Read Batak Dairi Mika 3 Bible Online

Mika 3 - Batak Dairi bible

Mika 3

¹Dengkohken mo, alè kènè perkuasa-perkuasa Israel! Patutna ngo nem- muken bettohen ndènè kadè sintèger,

²tapi balikna ikecegoken kènè nola ngo simerandal, janah sennang taba si jahat. Ibebak kènè ngo bangsangKu gelluh-gelluhen, janah isegga kènè suka-sukana ipas tulan-tulanna nai.

³Ibendut kènè ngo bangsangku. Isegga-segga kènè koling-kolingna janah ireppuk kènè tulan-tulanna. Igatgati kènè ngo kalak i tosè bagè menggat-gati gulè sinaing bakinen mi saruam.

⁴Dapet nè mo katikana mersurak kènè mengido tolong bai JAHOWA, tapi oda uè Ia mengaloi. Oda idengkohken sodip-sodip ndènè, kerna jahat ngo iulaken kènè.

⁵Ikilang nabi-nabi ngo bangsangku, merkitè mengeramalken simerandal bai kalak simemerèken kèpèng, tapi memusuhi janah mengerèmèhken siso memerèken. Taba nabi-nabi sibagidi, nina JAHOWA ngo,

⁶“Alè kènè nabi, enggo naing kerri tikki ndènè; enggo sidang sundut mataniari ndènè. Oda nè roh bai ndènè alaten petararken sura-surangKu. Oda nè ndorok kènè mengeramalken kadè pè.”

⁷Kalak simengeramalken ari sinaing roh termèla mo ia kerna oda tuhu siniramalkenna. Karina kalak i maknè merabè kerna oda ialoi Dèbata kalak i.

⁸Tapi ukum tersèngèt mi diringku, enggo idomi JAHOWA aku dekket tendiNa bak kuasaNa. Iberèken ngo baku pengantusien tersèngèt ketègerren, dekket keberanien lako mendokken taba kalak Israel dosa-dosa siniulaken kalak i.

⁹Dengkohken mo ranangku ènda, alè kènè perkuasa Israel simengkecegoken ketègerren dekket pesungkarken kebenaren.

¹⁰Ipajek kènè ngo Jerusalem, kuta Dèbata, merhenjellen mi pembunuhen dekket siso ntèger.

¹¹Perkuasa-perkuasa sini kuta memerèntah asa kennaen kèpèng sisip, imam-imam mengajarken patien JAHOWA asa kennaen gaji, janah nabi-nabi mengido ajar bai Dèbata nai asa kennaen kèpèng — nai karina mo kalak i mengètong kettan kalak i JAHOWA. Idokken kalak i mo, “I tengah-tengahta ngo merian JAHOWA; oda nè sempa banta mara.”

¹²Kerna kejahaten ndènè i, ibajak mo Sion tosè bagè juma, gabè pinumpuk rumpak-rumpak mo Jerusalem, janah gabè rambah lunglang mo uruk Bages JAHOWA.