Read Batak Dairi Zakharia 9 Bible Online

Zakharia 9 - Batak Dairi bible

Zakharia 9

¹Bagèen ngo tennah JAHOWA. Enggo itettahken lako menghukum nagerri Hadrakh dekket kuta Damaskus. Oda ngo pellin marga-marga Israel, tapi dekket ngo sabungen kuta Siria JAHOWA ngo sidasa.

²Hamat si sembaleng dekket Hadrakh ia ma ngo tong sidasa, bagi ma kuta-kuta Tirus dekket Sidon dekket karina kepandèen jelma pengisina.

³Enggo ngo ipajek Tirus bèntèng-bèntèng mi dirina janah pegukgukken mbuè kalohon emmas dekket pirak sanga bagè barang biasa sambing tosè bagè kersik dekket kubang i dalan.

⁴Tapi ncor mo ia ibakin JAHOWA. Karina kinibèak kuta i iambongken mi laut janah kuta i sendiri pè salpun mo ipangan api.

⁵Gabè buradan mo kuta Askelon dekket Gaza mengidah idi. Idah Ekron ma mo idi janah salpun mo karina pengharapenna. Kembalangen raja mo Gaza, janah gabè melongo mo Askelon manè lot pengisina.

⁶Kalak ibas bangsa campuren nai nola mo mengiani Asdod. Nina JAHOWA mo, “Kutempas mo kalak Palistin sintunggang i.

⁷Oda nè mo ipangan kalak i jukut merdaroh dekket pangaen sidèban sinipantangken. Gabè bangsangKu mo karina kalak sitadingna dèng janah ietong bagè kalak ibas marga Juda nai. Gabè masuk bangsangKu nola mo kalak Ekron, tosè bagè kalak Jebus arnia.

⁸Kujaga mo tanohKu janah menghalangi soridadu ndèba sinaing memelussa. Oda nè kupediat nasa penèndes menjajah bangsangKu. Kerna enggo Kuidah kinidersa kalak i.”

⁹Alè kènè pengisi Sion, merlolo atè mo! Alè kènè pengisi Jerusalem, mersurak-surak mo! Idah mo! Rajamu roh merkemennangen! Raja adil ngo ia merembah keluahen. Tapi dom cerrep ukur ngo ia roh memasang kalodè, sada kalodè bajar dèng.

¹⁰Nina JAHOWA mo, “Kuambongken mo kurèta-kurèta perang i Efraim nai, Kusalpuni karina kuda silot i Jerusalem nai janah Kugeppui karina panah. Itingtingken rajamu mo perdamèen i tengah-tengah bangsa-bangsa. Merkuasa ngo ia i laut nai mi laut, i Laè Efrat nai soh mi punca dunia èn.”

¹¹Nina JAHOWA mbang bangsaNa, “Kemulihken perpadanen siKubaing dekket kènè, perpadanen sienggo isahken merkitè daroh pèlèen sinipèlèken, paluahenKu mo ginemgemmu simenggong kinidersa ibuangen codi bagè kalak siterkurung ibagasen sumur ngkerrah.

¹²Balik mo kènè alè jelma-jelma buangen, bagèndari enggo lot harapen ndènè. Balik mo kè mi bekkas percilèndungen ndènè, dak mo Kupasu-pasu kènè. Dengkohken mo: Pasu-pasuenKu mo kènè dua kali lempit kerna karina kinidersa sienggo niakapen ndènè.

¹³Kupakke mo Juda bagè panah lubalang, janah Israel sikira anak panah sienggo hantar tembakenken. Pengisi Sion Kupakkè dosken peddang; merkitè peddang i mo kalak Junani Kujuhap.”

¹⁴Ipacidah JAHOWA mo dirina taba bangsaNa, codi bagè pelian ngo anak panahNa itembakken. Isempul JAHOWA Sintèmbul i mo sarunè tanda menjuhap ninganna kebbas mi lebbè ibagasen kaba-kaba i selatan nai.

¹⁵Pasti ngo iberrèken perculendungen bai bangsaNa, gabè ndorok karina musuh italuken kalak i. Codi bagè selking kalak simabuk ibaing ènumen, bagidi mo selking kalak i tikan geraha. Tosè bagè daroh pèlèen siniorèken mi babo langgaten, bagidi mo daroh musuh kalak i durus.

¹⁶Mula dapet kessa ari idi, ipaluah JAHOWA mo bangsaNa, codi bagè permakan paluahken biri-birina i mara nai. Mercuhaya mo kalak i i tanoh JAHOWA, codi bagè permata rudang merkillok-killok.

¹⁷Sondel mo sellohna tanoh JAHOWA luas, sondel mo selloh bak merandalna! I sidi merturahen luyun anggur dekket gandum, memaing simatah daging makin mergegoh.