Read Batak Dairi Zepanya 3 Bible Online

Zepanya 3 - Batak Dairi bible

Zepanya 3

¹Merjaya mo Jerusalem, kuta luhlah janah dak memberontak taba JAHOWA, dekket menèndes jelma pengisina sendiri!

²Merjaya mo kuta siso uè menjalo sipesèngèt JAHOWA, janah oda ma menarihken sèngèt-sèngètNa, siso uè pesakatken nasipna bai JAHOWA janah oda mengido urup tabasa!

³Perpangkat kuta i tosè bagè singa merngengngeng. Simenjèmak puhpuhna tosè bagè sorigala rapar; mokkus kalohon ngo kalak i ai sada tulan poda lot itadingken mi sibarembenkenna.

⁴Nangguruna oda lot mertanggung jabab janah oda ketoken; imam-imamna mengelamuni sinikelini bai JAHOWA janah memutar balikken pati-patien Dèbata mahan peruntungen kalak i sendiri.

⁵Tapi i kuta i dèng ngo ukum JAHOWA; dak bennar ngo ibahanken janah oda pennah salah. Gennep ceggen ngo adil ibaing taba bangsaNa. Tapi ukum kalak siso menandai ketègerren i kuta i, dak tong ngo mengulaken kejahaten oda nung ibettoh malu.

⁶Idokken JAHOWA, “Enggo mèduk bangsa kupetumpat; kuta kalak i Kureppuk, janah Kurumpakken mo pagar batu dekket palas kalak i. Melongo mo karina kutana oda lot nè simengiani bak dalanna pè kadè nè poda lot mentas.

⁷KatèngKu ngo, ‘Bagèndari pasti ihormati bangsangKu aku dekket memperatè-atèken karina sipesèngètKu. Tentu ièngèt mo peddah siKuberèken bai kalak i.’ Keppèken makin tahatna nola ngo kalak i mengulaken kejahaten daripada sienggona i.

⁸Tapi jaga! Pèma mo arina kèkè Aku bagè pengadu. Ai enggo Kuputusken lako pepulungken bangsa-bangsa dekket kerajaen-kerajaen lako pesempaken pungurKu taba kalak i. Suberri tanoh èn salpun mo ipangan api pungurKu.

⁹Tapi Kuobah nola mo pusuh peratèen bangsa-bangsa i, gabè pellin taba Aku mo kessa kalak i mersodip, oda nèngè taba dèbata-dèbata siso tuhu. Karinana mo bangsa-bangsa i menguèi Aku.

¹⁰Salang i Sudan si ndaoh i nai merrohen mo bangsangKu simermèrapen i lako memèlèken pèlèen bangKu.

¹¹Ipas katika i alè bangsangKu, oda nè pella mèla kènè kumara enggo memberontak taba Aku. Kupelaus mo gennep jelma sombong dekket ndates ukur, nai oda nè mo kènè memberontak taba Aku i urukKu simbadia i.

¹²Kubelli mo i sidi merian bangsa sicerrep merukur, simengharapken pengurupinKu. Ndorok ngo kalak i merian i sidi.

¹³Kalak Israel sitadingna dèng, oda nè mengulaken kejahaten barang taba isè pè; oda nè uè kalak i merluap janah oda nè mengkilang. Nduma janah mersennang-sennang mo kalak i, janah oda nè buradan barang midah isè pè.”

¹⁴Alè Israel, mersurak mo kènè dekket merendè! Alè Jerusalem, meroang-oang mo i nasa ukur nai!

¹⁵Kumarna enggo ipetadi JAHOWA menghukum kènè; enggo ipelaus karinana musuh ndènè. Ijamoti raja Israel, JAHOWA ndènè sendiri ngo kènè. Bagèndari oda pella perlu nè buradan kènè.

¹⁶Dapet mo tikkina, idokken jelma nterrem mo i podi ari, “Alè Jerusalem, ulang ko mbiar janah cubelli.

¹⁷Ijamotken JAHOWA Dèbatamu simahantu i ngo kènè. Mennang ngo kènè kumarna kuasaNa. Lolo janah mersampang atè ngo JAHOWA kumarna kènè, ibagasen kellengNa bai ndènè iberèken ngo nggelluh sirembaru.

¹⁸Kumernaken kènè, merendè sampang atè ngo Ia tosè bagè jelma tikan merpèsta.” Idokken JAHOWA, “Olpek simengasup kènè, Kusalpunken. Kelèhèen ndènè enggo Kuapusken.

¹⁹Roh mo tikkina Kusalpuni simenèndes kè, dekket kalak sikèpang Kuperkinijuahi karina sibuangen Kuteggu balik. Kelèaen kalak i Kuobah gabè kesangapen; barang i dikè sambing, i suberri tanoh en, imuliaken janah ipoji mo kalak i.

²⁰Roh mo tikkina, pengisimu simermèrapen Kuteggu mulak karina. Termurmur mo kè Kubaing i suberri babo tanoh èn janah kinidumamu Kuolihken nola.” JAHOWA ngo sienggo mengerana.