Read Batak Dairi Zakharia 5 Bible Online

Zakharia 5 - Batak Dairi bible

Zakharia 5

¹Kudatèken nola mo, janah sikali èn kuidah mo sada lapihen binalun ngkabang i babo.

²Ikusoken malaèkat i mo kadè sikuidah i. Ningku mo mengaloi, “Sada lapihen binalun ngkabang i babo. Henjurna sibah mèter janah bekkangna empat sitengah mèter.”

³Nai nina mo mbang aku, “Tersurat ngo ibas lapihen binalun idi sumpah mi karina nagerri èn. Irambar sisada tersurat ngo gennep penangko kennah ipedarat i nagerri en nai. Janah i rambar sidèbanna tersurat ngo gennep kalak mersumpah palsu iliplip ma ngo.

⁴Idokken JAHOWA Pergegoh Sisotercodi mo ipesempa sempetta idi mi gennep bages penangko dekket mi bages kalak simersumpah palsu. Dak kenna sempetta mo bages-bages idi soh mi gabè merumpak.”

⁵Moldep nola mo malaèkat idi janah mendokken, “Tengen! Lot dèng ma ngo roh!”

⁶“Kadè pana i?” ningku mengkusoken. Ialoi mo, “Sada kirang. Imo menggombarken dosa suberri nagerri èn.”

⁷Cemberrah ngo tutup kirang i. Sintorna kunelnelli, mbuka mo tutup kirang i janah taridah mo ibagessen kirang idi dogok sada kalak daberru.

⁸Nina malaèkat idi mo, “Daberru ènda imo menggombarken kejahaten.” Nai idohken mo daberru idi balik mi bagasen kirang idi janah itutup mo kirang i.

⁹Kutengen mo mi babo janah kuidah mo dua daberru ngkabang dempak aku. Lot ngo kabengna ntegguh tosè bagè kabeng sibarung. Ibuat kalak idi mo kirang ndai ninganna iembah kalak i ngkabang.

¹⁰Mengkuso mo aku taba malaèkat idi, “Mikè embahen kalak i kirang idi?”

¹¹Ialoi mo, “Mi Babel, i sidi naing i pajek kalak i bagès sembahen bana. Mula enggo pul bages sembahen i, ibaingken kalak i mo kirang i i sidi mahan sembahenna.”