Read Batak Dairi Zakharia 3 Bible Online

Zakharia 3 - Batak Dairi bible

Zakharia 3

¹Ibas alaten sidèbanna nola, ituduhken JAHOWA mo taba aku, Imam Huntuen Josua sidang cènder i lebbè malaèkat JAHOWA. I gembar si Josua, cènder ngo Sètan sienggo kebbas lako menukassa.

²Nina malaèkat JAHOWA mo taba Sètan i, “Katerra pè ihukum JAHOWA mo ko alè Sètan! Katerra gia ihukum JAHOWA simengkekelengi Jerusalem mo ko. Tosè bagè puntung siniruah ibas api lakat nai ngo kalak èn.”

³Jengjeng ngo si Josua i sidi memakè oles kotor kalohon.

⁴Nai nina malaèkat idi mo taba pengurupi-pengurupi i sorga, “Ambongken mo oles kotor sinipakè kalak èn.” Janah nina mo taba si Josua, “Enggo kupitakken dosamu, kuberèken mo bamu pakèen sirimbaru.”

⁵Iperèntahken ma mo naposona lako memaingken sorban mbersih mi takal si Josua. Menguèi ngo kalak i janah enggo kessa i isellukken kalak i mo pakèen rimbaru idi tabasa i tengen-tengen malaèkat JAHOWA.

⁶Kessa i nola ibagahken malaèkat idi mo kata JAHOWA bai si Josua,

⁷“Mula iuèi kono ngo karina pati-patienKu janah mengu- laken karina ulaen siKuberrè bamu, nai ndorok mo ko gabè pengulu soh mi podi ari i BagesKu janah mengurus soh mi èmpèrna. DengkohenKu mo karina sodipmu, tosè bagè pendengkohkenku mi sodip malaèkat sinjolmit i gembarKu.

⁸Dengkohken mo alè Imam Huntuen Josua, bang kènè imam-imam si gabè dengan-denganna, kènè karina tosè bagè lendung ari selloh i ari podi. Tupungna i pasulakkenKu mo naposongKu sinigeraren, ‘Si Tunas’.

⁹Kugamparken mo i lebbè si Josua sada batu mersoki pitu siKuokir merkitè surat-surat. Ibagasen sidari Kuambongken mo dosa i nagerri èn nai.

¹⁰Mula dapet kessa arina, gennep jelma mendilo gembar sapona asa roh janah mengerasaken damè mersennang-sennang i tengah-tengah pekken-pekken anggur dekket kayu-kayu ara ndènè.”