Read Batak Dairi Habakuk 2 Bible Online

Habakuk 2 - Batak Dairi bible

Habakuk 2

¹Naing kupenangkih ngo palas penjaganku, ninganna memèma kadè sinaing dokenken JAHOWA mbang aku, janah bakunè pengaloiNa mi sikukelsohken i.

²Ialoi JAHOWA mo aku bagèen, “Okirken mo mpanal ipas leppengen tanoh dendang, kadè siKudokken bamu, asa murah ijaka.

³Suratken mo i, kerna madèng ngo bagèndari masa i. Tapi ndor mo dapet tikkina i, janah kadè siKudokken bamu pasti ngo idi saut. Tukasi pè idahen ndekkah dèng i, tapi pèma sambing mo! Pasti ngo roh ketikana i janah oda nè tersondaten.

⁴Janah èngèt mo: Oda ngo maluah ukum jelma jahat, tapi ukum simengulaken lemmo atè JAHOWA, nggelluh ngo kumara setiana bai JAHOWA.”

⁵Dak mengoto-ngotoi jelma ngo kinibèak i. Tunggang ngo jelma nahaka i janah bulisah. Bagè kematèen, ia pè oda nung polih; i bangsa nai mi bangsa ngo irampasi.

⁶Tapi karina ngo sinitalukenna i mengalingi dekket mengerèhè-rèhèisa. Nina kalak i mo, “Kenna sempetta mo ko kumarna ipegukguk ko harta siso milikmu! Sadikè dekkah nai ko memperkaya dirimu merkitè memaksa kalak simerutang bamu asa igarar utang kalak idi i?”

⁷Tapi oda pemettohenmu, kono si enggo pepatuken sidèban, merutang ma ngo janah ipaksa lako menggarar bungana. Roh mo musuh-musuhmu janah memaing ko gabè buradan. Irampasi kalak i mo hartamu!

⁸Enggo ipupusi kono mèduk bangsa, tapi bangsa-bangsa simaluahna idi nola gabè memupusi kono, kumarnaken ulah-ulahmu memunuhi idi, dekket kumerna kekejamenmu taba nagerri-nagerri, kuta bak jelma pengisina.

⁹Kenna sempetta mo ko! Ipebèak kono ngo kadè-kadèmu merkitè laba-laba sidapet ko merkitè cara kejam, asa mènak bagesmu janah maluah ibas kesusahen bak olpek nai.

¹⁰Tapi karina sura-suramu i pellin merembahken kememèla ngo bai kadè-kadèmu. Merkitè ipupusi kono mèduk bangsa, mengerogiken dirimu sendiri ngo kono.

¹¹Baliksa dekket mo batu-batu i dingding dilo-dilo menumpahi kono, dekket tihang-tihang bages mendiungken dilo-dilo i.

¹²Merjaya mo ko! Ipajek kono ngo kuta merdanganken kejahaten dekket ipelias kono merkitè memunuh.

¹³Bangsa-bangsa sinipepatumu merleja-leja mak merguna, janah karinana sinipecènder kalak i kerri ilekkup api. Karinana i hendak JAHOWA Pergegoh Sisotercodi i ngo.

¹⁴Tapi bagè laut idomi laè, bagi ma mo bang tanoh èn idomi dekket perbinettohen tersèngèt JAHOWA bak kuasaNa.

¹⁵Merjaya mo ko! Kono simengelèai dekket pemèlaken gembar bagesmu; ibaing ko kalak i jumèbè-jèbè bagè kalak mabuk.

¹⁶Bagèndari dapet mo gèlèrenmu nola termèla, janah oda lako ipesangap. Mobah mo kesangapenmu gabè kelèan. Ipaksa JAHOWA mo kono mènum i caban nai sienggo sin hukum bamu. Iènum ko mo nai jumèbè-jèbè mo ko.

¹⁷Itabahi kono ngo kayu i rambah Libanon nai, ukum bagèndari kono sendiri mo itabah. Ibunuhi kono ngo binatang-binatangna, ukum bagèndari binatang-binatang mo maing ko mbiar. Masa karina i kumernaken memunuh dekket kekejamen sinibaingmu taba nagerri-nagerri, kuta bak jelma pengisina.

¹⁸Merjaya mo ko! Idokken kono ngo taba simpenggel kayu, “Cènder mo ko!” barang taba sada batu mbellen, “Kèkè mo ko!” Ndorok ngo idokken sada gana-gana barang kadè bamu? Tah pè ilampisi gana-gana i dekket emmas bak pirak, tapi oda lot kessahna. Kadè mo gunana gana-gana? Ai pellin sinibahan jelma ngo i. Pellin luap sambing ngo kessa dapet ko bana nai. Magosia ngo kepercayaen simemahan gana-gana taba sinibahan tanganna, siso ndorok mongkam i.

²⁰Merian i BagesNa simbadia i ngo JAHOWA; Nono mo karina jelma i hadeppenNa.