Read Batak Dairi 4 Musa 33 Bible Online

4 Musa 33 - Batak Dairi bible

4 Musa 33

¹Enggo kessa itadingken bangsa Israel tanoh Mesir, ibas nuhnuhen mengekutken marga horongna gennep siniuluken si Musa dekket si Aron, mentadi ngo kalak i i barang piga-piga bekkas.

²Iperèntahken JAHOWA ngo taba si Musa asa isurat gerar gennep bekkas sinisinggahen kalak i.

³Bangsa Israel menadingken Mesir i ari sipuluh lima bulan sada, sidari enggo kessa Paskah ari perlebbè. Ibagasen penjamotien JAHOWA itadingken kalak i mo kuta Rameses, ipetengen-tengen bangsa Mesir,

⁴ninganna mengkuburken dukak-dukak buka baju kalak i sienggo ibunuh JAHOWA. Merkitè bagi mo, ipetarar JAHOWA magahken mergegohen ngo Ia daripada sembah-sembahen kalak Mesir i.

⁵Enggo kessa itadingken bangsa Israel kuta Raamses, mermalam mo kalak idi i Sukot.

⁶Nai berkat nola mo kalak i janah mermalam i Etam, i biding gurun pasir.

⁷I sidi nai balik nola mo kalak i mi Pi-Hahirot, kan kebincaren Baal-Zefon, nai mermalam nola mo i gembar Migdol.

⁸Nai kessa i itadingken kalak i nola mo Pi-Hahirot, meneberangi la- ut janah laus mi padang gurun Etam; enggo kessa tellu ari merdalan, mermalam mo kalak i i Mara.

⁹I sidi nai nola terrus mo kalak i janah merundung-undung i Elim; lot ngo i sidi sipuluh dua laè mul dekket pitupuluh kambenna korma.

¹⁰Nai kessa i itadingken kalak i nola mo Elim janah merundung-undung i gembar suak laut Suez.

¹¹Nai merundung-undung nola mo kalak idi i gurun pasir Sin, nai i gembar Dofka, enggo kessa i i Alus, janah kessa i i Rafidim, tapi oda lot laè ènumen i sidi.

¹⁵I Rafidim nai terrus mo kalak i mi Delleng Hor janah merundung-undung i bekkas ènda: Gurun pasir Sinai, Kibrot-Taawa, “Pendèbaen Lobo,” Hazerot, Ritma, Rimon-Peres, Libna, Risa, Kehelata, Delleng Syafer, Harada, Makhelot, Tahat, Tarah, Mitka, Hasmona, Moserot, Bene-Jaakan, Hor-Gidgad, Jotbata, Abrona, Ezion-Geber, gurun pasir Zin, dekket Delleng Hor, iperbalengen tanoh Edom.

³⁸Merkitè perèntah JAHOWA, menangkeng mo Imam Aron mi Delleng Hor. I sidi mo ia matè i ari sada bulan lima tahun peempatpuluhken enggo kessa itadingken bangsa Israel tanoh Mesir. Merumur 123 tahun mo si Aron tikan matè i.

⁴⁰Sintor bagidi terbertik mo berita bai raja nagerri Arad i tanoh Negeb, Kanaan selatan enggo menuju nagerrina bangsa Israel.

⁴¹I perdalanen i Delleng Hor nai mi napa Moab, merundung-undung mo kalak Israel i bekkas ènda: Zalmona, Funon, Obot, kuta Abarim sienggo merumpak i ladang Moab, Dibon-Gad, Almon-Diblataim, Delleng Abarim i gembar Delleng Nebo, dekket i lembeng Moab i biding laè Jordan, ndessing mi kuta Jeriko, i kellang-kellang Bet-Jesimot dekket Napor Sitim.

⁵⁰I kendet Moab idi, i biding Laè Jordan, i gembar kuta Jeriko iberèken JAHOWA mo bai si Musa

⁵¹perèntah-perèntah ènda lako bai bangsa Israel, “Mula isuberrangi kènè Laè Jordan lako mbengket mi nagerri Kanaan,

⁵²kennah puari kènè karina pengisi nagerri idi. Binasaken kènè mo karina gana-ganaen kalak i sinibahan ipas batu dekket tembaga nai bang dekket bekkas kalak i mersembah.

⁵³Kennah rampasi kènè tanoh i janah rajai kè, kumerna Aku ngo merèken idi bai ndènè.

⁵⁴Nai kennah pella-pella kènè mo i gabè milik pusakka kaum bak horong ndènè merkitè merkettip. Bai horong nterrem bilangenna kennah berènken ndènè mbellang bagianna, janah bai horong cituk bilangenna, sempit ma mo bagianna.

⁵⁵Tapi mula oda ibukar kènè pengisi nagerri idi, isusahi kalak sitong merian i sidi mo kènè tosè bagè kersik i mata ndènè barang pè dori i nènèh ndènè. Daoh-daoh ariin gabè kalak i nola mo menjuhap kènè.

⁵⁶Mula oda ibukar kènè kalak i, Kubinasaken mo kènè bagè sienggo Kusura-surai taba kalak i.”