Read Batak Dairi Habakuk 3 Bible Online

Habakuk 3 - Batak Dairi bible

Habakuk 3

¹Enda mo sodip si Habakuk:

²Alè JAHOWA, kudengkoh ngo tersèngèt sinibaingMu, nai idomi sampang atè mo ukurku. Naing mo nemmu iulaki Ko pemaingmu mbellen i janah ipacidah Ko i cundut nami. Masèh mo atèmu midah kami mula pè nggerger ukurmu.

³Kono ngo Dèbata simbadia roh i Teman nai roh Ko i uruk Paran nai. Langit isangkemmi kemehejinMu; tanoh èn dom pemojien baMu.

⁴Roh ko ibagasen cuhaya mercala-cala, i tanganMu nai remuar merkillok cuhaya, i sidi ngo iboniken ko kuasaMu.

⁵Ipasulak Ko penakit merdalan i lebbèMu dekket kematèen mengèkut i podiMu.

⁶Mula mentadi Ko, tanoh èn dumegger; mula menatap Ko, karina bangsa gontar. Delleng-delleng simenettap terbelah-belah; uruk-uruk sihot i pè tumerruh, i uruk-uruk idi ngo Ko merdalan i sinderbi nai.

⁷Kuidah ginemgem Kusyam iserpai buradan dekket kalak Midian kadotdoten.

⁸Alè JAHOWA, kumarna laut ngo Ko gabè melaga? Batang laè ngo maing Ko nggerrah? Ipasang Ko hembun mergiro-giro bagè kuda bak kurèta perang, tikan iberèken Ko bai bangsaMu kemenangen.

⁹Enggo ipèmaken ko baorMu enggo kebbas itèmbakken panahMu. Nai ibellah Ko mo tanoh èn gabè batang laè.

¹⁰Mengidah Ko, delleng-delleng merguncang i langit nai roh udan bagè icurahken. Laè i terruh tanoh nai gumeruhguh sorana galombangna merbalun-balun bak menggelora.

¹¹Cuhaya anak panahMu nderras kebbet, kujurMu merkillok merlaha-laha, nai kom mo mataniari bak bulan i bekkasna.

¹²Ibagasen seggat iagahi Ko tanoh èn; idedohi Kono bangsa-bangsa merkitè nggerrah atè.

¹³Merdalan Ko mi lebbè mengosari bangsaMu dekket paluahken raja sinipilihMu. Ipalu Kono geppah penghulu merjaya irasipken kono karina simengèkutkensa.

¹⁴Panah-panahMu menembus pengulu soridadu musuh tikan roh soridaduna bagè gegoh topan, lako menompar-baèrken kami. Tertaba ngo kalak i ibagasen sennang bagè kalak sipsip menèndes kalak sikurangen.

¹⁵Dekket kudaMu ilutak Kono laut mbellang dekket laut kupkupna mbulan.

¹⁶Mendengkoh i, atèngku gontar dekket bibirku menggirgir. Gabè ndotè aku malot nè gegohku, nèhèngku terdengdeng, bang i dikè pè merdalan aku. Mèma ngo aku ibagasen tennang hukum JAHOWA bai kalak simenerrang.

¹⁷Tukasi pè oda merbuah kayu ara dekket batang anggur oda lot laè anggurna. Mula pè peranien zaitun oda lot hasilna dekket pagè i juma maing terdehèrep ukur, mula pè biri-biri matè karina dekket kandang pinakan malot nè sinna,

¹⁸dak mersampang atè ngo aku, kumarna ko ngo alè JAHOWA paluahken aku.

¹⁹Iberrè kono ngo gegoh bangku bagè nèhè balkih ipekong Ko nènèhku. Kono ngo meneggu aku asa merkemènaken tikan merdalan i babo ndelleng.