Read Batak Dairi Zepanya 1 Bible Online

Zepanya 1 - Batak Dairi bible

Zepanya 1

¹Si Zepanya imo anak si Kusyi. Uruten tarombona i terruh nai mi babo, imo si Kusyi, si Gedalya, si Amazia dekket Raja Hizkia. En mo tennah JAHOWA taba si Zepanya sinderrang Raja Josia anak si Amon memerèntah Juda.

²Idokken JAHOWA, “Kuripasken mo karinana silot i tanoh èn:

³karina jelma dekket binatang, termasuk manuk-manuk dekket ikan. Jelma jahat Kurabbatken. Karina jelma manusia Kuripasken, sada kalak poda Kubelli nggelluh. Aku JAHOWA ngo simendokken i.

⁴Kuhukum mo jelma pengisi Jerusalem dekket suberri Juda. Iba-iba penembahen mi Baal Kusalpuni i bekkas-bekkasna i nai. Imam-imam simengkebasi Baal i ilupaken mo karina.

⁵Kuripasken mo barang isè sambing pè laus mi babo sapo lako menembah mataniari, bulan dekket bintang-bintang. Kuripasken ma mo kalak simenembah Aku janah mersumpah setia baKu, tapi mersumpah ma merkitè gerar sembahen Milkom.

⁶Kuripasken mo kalak siso roh mendahi Aku barang siso mengido ajarKu dekket sienggo menadingken Aku janah oda nè uè mengèkutken Aku.”

⁷Enggo ndessing ari JAHOWA, tupung ari i mo JAHOWA memales; kumara i, nono mo kènè i hadeppenNa. Enggo merkebbas-kebbas JAHOWA lako mengerabbatken bangsaNa tosè bagè pèlèen sipèlèenken janah enggo mo idilo musuh-musuh Juda.

⁸“Tupung ari pengerabbatenken i,” nina JAHOWA, “Kuhukum mo pengulu-pengulu, dukak-dukak raja, dekket karina jelma siterèkut-èkut ibas kecemmalen adat kalak sidèban.

⁹Kuhukum mo karina jelma simenembah tosè bagè kalak siso menandai Aku, dekket simenangko janah memunuh lako mendomi bages tuanna dekket harta-harta sinisamun.”

¹⁰“Tupung ari i,” nina JAHOWA, “terdengkoh mo sora derru-derru i Pengkeruhen Ikan. Sora muo-uo terbeggè i perkutaen rembaru idi nai, dekket sora merumpak merginoling i uruk-uruk nai.

¹¹Derru-derru janah tangis mo kènè tikan idengkoh kènè kessa i, alè pengisi kuta si kan jèhè, kumarna karina pertiga-tiga dekket kalak sipejualken kèpèngna enggo matè terbunuh!

¹²Sidang bagidi Kubuat mo obor, janah kusiksik mo kuta Jerusalem. Kuhukum mo pengisina siso menuihken i janah merasa puas ibas dirina sendiri, dekket simerpikir ukum Aku JAHOWA oda nung memaing bagèen dekket bagè adoi.

¹³Irampasi mo harta kalak i janah bagesna pè irumpakken. Ipajek kalak i mo bages tapi oda terianensa. Iula kalak i ngo pekken anggur tapi oda ia me- ngènum laè anggurna.”

¹⁴Enggo ndessing ari perhukumen JAHOWA, uè, enggo ndessing kalohon, ai sintempu mo roh. Dom arsak ngo ari i, janah soridadu simahantuna pè mendempik-dempik kumerna mendellè!

¹⁵Ari laga ngo ari i, kesuliten dekket kesusahen, ari ketaluen dekket persudahna, ari gellap dekket mehèjem, ari meherrem dekket meremmang.

¹⁶Suntuk arinkenna i terdengkoh ngo sora sarunè dekket surak geraha bai lubalang-lubalang simenjuhap kuta merbèntèng dekket simerpantar-pantar ndates.

¹⁷Idokken JAHOWA, “Kupesempa mo mermatcam bagè olpek bai jelma manusia, gabè dadap-dadap mo kalak i bagè jelma pètung. Enggo merdosa kalak i bangKu, bagèndari ntunah mo daroh kalak i bagè laè, dekket bangkè-bangkèna macik i babo tanoh.”

¹⁸Tupung ari sintengam i, ipacidah JAHOWA mo pungurNa, nai karina emmas bak pirakna oda terbaing paluahken kalak i. Suberri tanoh èn melala ilekkup api pungurNa. Sintempu isintak mo karinaNa kessah i tanoh èn nai.