Read Batak Dairi Zakharia 2 Bible Online

Zakharia 2 - Batak Dairi bible

Zakharia 2

¹Ipas alaten sidèbanna nola kuidah mo sada kalak anak laki mencèkèp tinali sibar-sibar.

²Naing mikè ngo kè? ningku mengkuso. “Naing menibar Jerusalem,” nina me- ngaloi, “naing ngo bettohenku sadikè henjur dekket bekkang kuta idi.”

³Kessa i kuidah nola mo malaèkat sienggo kirana dekket aku idi, merdalan mi lebbè, dekket sada kalak malaèkat sidèban menimbakisa.

⁴Idokken malaèkat siperlebbè i mo taba malaèkat sipeduaken, “Ndor mo dahi anak perana idi, janah bagahken bana ukum Jerusalem penjet kalohon nola mo jelma dekket pinakan gabè maknè terbakin memajek dingding pagar i sikulilingna.

⁵Enggo merpadan JAHOWA Ia sendiri mo gabè dingding pagar api mengkulilingi kuta i lako mengkelinisa janah i sidi mo Ia merian merkitè sagumanna kuasa dekket ketunggungenNa.”

⁶Nina JAHOWA mo taba bangsana, “Enggo kupesompar-baèrken kènè mi dèsa siualuh. Tapi bagèndari alè kènè kalak sibuangen, mperrus mo kènè i Babel nai janah balik mo kè mi Jerusalem.

⁸Barang isè menjuhap kènè, dosken menjuhap tampuk pusuh ngo.” Nai ipasulak JAHOWA Pergegoh Sisotercodi i mo aku pesakatken tennah ènda taba bangsa-bangsa sienggo menamun bangsaNa,

⁹“JAHOWA sendiri mo mengalo kènè! Janah isamun hamba-hamba ndènè i kin mo kènè. Mula masa kessa idi, satdar mo kènè magahken enggo ipasulak JAHOWA Pergegoh Sisotercodi i aku.”

¹⁰Nina JAHOWA mo, “Merendè mo kè merlolo atè alè kènè pengisi Jerusalem! Merian i tengah-tengah ndènè mo aku!”

¹¹Tupungna i mèduk mo bangsa-bangsa merrohen mendahi JAHOWA gabè bangsaNa. Merian i tengah-tengah ndènè mo ia, janah bettohen ndènè mo magahken enggo ipasulak JAHOWA aku mendahi kènè.

¹²Gabè milik merkemeddu mo Juda sikali nai bai JAHOWA i tanohNa simbadia i, janah Jerusalem gabè kuta kekelengen atèNa kalohon.

¹³Hot mo kènè merian i lebbè JAHOWA! Kerna enggo berkat Ia i bekkasNa merian i sorga nai.