Read Batak Dairi Zakharia 7 Bible Online

Zakharia 7 - Batak Dairi bible

Zakharia 7

¹I ari empat bulan Kislew, imo bulan sibah, ibas tahun peèmpatken pemerèntahen Raja Darius, ipesakat JAHOWA nola mo tennah taba aku.

²Enggo iutus pengisi Betel si Sarezer dekket si Regem-Melekh bagi ma dekket anak buah kalak i mi Bages JAHOWA Pergegoh Sisotercodi lako mengido pasu-pasuNa.

³Isuruh ma ngo kalak i mengkusoken taba imam-imam dekket nabi nabi, bagèen, “Perlu dèng ngo ndia kami menangisi perncèda Bages JAHOWA merkitè puasa gennep bulan pelimaken bagè sienggo kuulaken kami mertahun-tahun dekkahna?”

⁴Bagèen ngo tennah JAHOWA siroh taba aku.

⁵Nina ngo, “Bagahken mo mi karina pengisi nagerri èn dekket taba imam-imam, magahken puasa dekket tangis siniulaken kalak i tupung bulan pelimaken dekket pepituken sidekkah pitupuluh tahun èn oda ngo lako pesangapken Aku.

⁶Bagi ma tikan mangan dekket mènum kalak i kesennangen kalak i sendiri ngo itulusi.”

⁷Idi mo idokken JAHOWA arap nabi-nabi arnia tikan terianen dèng Jerusalem dekket tikan nduma dèng pengisina. Tikala i oda ngo pellin i sosor-sosor i sikuliling kuta i sambing iiani jelma tapi soh ngo mi kettan selatan dekket i karina pispis delleng kettan kesunduten.

⁸Iberrèken JAHOWA Pergegoh Sisotercodi mo tennahna en taba aku,

⁹“Barang piga-piga tahun sienggo salpun Kupesakat ngo perèntah-perèntah èn taba bangsangKu, ‘Kennah ntèger ngo pemakinmu, mermasèh atè janah merukur selloh meradepken samah-samah kènè.

¹⁰Ulang tendes kènè simbalu, anak-anak melumang, kalak siroh merian i tengah-tengah ndènè, barang isè sambing ibagasen kesusahen. Janah ulang ma mertaki jahat meradepken samah kènè.’

¹¹Tapi mpihir ngo perukuren bangsangKu janah laju oda uè mendengkoh ranangku; isompel kalak i ngo penggelna asa ulang mendengkoh.

¹²Ipepihir kalak i ngo ukurna bagè perpihir batu. Melaga kalohon ngo aku kerna oda ièkutken kalak i peddah siKuberèken bai kalak i merkitèken nabi-nabi perlebbè i.

¹³Oda kualoi sodip kalak i, kerna kalak i pè oda uè memegèken mula mengerana Aku.

¹⁴Tosè bagè kaba-kaba, enggo Kupuyu kalak i, dungna kennah merian i nagerri ndèba mo kalak i. Tanoh nggabur èn enggo gabè melongo oda nè isè mengiani janah gabè tanoh ndagal.”