Read Batak Dairi Mika 6 Bible Online

Mika 6 - Batak Dairi bible

Mika 6

¹Dengkohken mo kadè sinitukasken JAHOWA taba Israel. Kèkè mo ko, alè JAHOWA, janah pesakat mo pengaduenmu! Baingken mo delleng dekket uruk mendengkohken kadè sinaing dokenkenmu.

²Alè delleng-delleng, alè henjellen tanoh, dengkohken mo pengaduen JAHOWA! Lot ngo perkarana dekket Israel bangsaNa janah kennah ituntut ngo kalak i.

³Nina JAHOWA mo, “Alè bangsangKu, kadè ngo si enggo Kubakin taba kènè? Tupung kadè nung kènè kususahi? Aloi mo Aku!

⁴Enggo Kuarak kènè karuar i Mesir nai, janah Kupaluah i perhambaen nai; enggo Kupasulak si Musa, si Aron, dekket si Miryam lako menguluken kènè.

⁵Alè bangsangKu, èngèt mo kadè taki raja Balak raja Moab taba kènè, janah bakunè pengaloi si Bileam anak si Beor tabasa. Èngèt mo kadè sienggo masa i perdalanen i perkelangen perundung-undungen Sitim dekket Gilgal. Mula ièngèt kènè karinana idi, satdar mo kènè barang bakunè sienggo Kubakin lako paluahken kènè.”

⁶Kadè mo ndia kennah pèlèenkenta bai JAHOWA, Dèbata sinisorga, mula roh kita mersembah tabasa? Kennah ngo ndia kita merembah lembu bajar simerandalna kalohon lako pèlèenken sikira pèlèen situtungen bana?

⁷Sennang ngo ndia JAHOWA mula siembah tabasa meribu-ribu biri-biri barang minak zaitun lahlah kalon? Kennah ngo ndia kita memèlèken tabasa anakta buka baju sikira penebbus dosa-dosanta?

⁸Oda! Enggo ngo ibagahken JAHOWA taba kita kadè simerandal. Sinipidona banta nai imo asa ntèger pemahanta, dakdak mengulaken kelleng, janah merdengan ncerrep perukuren nggelluh rebbak dekket Dèbatanta.

⁹Bijak kalohon ngo mula merkebiaren taba JAHOWA. Itenggoken ngo taba pengisi kuta, “Dengkohken mo, alè kènè simerpulung i kuta!

¹⁰Lot ngo harta i bages kalak jahat sidapetsa merkitè mengakkal-akkali. Ipakkè kalak i ngo sukat-sukat palsu, sada perulaen siKukecegoken. Kuhukum ngo kalak simengulaken bagidi.

¹¹Mènter Kuampuni nola mo kalak simemakkè dacing palsu?

¹²Itèndes kalak si bèak silot i kuta ndè ngo kalak si ncor, janah karina ngo kè perluap.

¹³Bagèndari pè pungkahenKu mo memalu dekket mengago kènè kerna dosa-dosa ndènè.

¹⁴Mangan ngo kènè, tapi oda bessur balikna tong dak melèhè. Merembahi harta ngo kènè, tapi oda terjaga kènè. Barang kadè sambing sini pennep ndènè kennah kusalpuni tupung geraha.

¹⁵Isuan kènè ngo pagè, tapi oda kè- nè memotik hasilna. Ibahan kènè ngo minak i buah zaitun nai, tapi mak ndorok kè memakè minakna. I ilang kènè ngo laè anggur, tapi oda kènè mengènum.

¹⁶Karina idi masa kerna ièkutken kènè ulah-ulah jahat Raja Omri dekket dukakna, imo Raja Ahab. Ipèkut-èkut kènè ngo perulaen kalak i. Kerna i Kuenggoi mo kènè, janah ipencèdurken bak ilèai karina bangsa mo kènè.”