Read Batak Dairi Nahum 1 Bible Online

Nahum 1 - Batak Dairi bible

Nahum 1

¹Bagèen ngo tennah Dèbata tersèngèt Niniwe. Ipetarar ngo tennah idi merkitè alaten siniberrèkenna taba si Nahum, sada kalak nabi i Elkos nai.

²Oda uè JAHOWA Dèbata meradum, kalak simengalosa, pasti ihukum. Merdengan pungur, ibalesken ngo hellemna taba kalak i.

³Tuhu ukum JAHOWA, oda mènter ndor melaga; tapi merkuasa kalohon ngo Ia asa barang isè mengulaken kesalahen oda maluah ibas hukumen nai. Barang i dikè merdalan JAHOWA, masa ngo i sidi kalisungsung; i dikè nèhèNa meningkah, i sidi mo abu gabè hembun.

⁴Iasup ngo laut janah ikerrahi, karina batang laè kerri ibakin laèna. Gabè ngkersang mo Delleng Karmel bak dukut-dukut i Basan janah males sagumanna bunga i Libanon.

⁵Delleng-delleng menggirgir i lebbèNa; janah uruk pè gabè ncaèr karina. Mula roh kessa JAHOWA, dumegger mo tanoh èn, menggirgir mo dunia dekket karina jelma pengisina.

⁶Isè ndorok tahan mula melaga JAHOWA? Oda lot ndorok mpellut ibas lagaNa nai. Ipepulak lagaNa singgerger idi melala ngo batu janah gabè abu i lebbèNa.

⁷Permendè basa ngo JAHOWA, ikelungkumi ngo bangsaNa tikan susah kalak i, ijamoti ngo kalak sicilèndung tabasa.

⁸Tosè bagè laè mengeraja mengampuh, isalpuni ngo musuh-musuhNa. Kalak sipang mengalosa ilentem merkitè kematèen dungna binasa.

⁹Barang taki kadè nola pè ibakin kono mengalo JAHOWA, pasti ngo kennah sondat. Oda ngo ibalesken hellemNa soh dua kali bai musuh-musuhNa.

¹⁰Tutungenna mo ko tosè bagè nggala ngkerrah tosè bagè rambah merdori simerbulut-bulut.

¹¹Enggo moldep bamu nai, alè Niniwe sada kalak dom taki-taki jahat. Itaki ngo naing mengalo JAHOWA.

¹²Nai nina JAHOWA mo taba Israel, bangsaNa i, “Tukasi pè kalak Assur idi mergegoh janah nterrem bilangenna, tapi ilentem mo kalak i nai mersep mo. Alè bangsangKu, enggo Kubakin kènè mpersah, tapi oda nè ngo bakinenku bagidi.

¹³Bagèndari pè Kupettadi mo kuasa Assur meradepken kènè, janah Kupostepken rantè simengèkèt kènè.”

¹⁴Bagèen mo keputusen JAHOWA tersèngèt bangsa Assur, “Oda nè mo merketurunen kalak i lako menunduti bangsana. Kusalpuni mo karina gana-gana sembahen silot i bages sembahen kalak i. Sidang pemaken kuburen bai bangsa Assur ngo Aku, kerna oda patut nè kalak i nggelluh!”

¹⁵Idah mo, roh mo sada kalak utusen memellus arap delleng-delleng, merembah sukuten merandal, sukuten kemenangen. Alè bangsa Juda, pèstaken kènè mo ari raya ndènè janah garar mo niatmu bai Dèbata. Oda nè mo ijajah perjahat nagerri ndènè. Enggo isalpuni karina kalak i.