Read Batak Dairi Zakharia 11 Bible Online

Zakharia 11 - Batak Dairi bible

Zakharia 11

¹Alè Libanon, buka mo pèntu-pèntu- mu, asa ilekkup api kayu-kayu aresmu!

²Alè kayu daru, tangis milangi mo ko, kerna enggo mbulak kayu-kayu sempènur, enggo mbongkar kayu kayu mahantu. Tangis mo kènè, alè kayu-kayu mbellen i Basan. Kerna enggo irabi rambah-rambah mbellen.

³Dengkohken mo tangis milangi perkuasa enggo salpun kemahantunna! Dengkohken mo perngaum singa-singa i rambah; kerna mercèdaen mo bekkas kalak i mengèkut-ngèkut Laè Jordan.

⁴Idokken JAHOWA Dèbata mo taba aku, “Pakulah-kulah mo baing bagè permakan mermakan biri-biri sinaing sèaten.

⁵Penokor penokorna memunuh biri-biri idi oda pella lot kenna hukum. Idokken kalak simerdèa jukut biri-biri idi mo, ‘Nipoji mo JAHOWA! Bagèndari makin beakna mo kita!’ Oda lot masèh atè permakan i taba biri-biri sinipiara kalak i.

⁶Oda nè uè aku mermasèh atè barang bai isè pè i nagerri èn. Aku sendiri mo pesakatken karina jelma pengisina taba perkuasa-perkuasa. Ilala kalak i mo nagerri èn, janah oda Kurampasi bai kuasa kalak i nai.”

⁷Nai iupahi saudagar biri-biri mo aku, si Zakharia lako mermakani biri-biri sinaing sèaten. Lot ngo dua tongketku; sada kugerari “Masèh atè” janah sada nai “Pengèkèt.” Kessa i kupungkah mo menjaga dekket mermakan biri-biri idi.

⁸Lot ngo tellu kalak permakan simerceggo atè baku memaingken aku maknè sobar. Kupepuar mo kalak i ibagasen sibulan.

⁹Kessa i ningku nola mo taba pulungen biri-biri i, “Oda nè uè aku mermakan kènè. Belli mo matè sikennah matè, janah sikennah binasa, belli mo binasa. Nai sitadingna ndorok mo mersibunuhen.”

¹⁰Nai kubuat mo tongket sikugerari “Masèh atè” idi janah kupenggelken lako menangsangi perpadanen sinibaing JAHOWA meradepken karina bangsa.

¹¹Ipas arinkenna i ma mo perpadanen idi sangsang. I intèken saudagar biri-biri i mo aku, janah satdar mo kalak i magahken sidang mengerana ngo JAHOWA arap karina perulaenku.

¹²Ningku mo taba kalak i, “Mula tuju iakap kènè, berrèken kènè mo upahku; mula oda pè oda pella.” Nai iberrèken kalak i mo baku tellupuluh kèpèng pirak mahan upahku. Idokken JAHOWA mo taba aku, “Baingken mo kèpèng idi mi peremasen BagesKu.” Nai kubaing mo tellupuluhna kèpèng pirak idi mi peremasen Bages JAHOWA. Pellin nasai mo kessa penghargaen kalak i taba aku.

¹⁴Kessa i kupenggelken mo tongketku peduaken, imo sikugerari “Pengèkèt”, nai mpustak mo kesadaen Juda bak Israel.

¹⁵Nai idokken JAHOWA mo taba aku, “Pakulah-kulah mo sikali nai kono bagè permakan, tapi ukum sikali èn bagè permakan siso selloh mo.

¹⁶Kerna naing pasulakkenKu mo sada kalak permakan lako mermakani biri-biringKu, tapi oda ngo isuihken biri-biri simbalang; oda ngo itulusi biri-biri laling, oda ma itambari biri-biri siugahen, janah oda iberrè mangan biri-biri singgelluhna dèng. Balikna ia sendiri kipangani jukut biri-biri singgomokna kalohon janah mengerengkati cikili pinakan idi.

¹⁷Kenna sempetta mo permakan siso merguna idi! Enggo itadingken ia pulungen biri-birina. Geraha mo mendungi kuasana. Gabè ndalmeh mo bettekkenna janah gabè pètung mo matana kamuhun.”