Read Batak Dairi 4 Musa 36 Bible Online

4 Musa 36 - Batak Dairi bible

4 Musa 36

¹Laus mo pengulu-pengulu horong kalak Gilead, dukak si Makhir, imo kempu si Manasye, dukak si Josep, mengadep si Musa dekket pengulu-pengulu sidèbanna i.

²Nina kalak i mo, “JAHOWA ngo mendokken taba kènè memellaken tanoh i bai kalak Israel merkitè mersijemput sinisurat. Ia ma ngo mendokken kènè memerèken tanoh pusakka bai dengan sibeltek nami si Zelafehad bak bai berruna.

³Tapi perlu èngèten mula sijahè kalak i bai marga sidèban gabè bai marga sidèban idi mo tanoh i. Merkitè bagi makin moru mo tanoh sienggo itentuken gabè mahan lah nami.

⁴Tupung tahun olihenken, tikan karina harta milik sienggo idèa i olihenken bai sidasa perlebbè, tanoh berru si Zelafehad idi tong mo hot milik sinibalè kalak i, gabè mago mo tanoh marga nami.”

⁵Nai ipesakat si Musa mo perèntah bai JAHOWA nai taba bangsa Israel, “Tuhu ngo kadè sinidokken pinempar si Josep idi,

⁶kumernaken i idokken JAHOWA ndorok ngo sijahè berru si Zelafehad i barang bai isè ngkelleng atèna, asal mo dos bangsana dekketsa.

⁷Tanoh pusakka gennep kalak Israel gabè tong mo hot bai margana.

⁸Gennep daberru simenjalo perbagianen tanoh pusakka ibas sada marga bangsa Israel, kennah sijahè bai kalak ibas marga idi nai. Merkitè bagidi karina kalak Israel tong menjalo tanoh tading-tadingen empungna,

⁹nai oda mo mompat-ompat sidasa tanoh pusakka idi i sada marga nai mi marga sidèban. Karina marga bangsa Israel tong hot mersidasaken tanoh pusakkana gennep.”

¹⁰Nai rembang mi perèntah JAHOWA taba si Musa, limana berru si Zelafehad idi, imo si Mahla, si Tirza, si Hogla, si Milka dekket si Noa, sijahè bai kalak ncelket dèng bai horong bapana.

¹²Sijahè mo kalak idi bai kalak horong marga Manasye, anak si Josep. Merkitè bagi tong mo hot tanoh pusakka kalak i milik marga bangsa bapa kalak i.

¹³Idi mo hatoren dekket ketentuen sini- berèken JAHOWA bai bangsa Israel merkitè si Musa, tikan merian i Moab bangsa Israel i biding Laè Jordan, ndessing mi kuta Jeriko.