Read Batak Dairi Hagai 1 Bible Online

Hagai 1 - Batak Dairi bible

Hagai 1

¹I tahun peduaken pemerèntahen Raja Darius i Persia, i ari sada bulan pe-ennemken, mengerana mo JAHOWA merkitè Nabi Hagai. Itujuken JAHOWA ngo tennah i bai si Zerubabel anak si Sealtiel, gubèrnur Juda, dekket bai Imam Huntuen Josua anak si Jozadak.

²Nina JAHOWA Pergegoh Sisotercodi bai si Hagai, “Idokken bangsa ènda oda dèng katikana lako pekadèken balik BagesKu.”

³Kessa i nina JAHOWA nola mo taba bangsaNa merkitè Nabi Hagai,

⁴“Alè bangsangKu enggo ngo tikkina dok atè ndènè kènè merian ibagasen bages ngkong janah ntegguh, keppèken BagesKu tong dèng bagè sapo rumpak-rumpak?

⁵Cuba mo, datèken lebbè diri ndè!

⁶Enggo mbuè isaburken kènè bennih, tapi cituk ngo kessa iperani kènè. Lot ngo pangaen bai ndènè, tapi oda bias lako pebessurken beltek ndènè. Lot ngo anggur bai ndènè tapi oda bias lako pepuasken tagas ndènè. Lot ngo pakkèen ndènè tapi oda bias lako pepedasken badan ndènè. Janah upah sinijalo sigajien oda bias lako menguduti nggelluh kalak i.

⁷Oda ngo satdar kè, kasa masa bagidi?

⁸Bagèndari pè, menangkeng mo kènè mi uruk-uruk lako memuat kayu, nai pajek mo BagesKu, nai sennang mo ukurKu janah balik nola mo aku isembah bakunè kin patutna. Cuba mo datèken kènè diri ndè!

⁹Iharapken kènè ngo gaya-guyu hasil peranien, kepeken pellin cituk kalohon ngo kessa dapet kènè; iembah kènè mo i balik, tapi Kusempul mo hasil peranien ndènè i, gabè kerri iembah angin. Kasa Kubaing bagidi? Alusna imo: Kerna tong dèng ngo BagesKu bagè sapo rumpak-rumpak, keppè karina kènè meradu pejengjengken bages ndènè.

¹⁰Kumerna i mo udan pè lalap oda roh memaing oda turah suan-suanen.

¹¹Enggo ngkerrah kubaing tanoh dekket uruk-uruk, karina juma penuanen pagè dekket pekken-pekken anggur bang pekken-pekken zaitun, dekket karina suan-suanen sini tanoh èn, bagi nola ma bang jelma dekket pinakan bak sagumanna siniula ndènè.”

¹²Kessa i iuèi si Zerubabel dekket si Josua bak karina bangsa Israel sienggo balik i buangen idi nai mo karina rana si Hagai, pasulakken JAHOWA idi. Iulaken kalak i mo kadè siniperèntahken JAHOWA taba kalak i, kerna merkebiaren midah JAHOWA.

¹³Nai ipesakat si Hagai mo taba ginemgem idi tennah JAHOWA magahken enggo merpadan JAHOWA lako mengkelungkumi kalak i.

¹⁴Bagidi mo JAHOWA mendungkul ukur Gubèrnur Zerubabel, Imam Huntuen Josua bagi ma karina kalak sienggo balik i buangen nai; asa karèjo kalak i karina memajek Bages JAHOWA Pergegoh Sisotercodi, Dèbata kalak i.

¹⁵Itebenai kalak i mo bahaen i i ari duapuluh empat, bulan ennem i tahun peduaken tikan pemerèntahen Raja Darius.