Read Batak Dairi Mika 7 Bible Online

Mika 7 - Batak Dairi bible

Mika 7

¹Mago mo aku! Tosè bagè kalak si kelèhèen ngo aku laus merani enggo kessa pul mosimna. Oda lot nè tading buah ipas kayuna. Buah anggur bak kayu ara simerandalna enggo kerri itapu.

²Enggo salpun kalak bujur i nagerri en nai, oda nè lot jupa kalak bujur taba Dèbata. Gennep jelma memèma katikana lako memunuh. Gennep mertogong-togongen samahsa.

³Karinana pandè mengulaken jahat. Simerpangkat dekket hakim mengido kèpèng sisip, janah simpantas niasè memaksaken guru dokna, bagidi mo kalak i rebbak-rebbak mersada taki.

⁴Si tobok dekket kalak bujur kalohon bai kalak i nai pè tosè ngo bagè rambah merdori siso merguna. Enggo dapet katikana ihukum Dèbata bangsaNa bagè sienggo nipesèngètkenNa kin bai kalak i merkitè nabi-nabiNa. Bagèn- dari enggo masa kegontaren i tengah-tengah kalak i.

⁵Ulang kettoki cibal bagesmu, ulang tunandè taba dengngan. Manat mo ko mengeruapken ranamu, tukasi nola pè sinibagesmu sendiri mendengkohken.

⁶Kerna tupung sibagèn i mersimusuhen ngo samah sisimpangaen pè: Dukak daholi mengelèai bapana, dukak daberru mengalo inangna, janah permaèn merrubat dekket simatuana daberru.

⁷Tapi merpengharapen taba JAHOWA mo kita; merkitè dom pos niatè mo kita memèma Dèbatanta. Dengkohenkenna ngo sodipta janah ipaluah kita.

⁸Oda lot dalanna bai musuh-musuhta lako mersampang atè kumerna kememagonta. Kerna tukasi pè kita ndabuh, kèkè nola ngo kita balik. Bagèndari ipas sigellap kita, tapi isendangi JAHOWA ngo kita.

⁹Enggo merdosa kita taba JAHOWA, kerna i bagèndari mo kennah siggongken lagaNa. Tapi oda ndèkkah nè ipebelai mo kita janah memerèken kesèntengen banta. Embahenna mo kita karuar mi sinterrang; siakapken sendiri mo magahken Ia paluahken kita.

¹⁰Arnia ilèai musuh ngo kita merkitè mendokken, “Idikè ngo JAHOWA, Dèbata ndènè i?” Tapi bagèndari idah kalak i mo bakunè ibaing JAHOWA taba kita, janah gabè termèla mo kalak i. Idahenta mo karina musuh-musuhta i italuken janah idedohi tosè bagè kubang i dalan.

¹¹Alè Jerusalem! Enggo jupa tikkina kènè balik pekadèken dingding pagar kuta ndènè. Tupung ari i mo aur ndènè makin ipebellang.

¹²Mermulaken mo orang-orangmu i karina bekkas nai — i Assur kan kebincaren nai, i Mesir kan selatan nai, i arur Laè Efrat nai, i kèpar laut nai dekket i delleng-delleng sindaoh nai.

¹³Tapi gabè dakkir mo tanoh èn kerna kejahaten pengisina.

¹⁴Alè JAHOWA, permakani mo bangsaMu, bangsa sinipilihMu. Panjil ngo bekkas kalak i i rambah mbellen, i tengah tanoh nggabur. Baing mo kalak i dapetten pangaan i jampalen Basan dekket i Gilead bagè arnia.

¹⁵Petupa mo kelengangen bai nami, alè JAHOWA, bagè sinibakinmu arnia tikan ibabai kono kami ruar i Mesir nai.

¹⁶Idah bangsa-bangsa mo idi janah gabè termèla kerna satdar oda lot merlapaten karina kegegohen kalak i. Mago mo pikiren kalak i gabè maknè ndorok mongkam dekket merpendengkoh.

¹⁷Garang mo kalak i i tanoh bagè nipè. Merdengan buradan janah menggirgir mendarat mo kalak i ibas pertahanen kalak i nai, ninganna roh mendahi kono, alè JAHOWA Dèbata nami.

¹⁸Oda lot Dèbata tosè bagè ko, alè JAHOWA, simengampuni dosa bangsa sinipilihMu sitadingna dèng. Oda ngo soh mi amman sumendah kono melaga; baliksa, lolo ngo ukurMu peteridahken kelleng atèmu siso tersibar i.

¹⁹Balik nola ngo masèh atèmu midah kami janah mengampuni kami. Idedohi kono mo dosa-dosa nami janah iambongken kono mi henjellen laut!

²⁰Ipetarar kono ngo mendè basaMu dekket kelleng atèMu siso tersibar i taba bangsaMu, pemparen si Abraham dekket si Jakob bagè siniperbagah-bagahMu taba empung nami arnia.