Read Batak Dairi 4 Musa 29 Bible Online

4 Musa 29 - Batak Dairi bible

4 Musa 29

¹I ari sada bulan pitu kennah merpulung ngo kènè lako memoji JAHOWA, janah mak ndorok mengulaken ulaen mberrat. Tupung arinkenna i kennah ipersora ngo sarunè.

²Pèlèken mo bai JAHOWA pèlèen situtungen imo sada lembu tonggal bajar dèng, nai sada biri-biri tonggal, dekket pitu anak biri-biri tonggal merumur sitahun, karina i siso lot tikasna. Bau pèlèen idi mo pesennangken ukur JAHOWA.

³Pèlèken ma mo pèlèen hantaren sienggo ipatokken, imo nditak isakkor minak zaitun: Tellu kilo mi lembu tonggal, dua kilo mi biri-biri tonggal,

⁴janah sada kilo mi gennep sada anak biri-biri.

⁵Pèlèken ma mo sada kambing tonggal mahan pèlèen kesasaen dosa. Merkitè cara bagi mo kènè maing kerja kesasaen dosa bangsa i.

⁶Karina pèlèen idi sikira tambahna ngo i mi pèlèen situtungen sinipèlèken rasken dekket pèlèen hantarenna, tupung ari sada gennep bulan. Bagi ma sikira tambahna mi pèlèen situtungen gennep ari sinipèlèken rasken dekket pèlèen hantaren bak pèlèen anggurna. Bau pèlèen situtungen i mo pesennangken ukur JAHOWA.

⁷I ari sipuluh bulan pitu kennah pulung ngo kènè lako memoji JAHOWA. Tupung arinkenna i kennah puasa ngo kènè janah mak ndorok mahan bahaen.

⁸Pèlèken mo bai JAHOWA pèlèen situtungen imo lembu tonggal bajar dèng, sada biri-biri tonggal dèkket pitu anak biri-biri tonggal merumur sitahun, karinana i oda lot tikasna. Bau Pèlèen idi mo pesennangken ukur JAHOWA.

⁹Pèlèken mo pèlèen hantaren sinipatokken, imo nditak merdengan minak zaitun: Tellu kilo mi lembu tonggal, dua kilo mi biri-biri tonggal,

¹⁰janah sada kilo mi gennep sada anak biri-biri.

¹¹Pèlèken ma mo sada kambing tonggal keperluen kerja kessaen dosa bangsa i, laènken pèlèen kesasaen dosa dekket pèlèen situtungen gennep ari bak pèlèen hantaren dekket pèlèen laè anggur sinipèlèken tupung arinkenna i

¹²I ari sipuluh lima bulan pitu kennah baingen ndènè ngo pulungen lako memoji JAHOWA, janah oda ndorok mahan bahaen mberrat. Sidekkah pitu ari kennah baingen ndènè pesta lako pesangapken JAHOWA.

¹³I ari perlebbè, pèlèken mo bai JAHOWA pèlèen situtungen imo sipuluh tellu lembu tonggal bajar dèng, dua biri-biri tonggal bajar, dekket sipuluh empat anak biri-biri tonggal merumur sitahun karinana i oda lot tikasna. Bau pèlèen idi mo pesennangken atè JAHOWA.

¹⁴Pèlèken ma mo pèlèen hantaren sienggo ipatokken imo nditak mersakkor minak Zaitun: Tellu kilo mi gennep sada lembu tonggal, dua kilo mi gennep sada biri-biri tonggal,

¹⁵janah sada kilo mi gennep sada anak biri-biri. Rebbak dekket pèlèen hantaren idi kennah ipèlèken ma mo pèlèen laè anggur siniperluken.

¹⁶Laènkenna i pèlèken ma mo sada kambing tonggal lako mahan pèlèen kesasaen dosa. Sikira tambahna ngo pèlèen i mi pèlèen situtungen gennep ari rasken pèlèen hantaren bak pèlèen anggurna.

¹⁷I ari peduaken pèlèken mo sipuluh dua lembu tonggal bajar. Dua biri-biri tonggal, dekket sipuluh empat anak biri-biri tonggal merumur sitahun, karinana i oda lot tikasna.

¹⁸Pèlèken ma mo rasken dekket idi karina pèlèen sidèbanna bakunè kin siniperluken tupung ari perlebbè i.

²⁰I ari peteluken pèlèken kènè mo sipuluh sada lembu tonggal bajar deng, dua lembu tonggal dekket sipuluh empat anak biri-biri tonggal merumur sitahun, karinana i oda lot tikasna.

²¹Pèlèken ma mo rasken dekket idi karina pèlèen-pèlèen sidèban bagè siniperluken i ari perlebbè.

²³I ari pe-empatken pèlèken mo sipuluh lembu tonggal bajar dèng, dua biri-biri tonggal, dekket sipuluh empat anak biri-biri tonggal merumur sitahun, karina i oda lot tikasna.

²⁴Rasken dekket i pèlèken ma mo tong pèlèen-pèlèen sidèbanna bagè siniperluken i ari perlebbè.

²⁶I ari pelimaken pèlèken mo sibah lembu tonggal bajar, dua biri-biri tonggal, dekket sipuluh empat anak biri-biri tonggal merumur sitahun, karina idi oda lot tikasna.

²⁷Rasken dekket i pèlèken ma mo tong karina pèlèen sidèban bagè siniperluken ari perlebbè.

²⁹I ari pe-enemken pèlèken mo ualuh lembu tonggal bajar dèng, dua biri-biri tonggal, sipuluh empat anak biri-biri tonggal merumur sitahun, karina idi oda lot tikasna.

³⁰Rasken dekket idi pèlèken ma mo tong karina pèlèen sidèban bagè siniperluken i ari perlebbè.

³²I ari pepituken pèlèken mo pitu lembu tonggal bajar dèng, dua biri-biri tonggal, sipuluh empat anak biri-biri tonggal merumur sitahun, karina i oda lot tikasna.

³³Rasken dekket idi pèlèken ma mo tong karina pèlèen sidèban bagè siniperluken i ari perlebbè.

³⁵I ari peualuhken kennah pulung ngo kènè lako memoji JAHOWA janah mak ndorok mengulaken bahaen mberrat.

³⁶Pèlèken mo bai JAHOWA pèlèen situtungen imo sada lembu tonggal bajar dèng, sada biri-biri tonggal, dekket pitu anak biri-biri tonggal merumur sitahun, karinana i oda lot tikasna. Bau pèlèen sibagidi mo pesennangken atè JAHOWA.

³⁷Rasken dekket idi pèlèken ma mo tong karina pèlèen sidèban bagè pèlèen i ari perlebbè.

³⁹Idi mo hatoren tersèngèt pèlèen situtungen, pèlèen hantaren, pèlèen laè anggur, bak pèlèen perdamèen sikennah pèlèenken ndènè bai JAHOWA tupung pèsta-pèsta ndènè sienggo itentuken. Karina pèlèen idi kira tambahna mo i mi pèlèen sinipèlèken ndènè lako menggarar niat barang pè pèlèen sitergerrek ibas ukur.

⁴⁰Ipesakat si Musa mo bai bangsa Israel karina nasa siniperèntahken JAHOWA tabasa.