Read Batak Dairi Nahum 3 Bible Online

Nahum 3 - Batak Dairi bible

Nahum 3

¹Merjaya mo kuta èn sidom luap dekket pemunuhen; dom harta sinirampasen bagi taban-taban.

²Dengkoh mo sora ligas-ligas dekket perkumeratak daling-daling, derrak-derrik kuda lojang dekket perjumelutuh kurèta.

³Menggasa-nggasa ngo tenterra merkuda merjuhap, golokna melaha-laha janah kujurna ntajem. Oda terbilangen jelma matè, merguk-guken bangkè kalak i, memaingken kalak tertuktuk.

⁴Tupung ihukum ngo Niniwe perlangkah luhlah i. Uluk ngo kinimberruna. Meduk ngo bangsa enggo iula-ulai, janah iendik-endik merdengan lalun.

⁵Nina JAHOWA Pergegoh Sisotercodi, “Alè Niniwe, Kudersa mo kono! TalkasenKu mo olesmu i lebbè bangsa-bangsa, gabè idah kalak i mo haibmu.

⁶Tosè bagè ugasen meronah mo baingenku ko, Kubentiri mo ko dekket kotoren; Kubaing mo ko mahan petengen-tengenen ndèba.

⁷Ipedaoh simengidah kono mo dirina janah idokken, ‘Pellin terulang nai ngo kessa Niniwe! Isè dekket merbonek atè dekketsa? Oda lot isè uè memerèken pengapoi tabasa.’ ”

⁸Alè Niniwe, mènter sellohen mo kono daripada Tebe, sabungen kuta Mesir? Tebe pè i biding laè ngo si mengkelinisa kira tembok. Uè, Laè Nil idi ngo bèntèng pertahanenna.

⁹Tebe ngo mengerajai Sudan dekket Mesir, janah oda mersipat kuasana; denganna sada sungkun ngo Libia dekket Put.

¹⁰Tukasi pè bagidi, kenna taban ngo pengisi Tebe janah ibantun mi kebuangen. I karina sirpang itendelli mo dukak-dukak kalak i sampè matè. Pungkuh-pungkuhna ilanggu dekket rantè janah ipempellaken i tengah-tengah simenaban kalak i.

¹¹Alè Niniwe, kono pè pangsan mo kerna mabuk. Ko pè merusaha ma mo asa mpellut ipas musuhmu nai.

¹²Karina nasa bèntèngmu tosè bagè kayu ara rombang-rambing buahna ntasak-ntasak. Mula idegger kayuna idi, merdabuhen mo buah-buahna mi babah jelma si sèkel kipangansa.

¹³Oda mergoldè soridadu-soridadumu bagè daberru janah nagerrimu oda merkessah lako mendempakken musuh. Lakusenken api mo serdak-serdak pèntu pengkeruhenmu.

¹⁴Takui sambing mo laè mahan keperluenmu sidekkah kono i kubu, janah makin petegguh mo bèntèng-bèntèngmu! Dedohi mo kubang mahan batu bata janah pekadè mo tuangen-tuangenna!

¹⁵Barang kadè sambing ibahan kono, magosia ngo karina, kerna pasti ngo ke keri melekkup barang matè iperjuhapen. Mersep mo kono tosè bagè hasil juma ikerriken balang. Enggo ngo meppar kono bagè balang!

¹⁶Lebbih ngo bagè buè bintang sinilangit buè saudagar-saudagarmu. Tapi bagèndari mersep ngo kalak i, tosè bagè balang simengkerbangken kabengna ninganna laus ngkabang.

¹⁷Nai tosè bagè pulguken balang simendalkep i dingding pagar batu tikan mbergoh ari mo pungkuh-pungkuh bak simerpangkat silot bamu. Tapi enggo kesa mbincar mataniari, mènter mo kalak i mersep merkabangen; sada kalak poda bettoh-bettohen tah mikè kalak i laus.

¹⁸Alè raja nagerri Assur! Enggo mermatèen gubèrnur-gubèrnurmu, janah bupati-bupatimu terpeddem soh mi amman sumendah. Ginemgemmu sompar-baèr i uruk-uruk, janah sada kalak poda lot ndorok memabai kalak i lako balik.

¹⁹Repakmu mak ndorok tertambaren janah ugah-ugahmu oda ndorok terpemalum. Karina kalak simendengkoh berita kememago siroh bamu mertopap tangan merlolo atè. Kerna karina kalak enggo ndersa kemulihken kejahatenmu siso merpunca idi.