Read Batak Dairi Mika 4 Bible Online

Mika 4 - Batak Dairi bible

Mika 4

¹I ari-ari silako roh uruk, bekkas Bages JAHOWA, cender mo jekjek janah mencuat ndates, mengelampoi delleng-delleng dekket uruk-uruk. Karina bangsa merkolan-kolan mi sidi

²karina mo kalak i mendokken, “Ita kè kita menangkeng mi uruk JAHOWA mi Bages Dèbata Israel! Ajarenkenna mo banta kadè sibalo ulaenkenta. Sièkutken mo dalanNa kerna i Jerusalem nai ngo roh peddah JAHOWA; i Sion nai ngo Ia mengerana taba bangsaNa.”

³Selangsaènken JAHOWA mo perkara samah bangsa mi bangsa, negara simergegoh mi negara simergegoh, sindaoh barang pè sindessing. Ipeteppaken kalak i mo peddang-peddangna gabè pangkur dekket kujur-kujur kalak i gabè raut penggonting. Oda nè mo mersijuhapen bangsa-bangsa, oda nè ma merkebbas-kebbas lako geraha.

⁴Gennep jelma nggelluh mènak janah sennang i tengah pekken anggur bak pekken kayu arana; oda lot simencubiar-cubiarisa, idi mo bagah-bagah JAHOWA Pergegoh Sisotercodi.

⁵Gennep bangsa sinibabo tanoh èn memèlè janah menguèi taba dèbatana sendiri. Tapi ukum kita merpenguèi taba JAHOWA Dèbatanta janah menembahsa soh sidekkah-dekkahna.

⁶Nina JAHOWA mo, “Dapet nèngè mo katikana Aku pepulungken karina kalak siKuhukum, imo kalak simenggong sindersa i buangen.

⁷Enggo italuken kalak i janah ndaoh i lebbuh kalak idi nai. Tapi ibas kalak sitading idi nai pungkahenku nola mo sada cundut sirimbaru. Gabè bangsa mbellen janah mergegoh mo kalak i. Kuperèntah mo kalak i i Uruk Sion soh mi amman sumendah.”

⁸Janah kono alè Jerusalem, bekkas Dèbata menjamotken bangsaNa tosè bagè permakan menjaga biri-biri sinipakanna, balik nola mo ko gabè sabungen kuta kerajaenmu bagè sienggona.

⁹Kasa ko tangis derko-derko? Kasa kono bagè rabisen tosè daberru sinaing ketaring? Mada ngo kumarna oda lot rajamu, dekket kerna enggo mermatèen karina pengetua-pengetuaimu?

¹⁰Alè kènè pengisi Jerusalem mengennat mo kènè janah mendeherreng tosè bagè daberru sidang ketaring! Kerna, bagèndari kennah tadingenken ndènè ngo kuta janah merian i langlang. Kennah laus ngo kè mi Babel, tapi paluahen JAHOWA ngo kènè i sidi bai musuh-musuh ndènè nai.

¹¹Mèduk ngo bangsa enggo mertumpu lako menjuhap kono, alè Jerusalem! Nina kalak i ngo, “Kennah ilala ngo Jerusalem! Kuidah kami mo kuta i gabè rumpak-rumpak!”

¹²Tapi oda ngo ibettoh bangsa-bangsa idi tah kadè itaki JAHOWA. Oda satdar kalak i magahken enggo ipepulung kalak i lako hukumen, dos bagè pagè ipepulung mahan tutuen.

¹³Nina JAHOWA mo, “Alè kènè pengisi Jerusalem, berkat mo kènè janah lettè kènè mo musuh-musuh ndènè! Mergegoh mo kè kubaing tosè bagè lembu simertanduk bessi dekket mercikili tembaga. Mèduk mo bangsa isalpuni kènè, janah ipèlèken kènè mo baku, JAHOWA ni sagumanna silot, kinibèak sidapet kalak i ipas hasil taban-taban kalak idi nai.”

¹⁴Alè kènè pengisi Jerusalem, pido kènè mo mertuhu-tuhu asa iurupi JAHOWA kènè! Sidang ikubu ngo kita! Musuh sidang menjuhap pengulu Israel!