Read Batak Dairi Maleaki 1 Bible Online

Maleaki 1 - Batak Dairi bible

Maleaki 1

¹Bagèen ngo tennah JAHOWA taba si Maleaki, lako bai kalak Israel.

²Idokken JAHOWA mo taba bangsaNa, “Kukekelengi ngo kènè.” Tapi ialoi kalak i mo, “Bakunè ngo pengkekelengi JAHOWA bai nami?” Ialoi JAHOWA mo, “Otang si Esau ngo kaka si Jakob? Tapi si Jakob ngo Kukekelengi,

³ukum si Esau, nceggo ngo atèngKu. Uruk kajangen si Esau enggo Kugeppui, janah tanohna Kusohken taba binatang-binatang penjerngem i padang gurun.”

⁴Mula pè idokken pemparen si Esau kalak Edom i, “Enggo mo ireppuki karina kuta nami, tapi kupekadè kami nola mo mengolihi”, nai ialoi JAHOWA mo, “Ndorok ngo ipelias kalak i mengolihi, tapi Kurumpakken ngo i. Igerari dèba mo ia ‘Nagerri durhaka’ dekket ‘Bangsa sikenna pungur JAHOWA soh mi amman sumendah.’ ”

⁵Idah bangsa Israel sendiri ngo i, janah nina mo, “Mbelgah tuhu-tuhu ngo JAHOWA; soh ngo kuasaNa mi ruar tanoh Israel!”

⁶Idokken JAHOWA Pergegoh Sisitercodi mo taba imam-imam, “Ipesangap dukak ngo bapana, ipesangap kandu ngo indukna. Aku ngo bapa ndènè; kasa oda ipesangap kènè Aku? Aku ngo induk ndènè; kasa oda merkebiaren kènè baKu? Ilèai kènè ngo Aku, tapi ikusoken kènè dèng ngo, ‘Bakunè pana pengelèai nami bamu?’

⁷Merkitè ipèlèken kènè pangaen siso patut pèlèenken i babo langgatenKu. Nai mengkuso dèng mo kènè, ‘Bakunè pana cara nami pelèaken Ko?’ Merkitè mengelamuni langgatenKu.

⁸Mula ipèlèken kènè bangKu pinakan pètung, burnungen barang pè èangen, oda ngo salah ulah-ulah sibagidi? Cuba mo berèken pinakan sibagidi bai gubèrnur! Sampang ngo ndia atèna janah mendè ngo ibaing taba kènè?”

⁹Bagèndari pè alè imam-imam, cubaken mo mengido taba JAHOWA asa masèh atèna midah kita. Tentu oda ialoi sodipmu, janah salah ndènè sendiri ngo i.

¹⁰Idokken JAHOWA Pergegoh Sisotercodi i ngo, “Lotien mo itutup pèntu BagesKu, ai sia-sia ngo ilakati kènè api i babo langgatenKu. Oda lemmo atèngku midah kènè, janah oda kujalo pèlèen ndènè.

¹¹Ipesangap bangsa-bangsa suberri dunia ngo aku. Barang i dikè sambing pè itutung ngo dahupa lako pesangapken gerarKu dekket ipèlèken ngo pèlèen patutna, kumerna karina bangsa ngo pesangapken Aku.

¹²Tapi ukum kènè mengelèai Aku ngo, kumarna oda maharga katè ndènè langgatenKu, ai ipèlèken kènè ngo i sidi panganen siso kadi kènè.

¹³Rana ndènè, ‘Enggo bosan kita mengulaken i karina’, janah menahang ukur ndènè baku. Itaruhken kènè ngo pinakan tinangko, pinakan èangen barang burnungen lako pèlèenken baKu. Idok kènè uè Aku menjalo pèlèen ndènè i?

¹⁴Merjaya ngo penipu simemèlèken baKu pinakan siso maharga, mula lot ngo merandal pinakanna sienggo ijanjiken lako baKu! Ai Aku ngo Raja Meheji janah ipesangap karina bangsa.”