Read Batak Dairi 4 Musa 34 Bible Online

4 Musa 34 - Batak Dairi bible

4 Musa 34

¹Iberèken JAHOWA mo taba si Musa

²perèntah-perèntah ènda lako bai bangsa Israel, “Sinempas nai ibengketti kènè mo nagerri Kanaan, nagerri siKuberèken bai ndènè gabè tanoh pusakka. Enda mo perbalengen nagerri ndènè i.

³Kan Selatan, baleng i mulai mo i padang gurun Zin nai mengèkut-ngèkut Edom. Baleng kan kebincaren mulai mo i kan punca Selatan Laut Matè nai,

⁴memèngkol mi Selatan menuju dalan Akrabim janah terrus mi Zin soh mi Kades-Barnea i Selatan. I sidi nai meluk mi Barat Laut soh mi Hazar-Adar, janah terrus mi Azmon.

⁵I sidi nai memutar mi napa i perbalengen Mesir janah merpunca i Laut Tengah.

⁶Laut Tengah mo gabè baleng nagerri ndènè kettan kesunduten.

⁷I Utara, mulai mo baleng idi i Laut Tengah nai menuju mi Delleng Hor

⁸janah i sidi nai mi dalan Hamat, nai terrus mi Zedad,

⁹dekket mi Zifron janah merpunca i Hazar-Enan.

¹⁰Kan kebincaren, mulai mo perbalengen idi i Hazar-Enan nai mi Sefam.

¹¹I sidi nai mengencuah mi Ribla kan kebincaren Ain, nai terrus mo mi uruk-uruk kan kebincaren biding tao Galilea,

¹²nai mi Selatan mengèkut-ngèkut arur laè Jordan sondel mi laut matè. Idi mo nagerri ndènè mengèkutken perbalengen i sikulilingna.”

¹³Nina si Musa mo taba bangsa Israel, “Idi mo tanoh sinaing jaloen ndènè merkitè mersijemput sinisurat, tanoh siniperèntah JAHOWA kennah ipellaken bai sibah sitengah marga bang- sa Israel.

¹⁴Marga Ruben dekket marga Gad dekket dèba ipas marga Manasye nai enggo menjalo bagianna, janah tanoh idi pè enggo mo ipellaken bai kalak i merhorong-horong.

¹⁵Tanoh pusakka kalak i imo kan kebincaren Laè Jordan, njolmit mi kuta Jeriko.”

¹⁶Nina JAHOWA mo taba si Musa,

¹⁷“Kennah Imam Eleazar dekket si Josua anak si Nun ngo memellaken tanoh i i tengah-tengah ndènè nai.

¹⁸Pebangkit ma mo sada kalak pengulu i gennep marga nai lako mengurupi si Eleazar dekket si Josua memellaken tanoh idi.”

¹⁹Gerar-gerar kalak idi imo: [Marga] — [Simenguluken] Juda — Si Kaleb anak si Jefune Simeon — Si Samuel anak si Amihud Benjamin — Si Elidad anak si Kislon Dan — Si Buki anak si Jogli Manasye — Si Haniel anak si Efod Efraim — Si Kemuel anak si Siftan Zebulon — Si Elisafan anak si Parnah Isasar — Si Paltiel anak si Azan Asyer — Si Ahihud anak si Selomi Naftali — Si Pedael anak si Amihud

²⁹Idi mo kalakna idokken JAHOWA lako kipellaken tanoh pusakka i bai bangsa Israel i nagerri Kanaan.