Read Batak Dairi Hagai 2 Bible Online

Hagai 2 - Batak Dairi bible

Hagai 2

¹I ari duapuluh sada, bulan pitu tahunkenna idi ma, mengerana nola mo JAHOWA arapken Nabi Hagai.

²Ipasulak JAHOWA mo si Hagai mengerana bai Gubèrnur Zerubabel, Imam Huntuen Josua, bagi ma ginemgem lako pesakatken tennah en.

³“Lot dèng ngo bai ndènè nai mengèngèt bakunè hanggana BagesKu ènda sinderrangna i? Bagèndari enggo bakunè tempana, me- ngèkutken sinibettoh ndènè? Otang oda ngo lot setdap pengakap?

⁴Tapi bagidi nola pè, ulang mendellè, kènè karina! Terrusken kènè mo ulaen idi, kerna dak ngo Kuuripi kènè.

⁵Tikan mbungkas kènè i Mesir nai, enggo merpadan Aku asa dak tong mengkelungkumi kènè. Janah bagèndari pè tong dèng ngo kukelungkumi kènè. Jadi oda perlu kènè rembekbekken.

⁶Ibagasen ndor èn Kudegger mo langit dekket tanoh èn, darat dekket laut.

⁷Karina bangsa Kugontar janah itaruhken mo hartana misèn, gabè dom mo BagesKu dekket kinibèak kalak i.

⁸Karina emmas dekket pirak sini dunia èn milikKu ngo.

⁹Mparasen mo BagesKu sirimbaru idi daripada siperlebbè i, janah i sèn mo berrènkenKu damè dekket kiniduma bai bangsangKu.” JAHOWA Pergegoh Sisotercodi ngo mendokken i.

¹⁰I ari duapuluh empat bulan sibah tahun peduaken pemerèntahen Raja Darius, mengerana nola mo JAHOWA Pergegoh Sisotercodi taba Nabi Hagai.

¹¹Nina mo, “Pido mo keputusen imam-imam tersèngèt persoalen ènda:

¹²Umpamana lot mo kalak memuat singkerret gulè ibas pèlèen sinipèlèken taba JAHOWA nai, nai iembah mo balik ibas pengelempiten jubahna, kessa i merkitè jubahna i idegges mo roti barang sada bagè pangaen, barang anggur, barang pè minak zaitun, barang pè pangaen kadè sambing, karinana ngo idi gabè mpanting?” Tikan ibaingken si Hagai kuso-kuso idi, ialoi imam-imam mo, “Oda.”

¹³Kessa i mengkuso nola mo si Hagai, “Umpamana lot sada kalak gabè samur kumerna mendegges bangkè, kessa i idegges nola ma mo samatcam i pangaen idi nai, gabè samur ngo ndia pangaen idi?” Ialoi imam-imam idi mo, “Uè, samur mo gia!”

¹⁴Nai idokken si Hagai nola ma, “Idokken JAHOWA ngo merdalan ngo hatoren idi bai bangsa Israel i nagerri èn dekket bai sagumanna hasil ndiula kalak i. Jadi, kadè sinipèlèken kalak i i langgaten èn samur ngo i.”

¹⁵Nina JAHOWA mo, “Cuba mo datèken kadè sienggo masa sinderrang mak dèng ari èn, imo sinderrang mak dèng isasai BagesKu èn! Bakunè ngo pernggelluh ndènè tikanna i?

¹⁶Enggo laus kènè menongkir pulguken pagè, janah harap ngo kè kennaen pagè 200 kilo, tapi keppèken 100 kilo ngo kessa lot. Laus ngo kè menaku 100 sellup anggur ibas tongkap anggur nai, keppèken pellin 40 sellup ngo kessa lot.

¹⁷Enggo roh kubaing angin nggara dekket baho lako menalpuni karina hasil juma ndè, tapi tong ngo oda uè kènè balik taba Aku.

¹⁸I ari sidari èn, ari duapuluh empat bulan sibah, enggo dung batu cendi BagesKu igamparken! Datèken mo kadè masa mungkah bagèndari nai.

¹⁹Tukasi pè oda lot nèngè pagè tading, dekket benna anggur, benna kayu ara, benna ndalima dekket zaitun oda dèng merbuah, tapi mungkah bagèndari nai, Kupasu-pasu mo kènè!”

²⁰Arinkenna i ma, imo ari duapuluh empat bulan sibah, ipesakat JAHOWA mo tennah peduaken bai si Hagai,

²¹lako pesakaten bai Gubèrnur Zerubabel. Nina JAHOWA ngo, “Oda ndekkah nèngè Kudegger mo langit dekket tanoh èn,

²²rentuhenku mo kerajaen-kerajaen janah Kusalpuni kuasa kalak i. Kutombang-mbalingken mo kurèta-kurèta perang dekket simengkundulisa; mermatèen mo karina kuda, janah mersibunuh bana mo simengkundulisa.

²³I arinkenna i kono Zerubabel, naposongKu pebangkitenKu lako memerèntah merkitè gerarKu. Kerna kono ngo sienggo Kupilih.” JAHOWA Pergegoh Sisotercodi ngo sienggo mendokken i.