Read Batak Dairi 4 Musa 3 Bible Online

4 Musa 3 - Batak Dairi bible

4 Musa 3

¹Enda mo simpangaen si Aron dekket si Musa sinderrang mengerana JAHOWA taba si Musa i babo Delleng Sinai.

²Lot ngo empat anak si Aron: Situaen mergerar si Nadab, nai si Abihu, si Eleazar dekket si Itamar.

³Ipebangkit mo kalak i gabè imam merkitè mengarirken minak mi babo takal kalak i.

⁴Tapi matè ngo si Nadab dekket si Abihu i gurun pasir Sinai, tikan menghadep JAHOWA kalak i merembah api siso halal. Oda lot dukak kalak i sidua. Asa sidekkah nggelluh si Aron, mengulaken ulaen imam ngo si Eleazar dekket si Itamar.

⁵Nina JAHOWA mo taba si Musa,

⁶“Dokken mo marga Lewi roh menghadep, janah kalak i mo dokken gabè perkebbas si Aron.

⁷I Undung-undungKu mo kalak i mengula janah kennah mengkebasi imam-imam bak karina ummat i merkitè ulaen kalak i i Undung-undungKu.

⁸Ulaen kalak i imo mengurus karina haliu Undung-undungKu dekket mengulaken ulaen i Undung-undungKu idi sikira gancih kalak Israel.

⁹I bangsa Israel nai, pellin marga Lewi ngo kessa Kudokken tettap mengkebasi si Aron dekket pinemparna.

¹⁰Tapi si Aron dekket dukak-dukakna kennah pebangkitenmu lako mengulaken ulaen imam; laènken kalak i, barang isè sambing simencuba mengulaken ulaen idi kennah ihukum matè.”

¹¹Nina JAHOWA mo mbang si Musa,

¹²“Kupilih ngo bagèndari kalak Lewi gabè milikKu. Tikan Kubunuh karina anak situaen bangsa Mesir, Kupejaè mo bangKu karina anak situaen kalak Israel dekket karina pinakan kalak i si lebbèen tubuh. Karinana idi Aku sidasa. Sikira gancih anak situaen kalak Israel, Kupilih ngo kalak Lewi lako baKu; gabè Aku mo sidasa kalak i. Aku ngo JAHOWA.”

¹³

¹⁴I gurun pasir Sinai idokken JAHOWA mo si Musa

¹⁵memahan daptar gerar-gerar kalak Lewi mengèkutken empung dekket horongna gennep; gennep anak daholi simeru- mur sada bulan mi babo kennah isuratken gerarna.

¹⁶Nai iulaken si Musa mo perèntah JAHOWA idi.

¹⁷Lot ngo tellu daholi dukak si Lewi imo: Si Gerson, si Kehat dekket si Merari. Kalak i mo empung simemempar kaum sinigegolen mengèkutken gerar kalak i. Lot ngo dua daholi dukak si Gerson imo: Si Libni dekket si Simei. Empat ngo daholi dukak si Kehat imo: Si Amram, si Jizhar, si Hebron dekket si Uziel. Dua ngo daholi dukak si Merari imo: Si Mahli dekket si Musi. Kalak idi mo empung horong sinigeraren mengèkutken gerar kalak i.

¹⁸

¹⁹

²⁰

²¹Horong Gerson imo kaum Libni dekket kaum Simei.

²²Buè horong Gerson daholi simerumur sada bulan mi babo sitersurat imo 7500 kalak.

²³Si Elyasaf anak si Lael ngo pengulu horong i. Ibas perundung-undungen bangsa Israel kalak i mo merbekkas kettan kesunduten kan podi Undung-undung JAHOWA.

²⁴

²⁵Mengkebasi Undung-undung JAHOWA, kalak i ngo mertanggung jawab tersèngèt Undung-undung dekket pèntuna, kaèn i pèntu lako mbengket mi bagasen,

²⁶kirè-kirè kasèan simengkulilingi Undung-undung dekket lang- gaten, dekket kirè-kirè pèntu kasèan idi. Ka- lak i mo mertanggung jawab tersèngèt karina ulaen simerdemmu dekket ugas-ugasen idi.

