Read Batak Dairi Zepanya 2 Bible Online

Zepanya 2 - Batak Dairi bible

Zepanya 2

¹Alè bangsa siso memettoh mèla, satdar mo kè

²sidang madèng males janah ngkerrah kè bagè bunga! Satdar mo kè sinderrang madèng roh ari pungur JAHOWA, dekket idendenni pungur JAHOWA simergollah-gollah idi nola kènè.

³Balik mo kènè mendahi JAHOWA, alè kènè karina sincerrep merukur i nagerri èn, dekket karina jelma simenguèi perèntah-perèntahNa. Ulaken kènè mo lemmo atè JAHOWA, janah pecerrep dirimu i hadeppenNa. Tah bakunè meluah kènè ibas perhukumen JAHOWA nai tikan ipacidah pungurNa i.

⁴Sada kalak poda ipaluah perkuta Gaza. Askelon melongo oda lot nè pengisina. Jelma pengisi Asdod ipelaus merkitè sintempu ijuhap tupung cèger ari janah pengisi Ekron idokken laus i kuta kalak i nai.

⁵Merjaya mo kènè, alè kalak Palistin, bangsa simerian i arur biding laut. Enggo itetapken JAHOWA hukumenmu. Iripasken mo kènè, sada kalak poda bai ndènè nai maluah.

⁶Gabè jampalen mo nagerrimu sindessing mi laut; ibahan mo i sidi sapo-sapo permakan dekket kandang-kandang pinakan.

⁷Kalak Juda simaluahna, mengkunduli nagerri ndènè i. Ipermakan kalak i mo pinakan i tanoh i, janah mula berngin meddem mo kalak i i bages kalak Askelon. Kumarna ijamoti JAHOWA, Dèbata- na nola mo kalak i dekket memaing kalak i nduma mengolihi.

⁸Idokken JAHOWA Siperkuasa i, “Enggo Kudengkoh pengelèai dekket pengerèhèi bangsa Moab dekket Amon taba bangsangKu. Enggo ibualken kalak i naing mengerampasi tanoh bangsangKu.

⁹Kumernaken Aku singgelluh i, Dèbata bangsa Israel, kuripasken mo Moab dekket Amon tosè bagè Sodom dekket Gomora. Dom telaga sira mo nagerri i dekket rumpak-rumpak menettap bekkas turah rambah ngkeddep merkopi-kopi. BangsangKu simaluahna deng memupusi pengisina dekket mengerampasi tanohna.”

¹⁰Bagidi mo pengisi Moab dekket Amon ihukum kumarna jukkat dekket ndates perukuren kalak i, bagidi ma kumara enggo ilèai kalak i bangsa JAHOWA Perkuasa i.

¹¹Ibaing JAHOWA mo kalak i buradan. Ireppuki mo sembahen i tanoh èn. Nai karina bangsa mo mersembah taba JAHOWA i nagerrina sendiri.

¹²Pengisi Sudan pè ihukum JAHOWA mo dekket hukumen matè.

¹³Enggo kessa i ipergunaken JAHOWA mo kuasaNa lako mengelala Assur. Ibaing mo kuta Niniwe gabè kelongoen dekket gurun dakkal.

¹⁴I sidi mo binatang dekket mermatcam bagè pinakan mergempangen ninganna mengadi. Merasar mo lengkupa i rumpak-rumpak i janah mersorai i babah jendèla nai. Kak merngak-ngak i babo pèntu. Kayu mpiangi perkayu sapo kuta i pè ibuati.

¹⁵Idi mo masa i kuta rami i dekket simerdok atè dirina mènak oda lot gulut. Dok atè pengisina, kutana i mo simbellenna i dunia èn. Sondel mo melongona aur i, oda lot jelma pengisina laènken binatang-binatang rambah merasar i sidi! Gennep jelma simemellus arap kuta i tersengget janah mengerri.