Read Batak Dairi Zakharia 6 Bible Online

Zakharia 6 - Batak Dairi bible

Zakharia 6

¹Roh nola mo baku alaten sidèban. Sikali èn kuidah mo empat kurèta perang karuar i kellang-kellang dua delleng tembaga nai.

²Simpasang-simpasang kuda ngo mengeruah kurèta-kurèta idi, perlebbè kuda mbara, peduaken kuda mbèrèng,

³petelluken kuda mbentar janah pe-empatken kuda ganding.

⁴Kukusoken mo taba malaèkat idi, “Alè tuan, kadè ngo lapaten kurèta perang ènda?”

⁵Ialoi mo, “Berkat ngo kalak i mi empat jurusen enggo kessa mengadep JAHOWA Tuhan suberri dunia.

⁶Kurèta perang siniruah kuda mbèrèng laus menuju dempak Babel i utara. Kuda mbentar menuju mi kesunduten janah kuda ganding menuju mi negara i selatan.”

⁷Tikan mendarat kuda ganding i, taridah mo oda nè sobar kalak i naing laus memerèso tanoh èn. Nina malaèkat idi mo, “Laus mo kènè lako memerèso tanoh èn!” Nai laus mo kalak i.

⁸Kessa i idokken malaèkat idi mo taba aku, “Kuda si laus mi Babel i enggo pemalapken laga JAHOWA.”

⁹Ipesakat JAHOWA mo tennah èn taba aku.

¹⁰Nina mo, “Buat mo pèlèen siniberèken si Heldai, si Tobia, dekket si Jedaya, imo kalak sirembaru balik i buangen Babel nai. Embah mo ndor pèlèen kalak idi mi bages si Josia anak si Zepanya.

¹¹Ipas emmas dekket pirak pemerèken kalak idi nai, bahan mo sada bulang-bulang janah ampèken mo mi takal Imam huntuen Josua anak si Jozadak.

¹²Dokken mo tabasa magahken Aku JAHOWA Pergegoh Sisotercodi mendokken, ‘Kalak sinigeraren si Tunas, merhasil ngo bahanna i bekkasna merian janah isasai nola mo Bages JAHOWA.

¹³Ia mo memajek BagesKu janah menjalo sangap bagè sada kalak raja, janah ia mo memerentah ginemgemna. Sada kalak imam mendenganisa janah sada orjok mo kalak i mahan bahaen.’

¹⁴Ipennep mo rudang i i BagesKu mahan pernèngèten bai si Heldai, si Tobia, si Jedaya dekket si Josia.

¹⁵Merrohen mo kalak i i bekkas sindaoh nai janah me- ngurupi pekadèken BagesKu. Mula enggo pul bahaen idi, bettohen kalak i mo Aku JAHOWA Pergegoh Sisotercodi enggo pasulakken kono mendahi kalak i. Saut ngo karinana idi mula tuhu-tuhu kalak i menguèi perèntah-perèntahKu, JAHOWA Dèbata kalak i.”