Read Batak Dairi Zakharia 8 Bible Online

Zakharia 8 - Batak Dairi bible

Zakharia 8

¹Ipesakat JAHOWA Pergegoh Sisotercodi mo tennah èn taba aku,

²“Sèkel kalohon ngo ukurku mengurupi Jerusalem kerna kelleng kalohon ngo atèngKu midah pengisina, janah kerna kelleng atèngKu idi, nggara ngo pusuhKu taba musuh-musuh kuta idi.

³Balik mo aku mi Jerusalem, kutangKu simbadia i, janah merian i sidi. Itandai dèba mo Jerusalem bagè kuta setia, dekket delleng JAHOWA Pergegoh Sisotercodi igerari Delleng Simbadia.

⁴I kasèan kuta Jerusalem, merkundulen nola mo daholi bak daberru sienggo tua-tua rokih-rokihen lebbè kennah mertongket asa merdalan.

⁵Dalan-dalan sini kuta i balik nola mo dom anak-anak kumiali.

⁶Bagè oda ngo tuhu i ukum bai kalak singgelluh dèng i bangsa ènda nai, tapi ukum baKu oda lot simak terbaing.

⁷Kuperkinijuahi mo bangsangKu i nagerri-nagerri bekkas kalak i ibantun i nai,

⁸janah merembah kalak i mulak i kebincaren dekket kesunduten nai, gabè suang merian i Jerusalem nola mo kalak i mengolihi. Kalak i nola mo gabè bangsangKu janah Aku gabè Dèbata kalak i. Kuperèntah mo kalak i merkitè setia dekket ketègerren.”

⁹Nina JAHOWA mo taba bangsaNa, “Pepelcik kè mo ukur ndènè! Bagèndari idengkoh kènè ma ngo kata-kata sienggo iruapken nabi-nabi, sinderrang igamparken batu cèndi, lako pekadèken BagesKu balik.

¹⁰Sinderrang madèng i oda lot isè tellap menggaji gegoh jelma barang pè pinakan, janah oda lot mengerasa kemenaken i pengguluti musuh nai. Enggo kupesagut sisada mi sidèbanna.

¹¹Tapi ukum bagèndari karina kalak singgelluhna dèng i bangsa ènda nai kalih ngo Kubakin dekket kalak siarnia.

¹²Ibagasen damè ngo kalak i menabur bennih. Merbuahi mo batang anggur kalak i, iberrèken tanoh i mo hasilna, janah roh mo udan gaya-guyu. Karina pasu-pasu idi Kuberrèken bai jelma kalak singgelluhna dèng ibas bangsa ènda nai.

¹³Alè pengisi Juda dekket Israel! Ukum arnia, mula lot kessa jelma sidèban mersisumpahen, idokken kalak i ngo, ‘Katerra pè sempa ma mo bamu olpek simasa mendahiken Juda dekket Israel!’ Tapi Kuperkinijuahi ngo kènè, asa ipendokkoni kalak sidèban i samah-samah kalak i, ‘Katerra pè roh ma mo bamu pasu-pasu si roh taba Juda dekket Israel!’ Kerna i petegguh mo ukurmu janah ulang mo kono mbiar!”

¹⁴Idokken JAHOWA Pergegoh Sisotercodi ngo, “Tikan melaga aku ibaing empung ndènè, Kutetahken ngo lako menghukum kalak i mposi. Oda ngo kuobah keputusenKu idi, tapi pesautenku ngo.

¹⁵Tapi bagèndari naing pasu-pasuenKu mo pengisi Jerusalem dekket pengisi Juda. Asa, ulang kènè mbiar.

¹⁶Enda mo perèntah-perèntah sikennah ulaenken ndènè: Mula mengerana, ranaken mo situhuna taba denganmu. Nteger mo baingken hukum janah merembahken kemenaken.

¹⁷Ulang sura-sura i taki jahat meradepken samah kènè. Ulang mo mengeruapken sumpah palsu. Nggogo ngo atèngku taba luap bak hukum siso ntèger bak rana mposi.”

¹⁸Ipesakat JAHOWA Pergegoh Sisotercodi ngo tennah èn taba aku lako bai bangsaNa,

¹⁹“Puasa siniulaken tikan bulan pe-empatken, pelimaken, pepituken, dekket pesipuluhken gabè pesta dom sampang atè dekket pesennangken mo i bai pengisi Juda. Kekelengi mo kebenaren dekket damè!”

²⁰JAHOWA Pergegoh Sisotercodi mendokken, “Dapet nèngè mo katikana merrohen pengisi mèduk kuta mi Jerusalem.

²¹Idokken pengisi kuta sisada mo taba pengisi kuta sidèban, ‘Ita kè mo laus menembah JAHOWA Pergegoh Sisotercodi dekket mengido pasu-pasuNa. Rasken mo kita!’

²²Nai nterrem mo jelma dekket bangsa mergegoh merrohen mi Jerusalem lako menembah Aku JAHOWA Pergegoh Sisotercodi dekket mengido pasu-pasungKu.

²³Tupung arina i roh mo sipuluh kalak sidèban mendahi sada kalak Jahudi janah mendokken, ‘Kami pè naing ngo merlaba-olih bagè kènè; kerna kubeggè kami ngo ipasu-pasu Dèbata ngo kami.’ ” JAHOWA Pergegoh Sisotercodi ngo mendokken i.