Read Batak Dairi Zakharia 13 Bible Online

Zakharia 13 - Batak Dairi bible

Zakharia 13

¹Idokken JAHOWA Pergegoh Sisotercodi mo, “Tupung ari i mercikal mo sada mata mul lako menguras pemparen si Daud dekket pengisi Jerusalem i dosa dekket pemèlèen taba gana-gana sienggo iulaken kalak i.

²Tupung ari i Kusasa mo gerar sembah-sembahen i tanoh èn nai, gabè sada kalak nè poda mernèngètsa. Karina kalak simengakuken dirina nabi Kupuari rasken kalak sinisellapen tendi jahat.

³Janah mula lot dèng kalak simendokken ia pesakatken tennah, bapa bak inangna sendiri mo mendokken tabasa asa kennah ihukum matè ia, kerna luap ngo siniruapkenna idi. Mula tong dèng dak iaku dirina nabi; ijuluk bapa bak inangna mo ia asa matè.

⁴Tupung ari i, mèla mo iakap nabi lako memahan bahaenna sikira nabi. Oda nè mo ipakkè kalak i pakèen nabi lako mengakkal-akkali dekket mengèltèkken alaten-alaten kalak i.

⁵Balikna, nina kalak i mo, ‘Oda ngo nabi Aku. Pellin sada kalak peruma-uma ngo aku mengula i juma sidekkah nggelluh.’

⁶Janah mula ikusoken dèba tabasa, ‘Ugah kadè ngo silot i tentenmi?’ ialoi mo, ‘Ugahen ngo Aku i bages denganku.’ ”

⁷Idokken JAHOWA Pergegoh Sisotercodi mo, “Kumèkè mo ko, alè peddang, janah juhap mo permakan simahan bahaen baKu! Bunuh mo ia, asa mermèrapen biri-biri. Kujuhap mo bangsangKu,

⁸janah matè mo dua-pertellu pengisi i suberri aur nai.

⁹Pellin sepertelluna mo kessa maluah. Janah Kupepanting mo kalak i codi bagè pirak sinitingtingen api. Kuoji mo kalak i tosè bagè kalak mengoji emmas. Nai mersodip mo kalak i taba Aku, janah Kualoi mo kalak i. Dokonenkenku mo taba kalak i magahken kalak i ngo bangsangKu, janah kalak i pè mengaku magahken Aku ngo JAHOWA Dèbatana.”