Read Batak Dairi 4 Musa 6 Bible Online

4 Musa 6 - Batak Dairi bible

4 Musa 6

¹Idokken JAHOWA mo si Musa

²pesakatken hatoren èn bai kalak Israel. Barang isè anak laki barang daberru meniatken pesohken dirina nggelluh pellin bai JAHOWA gabè sada kalak tegges,

³oda ndorok ia mènum anggur dekket ènumen mperngis. Oda ndorok ia mengènum barang kadè pè sinibahan ibas buah anggur nai barang pè ibas buah-buahen sidèban nai. Oda ndorok ia kipangan buah anggur rimbaru ipotik barang sienggo iporom barang kadè sambing simerasal i kayu anggur nai; batuna barang pè pucukna oda ndorok ipangan.

⁵Sidekkah ibagasen niatna idi dèng ia oda ndorok igettap bukna barang pè icukkur. Kennah ibelli ngo bagi nggeddang bukna dekket janggutna. Merpantang mo ia sidekkah merhajat i soh mi dapet tikki sienggo ibuhul kin menohken dirina bai JAHOWA.

⁶Bukna idi mo sikira tanda magahken ia ikelini bai Dèbata. Sidekkah merdalan dèng niatna i mak ndorok ia mengelamuni dirina; Oda ndorok ia menjolmiti bangkè, agia pè i bangkè bapana, inangna barang dengan sibeltekna.

⁸Sidekkah ia gabè kalak tegges, simengkelini dirina bai JAHOWA ngo ia.

⁹Mula gabè melamun buk sada kalak tegges sienggo ikelini kumerna njolmit ia mi bangkè kalak simatè sintempu, kennah ipèma ngo pitu ari dekkahna; enggo kessa i kennah icukkur mo bukna dekket janggutna kessa bagi pè asa mbersih ia.

¹⁰I ari peualuhken kennah iembah dua ndarapati barang kèrap taba imam i pèntu Undung-undung JAHOWA.

¹¹Sada manuk-manuk i kennah ipèlèken imam mahan pèlèen kesasaen dosa, janah sada nai mahan pèlèen situtungen lako menguras kelamunenna idi. Ibas sidarinkenna i ma mo tong ia mengkelini bukna idi balik bai JAHOWA,

¹²janah mengolihi menohken dirina tong bagè kalak tegges. Oda ètongen nèngè ukum tikki sienggo salpun idi kumerna enggo sanga melamun ia. Pèlèen mahan gancih kerogien kennah ipèlèken sada anak biri-biri merumur sada tahun.

¹³Mula enggo pul tikki sinibuhul sada kalak tegges, kennah iulaken kerja ènda. Kennah itaruhken mo kalak i mi Pèntu Undung-undung JAHOWA

¹⁴janah merembah bai JAHOWA tellu pinakan siso lot tikasna: Sada anak biri-biri tonggal merumur sitahun mahan peleen situtungen, sada anak biri-biri berru-berru merumur sitahun mahan pèlèen kesasaen dosa, janah sada biri-biri tonggal mahan pèlèen perdamèen.

¹⁵Kennah ipèlèken ma mo sada baka roti sinibahan oda meragi, imo roti cengko sinibahan ibas nditak nai isakkor dekket minak zaitun, dekket kuè menipis idalisi dekket minak zaitun. Laènkenna i kennah ipèlèken dèng ma ngo pèlèen hantaren dekket pèlèen siènumen.

¹⁶Kennah iembah imam mo karinana idi mi hadeppen JAHOWA, nai ipèlèken mo pèlèen kesasaen dosa dekket pèlèen situtungen.

¹⁷Rebbak dekket roti sisada baka idi kennah ipèlèken mo sada biri-biri tonggal idi bai JAHOWA mahan pèlèen perdamèen. Bagidi ma pèlèen hantaren dekket pèlèen ènumen idi kennah ipèlèken bai JAHOWA.

¹⁸Nai kennah icukkur kalak tegges i mo bukna i pèntu Undung-undung JAHOWA, janah iambongken mi api bekkas penutungen pèlèen perdamèen idi.

¹⁹Enggo kessa bagidi, mula enggo iroroh paha jolo biri-biri tonggal i, kennah ibuat imam mo idi janah igamparken rebbak dekket sada roti ncengko dekket sada kuè menipis ibas baka idi nai, mi tangan kalak tegges idi.

²⁰Nai kennah ipacidah imam mo pangaen idi sikira pemerèken simerkedekoen bai JAHOWA; jambar simbadia ngo i janah gabè jambar imam, laènken dada dekket paha biri-biri tonggal mengekutken hatoren gabè sulang imam. Nai kessa i pè asa ndorok kalak tegges idi mènum laè anggur.

²¹Idi mo hatoren bai kalak tegges, tapi mula lot sada kalak tegges menjandiken pèlèen lebbih daripada sienggo itentuken kin, kennah idomi ngo tuhu-tuhu kadè kin sinijandikenna idi.

²²Idokken JAHOWA mo si Musa memagahken taba si Aron dekket dukak-dukakna kennah dokenken kalak i kata-kata èn mula tupung memasu-masu bangsa Israel kalak i:

²⁴Dak ipasu-pasu janah ijamoti JAHOWA mo kènè.

²⁵Dak masèh mo atè JAHOWA taba kènè janah dak ngkelleng atèna bai ndènè.

²⁶Dak masèh mo atè JAHOWA midah kènè, janah iberèken damèna bai ndènè.

²⁷Janah nina JAHOWA mo, “Mula igegoli kalak i gerarKu mahan pasu-pasu bai bangsa Israel, Kupasu-pasu mo kalak i.”