Read Batak Dairi Zakharia 14 Bible Online

Zakharia 14 - Batak Dairi bible

Zakharia 14

¹Enggo njolmit ari perhukumen sinibaing JAHOWA. Nai isamun mo Jerusalem, janah hasilna ipella-pella i lebbè matamu.

²Ipepulung JAHOWA mo karina bangsa lako menjuhap Jerusalem. Italuken mo kuta i, isamuni mo bages-bages, janah irampok mo daberru-daberru. Sitengah i pengisi kuta idi nai ibantun mi buangen, tapi silebbihna tading ngo i kuta i.

³Nai berkat mo JAHOWA janah mergeraha mengalo bangsa-bangsa idi, bagè sinibakinNa arnia.

⁴Tupung ari i cènder mo Ia i Uruk Zaitun, kettan kebincaren Jerusalem. Nai belah dua mo Uruk Zaitun ibaing napa mbellang, mungkah i kebincaren nai soh mi kesun- duten. Mèrèt mo sitengah uruk idi mi utara, janah sitengah nai mi selatan.

⁵Mperrus mo kènè arap napa simemelah uruk idi gabè dua. Mperrus ngo kènè bagè empung ndènè katika masa rènur i tikki pemerèntahen si Uzia, raja Juda. Nai roh mo JAHOWA Dèbatangku, idengani karina malaèkatna.

⁶Mula dapet kessa ari i, oda lot nè simbergoh barang pè ès.

⁷Tupung ari i oda nè lot sigellap. Dak terrus mo nterrang ari, bang tikan berngin pè. Tapi pellin JAHOWA ngo kessa bettoh-bettohen ndigan masa ari i.

⁸Tupung ari i, marir mo laè nciho i Jerusalem nai; sitengah ibas laè idi nai marir mi Laut Matè janah sitengah nai mi Laut Tengah. Menjarir ngo laè idi terrus tahun, bang mosin udan barang mosin leggo pè.

⁹Nai JAHOWA mo memerèntah bagè raja i babo suberri tanoh èn; gennep jelma mo menembahsa bagè Dèbata janah menandaisa ibagasen sada gerar.

¹⁰Karina nagerri mulai i Geba i utara nai soh mi Rimon i selatan, gabè ndèas. Tapi ukum Jerusalem gabè ndates mo, datessen daripada tanoh i sikulilingna; makin mbellang mo kuta i mungkah i Pèntu Pengkeruhen Benjamin nai soh mi Pèntu Pengkeruhen Soki, imo bekkas pèntu Pengkeruhen perlebbè dekket i Pantar Hananel nai soh mi bekkas pengilangen anggur milik raja i.

¹¹Sennang mo jelma kalak si merian i kuta i, oda pella lot asup lako kemagoen.

¹²Ibaing JAHOWA mo roh sakit mpiah kalohon mi karina bangsa sienggo mergeraha mengalo Jerusalem. Mata dekket dilah kalak i, bagi ma karina daging kalak i tupèh macik mo tukasi pè nggelluh dèng kalak i.

¹³Tupung ari i ibaing JAHOWA mo bangsa-bangsa i maknè ibettoh temburenna janah buradan gabè gennep jelma menangkup dengngan silot i gembarna janah menjuhapsa.

¹⁴Mergeraha mo anak laki silot i Juda lako mempebèlai Jerusalem. Sikira harta taban-taban ibuat kalak i mo karina harta bangsa-bangsa silot i sikulilingna merumangken emmas, pirak dekket pakèen mertènjun-tènjun.

¹⁵Sempa ma mo sada bagè sakit ntengam kalohon taba kuda, kuda boban, unta dekket kalodè bak karinana pinakan siniperundung-undungen musuh.

¹⁶Kessa i karina kalak singgelluhna dèng bangsa-bangsa simenjuhap Jerusalem, laus mo mi kuta i lako menembah Raja, JAHOWA Pergegoh Sisotercodi, dekket lako memèstaken Pèsta Sapo-sapo bulung.

¹⁷Mula lot bangsa siso uè laus mi Jerusalem lako menembah Raja, JAHOWA Pergegoh Sisotercodi, nai oda mo roh udan i ladangna.

¹⁸Janah mula oda uè kalak Mesir memèstaken Pèsta Sapo-sapo bulung, sempa mo bai kalak i sakit sinipemasa JAHOWA bai karina bangsa siso uè laus memoji Dèbata.

¹⁹Idi mo hukumen bai kalak Mesir dekket bai karina bangsa siso uè memestaken Pèsta Sapo-sapo bulung.

²⁰Tupung ari i iokir mo giring-giring sinipelano kuda dekket katana bagèen “Pellin bai JAHOWA”. Maharga mo ibakin panci-panci i Bages JAHOWA tosè bagè perènumen pemèlèen i lebbè langgaten.

²¹Karina panci i Jerusalem dekket i suberri Juda ibaing gabè milik JAHOWA Pergegoh Sisotercodi. Ipakkè jelma nterrem simemèlèken pèlèen mo i lako memelgang jukut pèlèenken. Mula jupa kessa tikki i, oda nè mo lot pertiga-tiga i Bages JAHOWA Pergegoh Sisotercodi.