Read Batak Dairi Mika 2 Bible Online

Mika 2 - Batak Dairi bible

Mika 2

¹Merjaya mo kalak simemaing sura-sura jahat ninganna galè-galè i pedemmen tikan berngin, nai ipesaut mo ceggenkenna kerna lot gegoh kalak i mengulaken.

²Mula sèkel ètongen kalak i midah sada juma, irampasi kalak i mo. Mula sèkel iakap kalak i midah sada bages, i serobot kalak i mo. Bang ugasen bang pè dukak-dukak, oda lot mertahan.

³Kerna i nina JAHOWA ngo, “Kutaki ngo memaing olpek taba kènè, janah sada poda kènè ndorok mpellut. Tupung tikan sial i oda terbaing kènè nèngè gegah merdalan.

⁴Gabè sirèhè-rèhèen mo nasip ndè ibaing dèba, janah ibaing kalak i mo sada endè bonek ènda, ‘Enggo iranggutken JAHOWA nagerri nami ènda janah memerèken taba simenaban kami. Enggo melala kami karinana.’ ”

⁵Kerna i, mula jupa kessa katikana iulakken nagerri i bai bangsa JAHOWA, sada kalak poda bai ndènè nai menjalo bagianna.

⁶Merjamitai mo kalak taba aku, nina, “Ulang ko merjamita bai nami. Ulang jamitaken tersèngèt i karina. Oda mènter termèla nola kami.

⁷Ulang ètong ko bangsa Israel enggo isumpahi JAHOWA! Oda ngo ibakin JAHOWA nola si bagidi. Oda nung mago kesobarenNa. Otang ngo dak selloh Ia mengerana taba kalak simengulaken selloh?”

⁸Ialoi JAHOWA mo, “Kènè ngo simenjuhap bangsangKu tosè bagè musuh. Merbaliken ngo kalak i pergerahaen nai ningan mengharapken sennang iakap i bagesna, keppèken i sidi nola ma mo kènè memèma lako mengerampasi bagesna.

⁹Ipelaus kènè ngo daberru-daberru i tengah-tengah bangsangKu nai i bages sinikekelengenna nai, janah irampasi kènè soh mi sidekkah-dekkahna pasu-pasu siKuberrèken taba dukak-dukak kalak i.

¹⁰Kèkè mo kè janah laus; oda nè ngo mènak i sènda. Dosa-dosa ndènè ngo enggo maing sempa olpek mengerri mi nagerri ènda.

¹¹Iketedohken kènè ngo nabi si uè mer- luap dekket mengoto-ngotoi dekket simengeramalken naing merotcè-otcè mo anggur dekket ènumen mperngis bai ndè- nè.”

¹²Nina JAHOWA nola dèng ma, “Alè kènè bangsa Israel sitadingna dèng! Kennah pepulungenku nola ngo kènè janah Kupersada tosè bagè biri-biri si mulak mi kandangna. Tosè bagè jampalen dom biri-biri, bagidi nola ma mo nagerri ndènè idomi nterrem jelma.

¹³Kubuka mo dalan janah mengarak kènè karuar i buangen nai. Itumburi kènè mo pèntu-pèntu pengkeruhen janah laus oda lot mengambati. Aku, JAHOWA sendiri, ngo Raja ndènè, janah Aku mo menguluken kènè karuar.”