Read Batak Dairi Nahum 2 Bible Online

Nahum 2 - Batak Dairi bible

Nahum 2

¹Alè Niniwe, dengkohken mo! Enggo roh sinaing mencèdaken kono! Jaga kènè mo bèntèng-bèntèng pertahanen! Entip kènè mo dalan! Kebbas mo lako geraha. (

²Tuhu-tuhu ngo, JAHOWA naing pesuangken kinimahangga Israel, asa balik bagè sidekkah-ari, sinderrang mak dèng isamun musuh-musuhna.)

³Mbara ngo rupa tambeng-tambeng musuh, janah pakèenna dos bagè daroh. Enggo kebbas musuh lako menergap. Tosè bagè api, bessi kurètana merkillok. Karina kudana mirjak-irjak.

⁴Selloh ngo merdalan kurèta-kurètana, i dalan. Mersijalang-jalangen ngo kalak i i adaren. Tosè bagè obor mergollah-gollah idahen, merlojang nderras bagè perkas.

⁵Idilo ngo mi lebbè pakalima-pakalimana; Tersendalih ngo kalak i tikan menjuhap. Sagal sugul kalak i menuju dingding pagar kuta i, isudu pecènderken tumbur-tumbur.

⁶Karina pèntu laè enggo mbuka nai gulut mo karina istana!

⁷Kenna tangkup mo bindohara raja, mendeherreng karina radingna janah tangis milangi, kekelsohen kalak i tosè bagè manuk-manuk anè-anè, janah menempuk tenten kerna mersindanggel.

⁸Mperrus mambur pengisi Niniwe, tosè bagè laè mburtas i bendar mbintas nai. Lot ngo menurakken, “Kom mo kè, kom mo kè!” tapi oda lot isè uè balik.

⁹Rampasi mo karina emmas bak pirakna! Merlebbih-lebbih ngo harta i kuta ènda!

¹⁰Enggo salpun Niniwe, melongo janah dakkir. Gabè matah ukur kerna mbiar. Gabè ndalmeh tèun janah menggirgir. Gabè melangan abè karina jelma.

¹¹Idikè ngo kuta i bagèndari? Kuta dosken bagè liang bekkas singa merasar? Bekkas anak-anak singa iberrè mangan, bekkas sinituju singa tonggal dekket berru-berru, bekkas mènak bai anak-anakna?

¹²Arnia i sidi singa menjerngem panganna, janah menarutken bai berru-berru dekket anakna. Idomi ngo bekkasna dekket perpanganen jukut sinijerngemna.

¹³“Musuhmu Aku ngo,” Nina JAHOWA Pergegoh Sisotercodi. “LekkupenKu mo kerri kurèta-kurètamu. Mermatèen mo soridadumu i pergerahaen, janah buatenKu mo karina sienggo ibuat kono bai kalak sidèban nai. Oda nè mo terdengkoh tuntuten-tuntuten utusen-utusenmu.”