Read Batak Dairi Habakuk 1 Bible Online

Habakuk 1 - Batak Dairi bible

Habakuk 1

¹En mo tennah idokken JAHOWA bai Nabi Habakuk.

²Alè JAHOWA, soh ndigan aku pingko-pingko mengido pengurupien? Ndigan ngono idengkohken dekket ipaluah kono kami ipas penèndessen nai?

³Kasa ibelli Ko aku me- ngidah bagi buèna kejahaten? Bakunè ngo pertahanmu mengidah bagi buèna pengelausien? Barang i dikè sambing pè enggo lot kehancuren dekket mengasangken gegoh, perubaten dekket perselisihen.

⁴Oda isarihken hukum janah oda uè ipecèndek ketègerren. Gabè mennang ngo jelma jahat meradepken jelma bujur, memaing gabè iputar-balikken kesèntengen.

⁵Enggo kessa bagidi nina JAHOWA mo taba bangsaNa, “Perdatèken mo bangsa-bangsa i sikuliling ndènè, nai lengang mo kènè janah bengngap. Kerna i tikki ndènè mo lot siKubaingken, siso ikettoki kènè mula pellin itori-toriken bai ndènè.

⁶Kubaing mo bangsa Babel simelaga janah ganas i gabè bangsa merkuasa. Merotor mo kalak i karuar i nagerrina nai janah mengagahi suberri dunia lako menaluken bangsa-bangsa sidèban.

⁷Ibaing kalak i ngo sikebiaren barang i dikè sambing pè; i bagasen jukkat ngo kalak i menulak karina hukum laènken mula cocok mi hendak kalak i.

⁸Nderrasen ngo kudana daripada biahat dahan, janah ganasen daripada sorigala melèhè. Nuhnuhen soridaduna merkuda merrohen i nagerri-nagerri sindaoh nai; pekiroh kalak i tosè bagè keliki menèmbuk pangaenna.

⁹Soridaduna menjuhap lako mahanken kekerasen, karina jelma buradan mengidah pekiroh kalak i. Sinitaban kalak i oda terbilang buèna.

¹⁰Irèhè-rèhèi kalak i ngo raja-raja janah itaba-tabai pugabè-pugabè perpangkat ndates. Rèmèh ngo iakap karina bèntèng, ai itèmbun ngo tanoh nai itaban mo bèntèng i.

¹¹Nai bagè nderras angin mo berkat kalak simengasangken gegohna sendiri.”

¹²Alè JAHOWA, arnia nai ngo Ko Dèbata. Kono ngo Dèbata Simbadia janah menettap. Alè JAHOWA Dèbatangku janah perculèndungenku, bangsa Babel i ngo ipilih Kono janah ibaing Kono mahantu lako menghukum kami.

¹³Tapi bakunè mo pertahanmu mengidah kalak jelma jahat sikejam i? Otang mbadiasu ngo ko menengen kejahaten? Otang nggogo ngo atèmu midah siso adil? Jadi kasa nono sambing kono tikan isalpuni kalak pengalo-ngalo jelma bujur?

¹⁴Kasa iètong ko jelma i dosken ikan i laut, dekket bagè simenjoror siso lot èkutenna?

¹⁵Itangkupi bangsa Babel ngo jelma i merkitè kail, bagè nidokdok ikan nola kalak i. Iruah ngo jelma i ibagasen jala janah bangsa Babel mersennang-sennang kumarna hasil kalak i.

¹⁶Enggo kessa i isembah kalak i mo jala i janah iberrè kalak i pèlèen, kumarna merkitè jala i enggo dapet kalak i rejekki merdapet-dapet janah gabè nduma.

¹⁷Kasa nola mo terrus kalak i menintak pedangna dekket memunuhi bangsa-bangsa, oda nèngè meralang-alang?