Read Batak Dairi Zakharia 10 Bible Online

Zakharia 10 - Batak Dairi bible

Zakharia 10

¹Mula jupa kessa mosin naing leggo pido mo udan bai JAHOWA. Nai ipepulung JAHOWA mo hembun nggondem, janah memaing roh udan ndor, asa gabè meratah karina juma janah selloh bai karina jelma.

²Mengido peddah ngo kalak bai dèbata siso tuhu dekket taba pertendung, tapi luap ngo karina alus sinijalo kalak i sada poda tuhu. Lot ngo simenjujur nipi, tapi pellin mengelalingken kènè sambing ngo kessa keterangen kalak i, janah oda lot lapaten apo-apo siniberèken kalak i. Kerna i sompar baèr mo jelma nterrem i codi bagè biri-biri. Mali-ali mo kalak i kerna oda lot pengulu.

³Nina JAHOWA mo, “Melaga kalohon ngo Aku taba perkuasa simemerèntah bangsangKu, janah Kuhukum mo kalak i. Tapi aku ngo sidasa jelma pengisi Juda, janah Aku, JAHOWA Pergegoh Sisotercodi ngo pehèdu-hèduken kalak i. Kubaing mo kalak i gabè kuda perang mahantu baKu.

⁴Kupilih mo bai kalak i nai perkuasa, pengulu, dekket pakalima sinaing memerèntah bangsangKu.”

⁵Mennang mo pengisi Juda codi bagè lubalang simendedohi musuh bagè kubang i dalan. Merjuang mo kalak i kumerna Aku, JAHOWA mengurupi kalak i, janah italuken kalak i mo karina nuhnuhen musuh simengkunduli kuda.

⁶“Kupergegohi mo pengisi Juda, Kupaluah mo bangsa Israel. Kubaba i mo kalak i balik mi nagerrina kerna ngkelleng ngo atèngKu taba kalak i. BakinenKu mo taba kalak i tosè bagè bangsa siso nung Kutondali. Aku ngo JAHOWA Dèbata kalak i, Kuperdatèken nola mo karina sodip kalak i.

⁷Bagè lubalang mergegoh mo bangsa Israel, bagè kalak simènum anggur, merlolo atè mo kalak i. Pemparen kalak i icundut nai mi cundut oda mengelupaken kemenangen siKuberrèken ènda. Merlolo atè mo kalak i kerna pemakinKu taba kalak i.

⁸Kudilo janah pepulungenKu mo bangsangKu gabè mersada. Paluahenku mo kalak i janah kubaing bagè buè bilangen kalak i arnia.

⁹Tukasi pè Kupemèrap kalak i mi tengah-tengah bangsa, dak tong ngo ièngèt kalak i Aku i sidi. Njuah-njuah ngo kalak i, bagi ma dukak-dukakna janah rebbakken balik mi nagerrina.

¹⁰Kubalikken mo kalak i, i Mesir dekket i Assur nai. BaingenKu mo kalak i merbekkas i nagerrina sendiri. Kubabai mo kalak i mi Gilead dekket mi Libanon, asa karina nagerri i domi kalak i.

¹¹Mula isuberrangi kalak i laut kesusahen, Aku, JAHOWA menggibal galombang-galombang; nai gabè kerrang-kerring mo dangaen Laè Nil. Kupecerrep mo bangsa Assur si jukkat i, janah mago mo kuasa Mesir simergegoh idi.

¹²Kupergegohi mo bangsangKu, tunduk janah merpenguèi mo kalak i bangKu. Aku, JAHOWA, ngo mendokken i.”