Read Batak Dairi Zakharia 12 Bible Online

Zakharia 12 - Batak Dairi bible

Zakharia 12

¹Bagèen ngo tennah JAHOWA tersèngèt Israel. JAHOWA ngo sipekimbangken langit, menempa tanoh èn bak memerèken kenggeluhen bai jelma, mendokken,

²“Kubaing mo Jerusalem tosè bagè perènumen sin anggur; nagerri-nagerri cibal balengna mengènum janah jumemba-jemba bagè kalak mabuk. Janah mula ikubu Jerusalem, ikubu ma mo kuta-kuta silotna dèng tading i nagerri Juda.

³Tapi mula enggo kessa dapet ari i, bakinenKu mo Jerusalem codi bagè batu mbotong; bangsa kadè pè mencuba pekèkèkensa gabè merjaya. Karina mo bangsa sinidunia èn mersada lako mengalo Jerusalem.

⁴Tupung ari i Kubaing mo karina kuda gabè bingung janah simengkundulisa kubaing gila, jamotenku mo pengisi Juda, tapi pètung mo Kubakin karina kuda musuhna.

⁵Nai nina sisimpangaen kalak Juda mo ibagasen ukurna, ‘JAHOWA Pergegoh Sisotercodi ngo memerèken kegegohen taba bangsaNa simerian i Jerusalem.’

⁶I arinkenna i Kubaing mo kalak perjabu-jabu Juda codi bagè api ibagasen pinoron barang bagè obor lakat i terruh tumtumen nggala pagè; isalpuni kalak i mo bangsa-bangsa i sikulilingna. Tapi ukum pengisi Jerusalem hot ngo merian ibagasen kuta mersennang-sennang.

⁷Aku, JAHOWA mo, perlebbè kalohon memerèken kemenangen bai tenterra Juda, asa ulang ilampoi kesangapen sinijalo pinempar si Daud bak pengisi Jerusalem kesangapen sinijalo pengisi Juda sidèbanna.

⁸Tupung ari i kelungkumenku mo pengisi Jerusalem; janah bagè gegoh si Daud mo sindotèna kaloen kin bai kalak idi nai. Itettoi pemparen si Daud mo kalak i codi bagè pemaing malaèkatKu, lampo nola dèng codi bagè pemaingKu sendiri.

⁹Tupung ari i Kubinasaken mo gennep bangsa simencuba menjuhap Jerusalem.

¹⁰Kessa i Kuberèken mo bai pemparen si Daud bak pengisi Jerusalem ukur nggasang mermasèh atè janah nggasang mersodip. Idah kalak i mo ia sienggo itikam kalak i janah menangisisa bagè kalak menangisi permatè anak sada-sada. Tangis milangi mo kalak i melui kalohon, codi bagè kalak sienggo kembalangen anak buka baju.

¹¹Tupung ari i masa mo derru-derru nggang kalohon i Jerusalem, codi bagè derru-derru bai si Hadad-Rimon i Napa Megido.

¹²Nai gennep jabu mo i nagerri i tangis milangi; sisimpangaen pemparen si Daud, pemparen si Natan, pemparen si Lewi, pemparen si Simei, dekket karina sisimpangaen sidèbanna. Gennep jelma mo tangis milangi, janah gennep anak laki ibas gennep jabu nai tangis jaè i bekkas daberru nai.”