Read Batak Dairi 4 Musa 9 Bible Online

4 Musa 9 - Batak Dairi bible

4 Musa 9

¹I bulan sada tahun peduaken enggo kessa itadingken bangsa Israel tanoh Mesir, mengerana nola mo JAHOWA taba si Musa i gurun pasir Sinai. Nina JAHOWA mo,

²“I ari sipuluh empat bulan èn, memungkah enggo kessa sundut mataniari, kennah irayaken kalak Israel ngo pèsta Paskah mengèkutken hatoren sienggo itetapken.”

⁴Nai idokken si Musa mo bangsa Israel memèstaken Paskah.

⁵Irayaken kalak i ngo pèsta Paskah i i gurun pasir Sinai tupung cibon i ari sipuluh empat bulan sada. Karina ngo iulaken kalak i tosè bagè sienggo ipèrèntahken JAHOWA bai si Musa.

⁶Tapi lot ngo barang piga bai kalak i nai samur kumerna enggo menjamah bangkè, gabè oda ndorok dekket memèstaken Paskah arinkenna i. Laus mo kalak i menghadep si Musa dekket si Aron

⁷janah mendokken, “Samur ngo kami ènda kumerna enggo menjamah bangkè. Tapi kasa kennah iliplip kami gabè mak ndorok dekket memèlèken pèlèen bai JAHOWA rebbak dekket kaka-anggi nami?”

⁸Ialoi si Musa mo, “Pèma kènè mo lebbè kujalo barang bakunè pendokken JAHOWA.”

⁹Ipasulak JAHOWA mo si Musa

¹⁰mendokken taba bangsa Israel, “Mula lot i tengah-tengah ndènè nai barang ibas pinempar ndènè nai sienggo samur kumerna enggo menjamah bangkè barang pè tupung i perdalanen ndaoh, kennah ma ngo tong ia memèstaken pèsta Paskah bai JAHOWA.

¹¹Tapi pèsta idi irayaken kennah sibulan nai i bulan sinaing roh nola, imo i berngin ari sipuluh empat bulan dua. Pèstaken mo ari idi merkitè kipangan biri-biri Paskah merdengan roti siso meragi dekket roroh pagit.

¹²Ulang lot tading bakin kènè pa- ngaen idi soh mi barembenkenna, janah sada pè ulang lot mpenggel bakin kènè ibas tulan pinakan sinipèlèken taba Aku i nai. Pèstaken kènè mo Paskah idi rembang mi karina hatorenna.

¹³Balikna nola ma kalak siso samur janah oda ma tupung i perdalanen, tapi lupa memèstaken Paskah, oda nè Kuètong ia bangsangKu, kumerna oda memèlèken pèlèen ia tabaKu i tikki sienggo itentuken. Kennah igongken kalak sibagidi mo dosana.

¹⁴Mula lot i tengah-tengah ndènè kalak sidèban naing memèstaken Paskah, kennah irayaken mo tosè bagè mi karina hatoren dekket sienggo itetapken kin. Merdalan ngo pati-patiin idi bai karina jelma, kalak Israel barang pè kalak sidèban.”

¹⁵I ari tikan ipajek Undung-undung JAHOWA, roh mo hembun menangkemi Undung-undung i. Tikan berngin nai soh mi siceggen bagè api ngo idahen hembun i.

¹⁷Gennep kumèkè hembun idi, irontas kalak Israel mo perundung-undungen kalak i, nai mèter berkat mo. Janah barang i dikè susur hembun idi, i bekkas idi nola ma mo kalak i merundung-undung.

¹⁸Merkitè perèntah JAHOWA irontas bangsa Israel mo undung-undung kalak i, janah merkitè perèntah JAHOWA ma ngo tong ibahan kalak idi nola mengolihi. Sidekkah i babo Undung-undung JAHOWA hembun idi, hot mo kalak idi merian i bekkas i.

¹⁹Mula ndekkah ngo hembun idi i babo Undung-undung idi, iuèi kalak i ngo hatoren JAHOWA janah oda mèrèt i bekkas idi nai.

²⁰Tapi sipata pellin barang piga-piga ari sambing ngo kessa hembun idi merian i babo Undung-undung idi. Barang bakunè pè nola, perèntah JAHOWA ngo menentuken kalak i merian i sada bekkas barang berkat.

²¹Sipata nggèut ngo hembun i pellin mulai cibonna soh mi siceggen kessa i si merian, janah tikan kumèkè nola hembun i siceggenna berkat mo kalak i. Barang ndigan ari kumèkè hembun i, tah mahar barang berngin, berkat ngo kalak i.

²²Sidekkah merian hembun idi i babo Undung-undung JAHOWA, tah dua ari dekkahna, barang sibulan, sitahun barang lebbih, sidekkahna i mo kalak idi merian i bekkas idi. Mula kumèkè hembun idi, nai ipè asa berkat kalak idi.

²³Merian kalak i i sada bekkas barang berkat mi bekkas sidèban rembang mi perèntah JAHOWA siniberèken JAHOWA arap si Musa.