zaitun simerandalna kalohon.

⁶Idi mo pèlèen situtungen menettap perlebbè kalohon ipèlèken i Delleng Sinai. Bauna i mo pesennangken ukur JAHOWA.

⁷Rebbak dekket anak biri-biri i kennah ipèlèken ma mo sisellup laè anggur sinipispisken mi babo langgaten.

⁸Anak biri-biri sipèlènken cibon kennah ipèlèken tosè bagè pèlèen siceggen, merdengan laè anggur. Bau pèlèen situtungen idi mo pesennangken ukur JAHOWA.

⁹Tupung ari Sabat kennah ipèlèken mo dua anak biri-biri tonggal merumur sitahun siso lot tikasna, dua kilo nditak isakkor dekket minak Zaitun mahan pèlèen hantaren bak pèlèen laè anggur.

¹⁰Kennah ipèlèken ngo pèlèen situtungen i gennep ari Sabat mahan tambah pèlèen sigennep ari rebbak dekket pèlèen laè anggur.

¹¹Tikan i benna gennep bulan kennah ipèlèken mo bai JAHOWA pèlèen situtungen imo dua lembu tonggal bajar dèng, sada biri-biri tonggal, pitu anak biri-biri tonggal merumur sitahun karina ngo i siso lot tikasna.

¹²Mahan pèlèen hantaren kennah ipèlèken nditak sienggo isakkor dekket minak Zaitun; tellu kilo nditak adum gennep sada lembu tonggal; dua kilo nditak adum biri-biri tonggal

¹³dekket sada kilo nditak adum gennep sada biri-biri tonggal. Merumang pèlèen sipanganen ngo pèlèen situtungen idi, janah bauna i mo pesennangken ukur JAHOWA.

¹⁴Rasken dekket pèlèen situtungen idi kennah ipèlèken dèng ma ngo pèlèen laè anggur, dua sellup buèna mi gennep sada lembu tonggal, tengah dua sellup mi gennep biri-biri tonggal, janah sada sellup mi gennep sada anak biri-biri. Idi mo hatoren tersèngèt pèlèen situtungen sikennah ipèlèken tupung ari sada gennep bulan gennep tahun.

¹⁵Sikira tambahna mi pèlèen situtungen sigennep ari bak pèlèen laè anggurna, kennah pèlènken ndènè dèng ma ngo sada kambing tonggal mahan pèlèen kesasaen dosa.

¹⁶I ari sipuluh empat bulan sada, imo ari Paskah bai JAHOWA.

¹⁷Sibarembenkenna, ari sipuluh lima, itebenai mo Pèsta Roti siso Meragi, janah sidekkah pitu ari mak ndorok kènè mangan roti sinibahan merdengan ragi.

¹⁸I ari perlebbè pèsta i kennah bakinen ndènè ngo perpulungen lako memoji JAHOWA, janah mak ndorok mahan bahaen mberrat.

¹⁹Pèlèken mo bai JAHOWA pèlèen situtungen merumang dua lembu tonggal anakna dèng, sada biri-biri tonggal, dekket pitu anak biri-biri tonggal merumur sitahun, karina i oda lot tikasna.

²⁰Pèlèken mo pèlèen hantaren sikennah pesakaten, imo nditak merdengan minak zaitun: Tellu kilo nditak mi gennep sada lembu tonggal, dua kilo mi biri-biri tonggal,

²¹janah sada kilo mi gennep anak biri-biri tonggal.

²²Pèlèken ma mo sada kambing tonggal mahan pèlèen kesasaen dosa. Merkitè dalan bagi mo kènè memaing kerja kesasaen dosa bangsa i.

²³Karinana pèlèen idi sikira tambahna mi pèlèen situtungen siceggen bagè ncemmalna.

²⁴Dekket cara bagi ma ngo kènè kennah memèlèken pèlèen situtungen bai JAHOWA sidekkah pitu ari. Pèlèen idi sikira tambahna ngo mi pèlèen situtungen sigennep ari rasken pèlèen laè anggurna. Bau pèlèen idi mo pesennangken ukur JAHOWA.

²⁵I ari pepituken kennah memaing perpulungen ngo kènè lako memoji JAHOWA janah mak ndorok mengulaken bahaen mberrat.

²⁶I ari perlebbè Pèsta Peranien, imo ari Raya enggo kessa pul pitu minggu, tikanna memèlèken pagè rimbaru kènè bai JAHOWA, kennah ngo kènè memaing perpulungen lako memoji JAHOWA, janah mak ndorok mengulaken bahaen mberrat.

²⁷Pèlèken mo bai JAHOWA pèlèen situtungen imo dua lembu tonggal, sada biri-biri tonggal poso dèng, dekket pitu anak biri-biri tonggal merumur sitahun, karina i siso lot tikasna. Bau pèlèen situtungen i mo pesennangken ukur JAHOWA.

²⁸Pèlèken mo pèlèen hantaren sienggo ipatokken, imo nditak icampur minak zaitun: Tellu kilo mi gennep sada lembu tonggal, dua kilo mi biri-biri tonggal.

²⁹Janah sada kilo mi gennep sada anak biri-biri.

³⁰Pèlèken ma mo sada kambing tonggal mahan pèlèen kesasaen dosa. Dekket dalan bagi mo kènè memahanken kerja kesasaen dosa bangsa i.

³¹Karina pèlèen idi rasken pèlèen anggur sikira tambahna ngo i mi pèlèen situtungen gennep ari bak pèlèen hantaren.