Read Batak Dairi Zakharia 1 Bible Online

Zakharia 1 - Batak Dairi bible

Zakharia 1

¹I bulan peualuhken tahun peduaken pemerèntahen Raja Darius i Persia, ipesakat JAHOWA ngo tennah èn bangku, Nabi Zakharia anak si Berekhya, kempu si Ido.

²Ipasulak JAHOWA ngo aku mendokken bagèen taba bangsaNa, “Arnia melaga kalohon ngo Aku, JAHOWA Pergegoh Sisotercodi, taba empung ndènè.

³Tapi bagèndri Kudokken mo bai ndènè: Mulak mo kènè mendahi Aku, asa balik ma Aku taba kènè.

⁴Ulang mo kènè bagè empung ndènè. Ipesakat nabi ngo arnia tennahKu bai kalak i, asa ulang nè kalak i mengulaken jahat dekket mengulaken dosa. Tapi oda isuihken kalak i janah oda nggèut merpenguèi taba Aku.

⁵I dikè empung ndènè dekket karina nabi i bagèndari? Enggo manè lot kalak i.

⁶Merkitè nabi-nabi naposongKu idi, Kuberèken perèntah-perèntah dekket sèngèt-sèngètKu taba empung ndènè. Tapi oda ngo isuihken kalak i dungna kennah igongken kalak i akibatna. Nai peselsel mo kalak i, janah satdar Aku magahken, JAHOWA Pergegoh Sisotercodi, enggo menghukum kalak i rembang mi kesalahen kalak i, dekket rembang mi sienggo Kutentuken.”

⁷I ari duapuluh empat bulan Syebat, imo bulan sipuluh sada, i tahun peduaken pemerèntahen Raja Darius, ipesakat JAHOWA mo tennahNa taba aku. Ibagasen sada alaten tikan berngin,

⁸kuidah mo malaèkat JAHOWA memasang sada kuda mbara. Mentadi ngo ia i sada lembeng i kellang-kellang kayu sampula. I podina cènder ngo tah piga-piga kuda sidèban, lot mbara, dèba narih mbara dekket mbentar,

⁹Kukusoken mo bana, “Tuan nami, kadè ngo lapaten kuda ènda karina?” Ialoi mo, “Bagahenkenku mo lapatenna bamu.

¹⁰Ipasulak JAHOWA ngo kalak i lako memerèso tanoh èn.”

¹¹Karina kuda i memagahken taba malaèkat, “Enggo kuagahi kami karina sisik tanoh èn, keppèken mènak ngo dunia èn janah meratur.”

¹²Nai nina malaèkat i nola mo, “Alè JAHOWA Pergegoh Sisotercodi, pitupuluh tahun mo dekkahna Kono melaga taba Jerusalem dekket kuta silot i Juda. Soh ndigan ngo Ko dak tong melaga janah oda uè mengampuni kalak i?”

¹³Ialoi JAHOWA mo malaèkat i merkitè rana mengapoi,

¹⁴janah idokken malaèkat i mo aku pesakatken kadè sinidokken JAHOWA Pergegoh Sisotercodi, “Kelleng janah masèh kalohon ngo atèngku midah Jerusalem, kutangKu simbadia i.

¹⁵Tapi melaga kalohon ngo Aku taba bangsa-bangsa simengakapken mènak janah sennang. Kerna tikan kuorom lagangKu bai bangsangKu, itambahi bangsa-bangsa i ngo sitahanen bangsangKu.

¹⁶Bagèndari balik mo Aku mi Jerusalem lako memerèken pengampunen taba kuta idi. Isasai mo balik BagesKu janah ipesuang nola mo balik Jerusalem.”

¹⁷Idokken malaèkat idi nola dèng ma mo aku pesakatken tennah ènda, “Iperbagah JAHOWA Pergegoh Sisotercodi ngo magahken balik nola mo nduma karina kutaNa janah iurupi nola mo Jerusalem sikali nai, janah mengakuisa milikNa.”

¹⁸I alaten sidèban, kuidah mo empat tanduk lembu.

¹⁹Kukusoken mo taba malaèkat sienggo mengerana idi taba aku, “Kadè ngo lapaten tanduk-tanduk idi?” Ialoi mo, “Ukum tanduk-tanduk idi imo menggombarken kerajaen-kerajaen mergegoh simenomparbaerken pengisi Juda, Israel dekket Jerusalem.”

²⁰Nai ipacidah JAHOWA mo bangku empat kalak tukkang bessi merembah palu-palu.

²¹Kukusoken mo, “Kadè ngo ndia dahien kalak i?” Ialoi mo, “Lako mendegger dekket menggolingken bangsa-bangsa sienggo mengelala Juda bak menompar-baèrken pengisina ngo.”