²⁷Horong si Kehat imo: Kaum Amram, Jizhar, Hebron, dekket kaum Uziel.

²⁸Daholi simerumur sada bulan mi babo ibas kaum idi nai buèna karina 8.600 kalak. Kalak idi mo sikarèjo menjamotken barang-barang i Undung-undung JAHOWA.

²⁹Si Elisafan anak si Uziel mo mengerajai kaum idi. Ibas perundung-undungen, merbekkas mo kalak i kettan Selatan Undung-undung JAHOWA.

³⁰

³¹Kalak i mo simertanggung jawab tersèngèt Pèti Perpadanen, mèja, nènèh lampu, langgaten-langgaten, haliu-haliu sinipakè imam i Bilik Simbadia, dekket kirè-kirè kellang-kellang Bilik Simbadia. Kalak idi mo mertanggung jawab i karina ulaen simerperdemuen dekket barang-barang idi.

³²Ekutèn marga Lewi imo si Eleazar, anak si Aron. Ia mo memerèso kalak simerkebbas i Bilik Simbadia.

³³Horong Merari imo kalak sisimpangaen si Mahli dekket simpangaen si Musi.

³⁴Anak laki simerumur sada bulan mi babo ibas horong idi nai buèna karina 6.200 kalak.

³⁵Si Zuriel anak si Abihail mo èkuten horong idi. Ibas perundung-undungen kettan Utara Undung-undung JAHOWA ngo ibuat horong i bekkasna.

³⁶Kalak i mo mertanggung jabab tersèngèt rangka Undung-undung i, balokna, tihangna, hatapna dekket karina perkekkas bak nasa ulaen simerperdemuen dekket ugas-ugasen idi.

³⁷Bagi ma tersèngèt tihang-tihang, hatap, pasek-pasek dekket nasa tinali i kasèan kettan ruar.

³⁸Ibagessen perundung-undungen, si Musa dekket si Aron bak dukak-dukakna kennah memuat bekkas i lebbè Undung-undung JAHOWA, kettan kebincarenna. Kalak idi mo simertanggung jabab ibas ulaen menguluken bangsa Israel memoji JAHOWA i Bilik Simbadia. Laènken kalak i, barang isè sambing simencuba mengulaken ulaen idi kennah ihukum matè.

³⁹Karina anak laki simerumur sada bulan mi babo ibas marga Lewi nai isuratken si Musa mengèkutken horongna gennep merkitè perèntah JAHOWA, pulung karina 22.000 kalak.

⁴⁰Nai nina JAHOWA mo taba si Musa, “Karina anak laki situaen kalak Israel Aku ngo sidasa i. Suratken mo gerar-gerar kalak i simerumur sibulan nai mi babo. Tapi sikira gancih kalak i, Kuteddo mo karina kalak Lewi gabè milikKu. Aku ngo JAHOWA! Janah pinakan kalak Lewi pè Kuteddo mo gabè gancih karina pinakan kalak Israel siperlebbè tubuh.”

⁴¹

⁴²Nai iulaken si Musa mo kadè siniperèntahken JAHOWA; isurati mo karina gerar-gerar anak laki situaen

⁴³simerumur sada bulan mi babo. Buè kalak i karina 22.273 kalak.

⁴⁴Nai nina JAHOWA nola mo bai si Musa,

⁴⁵“Kelini mo kalak Lewi baKu sikira penggancih karina anak laki situaen bangsa Israel; bagi ma pinakan kalak Lewi sikira penggancih pinakan kalak Israel.

⁴⁶Kumerna buèen anak laki situaen kalak Israel 273 kalak daripada buè kalak Lewi, silebbihna idi kennah tebbusen ndènè.

⁴⁷Gennep anak, kennah gararen ndènè lima kèpèng pirak mengèkutken harga simerlaku i Undung-undungKu;

⁴⁸berrèken mo kèpèng idi bai si Aron dekket dukak-dukakna.”

⁴⁹Iulaken si Musa mo perèntah JAHOWA idi.

⁵⁰Ibuat mo 1.365 kèpèng pirak,

⁵¹janah iberèken taba si Aron dekket dukak-dukakna.