Read Batak Dairi 4 Musa 35 Bible Online

4 Musa 35 - Batak Dairi bible

4 Musa 35

¹Nai mengerana mo JAHOWA bai si Musa i kendet Moab, i biding Laè Jordan, i gembar kuta Jeriko,

²“Pesakat mo bai bangsa Israel magahken tanoh pusakka sinaing jaloen kalak i, kennah iberèken kalak i ngo bai kalak Lewi barang piga-piga kuta dekket jampalen sikulilingna asa ndorok kalak i merian i sidi.

³Gabè milik kalak Lewi mo kuta i mahan bekkas kalak i. Jampalen sikulilingna imo mahan bekkas pinakan kalak i.

⁴Ukum baleng jampalen idi 450 mèter mo hunjur dekket bekkangna, isibar i pagar kuta nai.

⁵Asa ukum ladang kalak Lewi empat soki ngo rumangna, sibarenna 900 mèter mo gennep bidingna, i tengah-tengah mo kutana.

⁶Kennah berrèken kènè bai kalak Lewi ennem kuta perculenggemmen sikira bekkas kalak mperrus bai kalak siso sengaja memunuh. Laènkenna i kennah berènken dèng ngo bai kalak Lewi empatpuluh dua nai kuta,

⁷rasken dekket jampalenna. Jadi pulung mo karina empatpuluh aluh kuta bai kalak Lewi.

⁸Buè kuta kalak Lewi i gennep ladang marga kalak Israel kennah itentuken mengèkutken buè kuta dekket belgahna aur idi.”

⁹Idokken JAHOWA mo si Musa

¹⁰pesakatken rana ènda bai bangsa Israel, “Enggo kessa isuberrangi kènè Laè Jordan janah mbengket mi nagerri Kanaan,

¹¹kennah tentuken kènè mo kuta percilenggemmen idi, asa mula lot kalak siso sengaja memunuh kalak sidèban, ndorok mperrus mi bekkas idi.

¹²I kuta i mo ia ndorok maluah bai, kadè-kadè kalak sinibunuh i nai sinaing muat bèla. Oda ndorok bunuhen kalak sinisangka memunuh jelma, ukum oda dèng iperèso perkarana i perhukumen jelma nterrem.

¹³Tentuken mo ennem kuta perlenggemmen,

¹⁴tellu kan kebincaren laè Jordan janah tellu nai, i tanoh Kanaan.

¹⁵Si ennem kuta idi mo gabè kuta perlenggemmen bai ndènè, kalak Israel, dekket bai kalak siroh barang pè sienggo menettap i tengah-tengah ndènè. Barang isè sambing sienggo memunuh kalak tapi oda inakkati, ndorok ngo ia mperrus barang mi apaina kuta idi.

¹⁶Tapi mula lot sada kalak memakè sinjata bessi barang batu barang kayu lako memunuh kalak sidèban, pemunuh ngo kalak sibagidi; salah ngo ia kernana i janah kennah ihukum matè.

¹⁹Kadè-kadè sincelketna bai siterbunuh i nai ndorok ngo mengelaluken hukumen matè i. Mula pejumpa ia dekket sipemunuh i, ndorok mo ia memunuhsa.

²⁰Mula lot sada kalak mernggogo atè midak kalak sidèban, nai mènter ibunuh merkitè membatbatsa barang pè merkitè mengkebekkisa,

²¹barang pè menènjusa, pemunuh ngo kalak sibagidi; salah ngo ia janah kennah ihukum matè. Kadè-kadè sincelketna bai siterbunuh i nai ndorok ngo mengelaluken hukumen matè i. Mula jumpasa simemunuh i, ndorok ngo ia memunuh.

²²Tapi nggèut ma ngo sada kalak oda inak- kati memunuh kalak siso niketcegokenna, tah pè merkitè membatbat kalak i barang pè merkitè mementirken barang kadè tabasa.

²³Barang pè nggèut ngo masa bai sada kalak kumarna mak idah, idabuhken sada batu maing gabè matè kalak siso musuhna, janah oda lot sura-surana memakin jèkat bai kalak i.

²⁴Tupung perkara sibagidi runggu bangsa i kennah menimbangi hukum meradepken kalak simemunuh, dekket kalak sinaing memalesken permatè siterbunuh i.

²⁵Runggu bangsa i kennah menjaga kalak simemunuh siso sengaja i meradepken kade-kade si kenna bunuh i. Kennah iembah mo kalak i balik mi kuta perlenggemmen, bekkasna mperrus idi. Kennah merian i sidi mo ia lebbè soh mi enggo matè kalakna Imam Huntun sidangna i; enggo kessa pè i asa ndorok ia balik mi kutana. Tapi mula itadingken ngo kuta perlenggemmen bekkasna mperrus idi, nai jumpa janah ibunuh sincelket kalak siterbunuh i, carana muat bèla sibagidi oda ngo memunuh gerarna.

²⁹Merdalan ngo hatoren i bai ndènè soh mi pinempar ndènè, barang idikè sambing kènè merian.

³⁰Ukum perkara memunuh jelma, kalakna sinituduh kibunuh, ndorok idokken mersalah janah ihukum matè kalakna mula ndorok ibuktiken pengelako i dekket dua kalak saksi barang pè lebbih. Ukum pellin sada kalak ngo kessa saksi oda bias idi lako membuktiken magahken tuhuna sangkaen idi.

³¹Kalak pemunuh jelma kennah ngo ihukum matè. Oda ndorok itebbus hukumen idi merkitè kèpèng.

³²Mula lot sada kalak mperrus mi sada kuta perlenggemmen, ulang padiat ia memerèken kèpèng asa ndorok ia balik mi sapona kum mak dèng matè Imam Huntuen.

³³Mula bagi ibakin kènè, pekemerken tanoh siniianen ndènè ngo kè i si. Pekemmerken nagerri ngo memunuh jelma; jadi oda lot dalan sidèban lako pepantingken nagerri idi laènken menggettap kessah simemunuh i.

³⁴Ulang mekemmer baing kènè tanoh siniianen ndènè, kumerna Aku ngo JAHOWA, janah merian i tengah-tengah bangsa Israel ngo Aku.”