Read Batak Dairi Mika 5 Bible Online

Mika 5 - Batak Dairi bible

Mika 5

¹Nina JAHOWA mo, “O kono Betlehem Efrata, kono ngo sada kuta sikèdèkna kalohon i Juda! Tapi bamu nai ngo naing Kupebangkit sada raja bai Israel janah i sidi nai kin ngo asalna arnia nai.”

²Jadi, ibelli JAHOWA mo bangsaNa irajai musuh-musuh kalak i soh mi tikki daberru sinitentuken gabè inang raja i menubuhkensa. Enggo kessa i karina denganna sada bangsa simerian i buangen balik nola mo ipesada dekket bangsa kalak i.

³Mula roh kessa raja i, Iperèntah mo bangsaNa merkitè kegegohen dekket kuasa bai JAHOWA Dèbatana nai sendiri. Sennang mo nggelluh bangsaNa, kerna karina jelma sini suberri dunia mengakui kebelgahenNa,

⁴janah berèenkenna mo kedamèen. Mula roh kessa bala pergunggung Assur menjuhap nagerrinta dekket menumburi pertahanenta, sipeberkat mo pengulu-pengulunta simergegohna kalohon lako menjuhap kalak i. Italuken pengulu-pengulunta idi mo Assur merkitè kegegohen senjata, janah paluahken kita i tangan kalak idi nai.

⁶Tosè bagè hembun simelamlam bai JAHOWA nai ngo kalak Israel sitadingna dèng lako bai mèduk bangsa, janah tosè bagè perdurus udan mi suan-suanen. Tunandè taba Dèbata mo kalak i, janah oda mertunandè taba jelma.

⁷Kalak Israel sitadingna deng i tengah-tengah bangsa-bangsa codi bagè singa i tengah binatang rambah barang i tengah-tengah pulungen biri-biri i jampalen. Mbengket mo singa i mi tengah-tengah pulungen biri-biri i ninganna mendedohi janah mengem-ngemmi; oda lot sindorok paluahken biri-biri idi.

⁸Italuken Israel mo musuh-musuhna janah menalpuni kalak i karina.

⁹Nina JAHOWA mo, “Tikan bagidi i Kusalpuni mo karina nasa kuda ndènè, janah kubinasaken kurèta-kurèta perang ndènè.

¹⁰Kulala mo karina kuta simerbèntèng i nagerri ndènè, janah Kurentuh karina pertahanen ndènè.

¹¹Kupempitakken mo kajimat-kajimat ndènè dekket karina pertendung ndènè Kupastakken.

¹²Kulala mo gana-ganaen bak mejan-mejan keramat ndènè; oda nè mo kènè menembah oti-otien sinibahan tangan ndènè sendiri.

¹³Kurumpakken mo tugu-tugu Dèbata Asyera silot i nagerri ndènè, janah kulala mo nasa kuta ndènè simerbèntèng.

¹⁴Ibas perpungur lagangKu Kubales mo kejahaten karina bangsa siso menguèi taba Aku.”