Read Batak Dairi Maleaki 3 Bible Online

Maleaki 3 - Batak Dairi bible

Maleaki 3

¹Pengaloi JAHOWA Pergegoh Sisotercodi, “Kupasulak mo utusenKu peliasken dalan bangKu. Nai sintempu mo Aku, JAHOWA sinitulusen ndènè roh mi BagesKu. Utusen- Ku siniketedohken ndènè i roh janah me- ningtingken padanKu.”

²Tapi isè mo tahan i ari pekiroh JAHOWA dekket petararken diriNa? Kerna bagè api peneppa peningtingi tembaga ngo ia, dekket bagè sabun penaptapi.

³Lako menghukum ngo ia asa roh, bagè kalak pebersihken dekket meningtingi pirak. Bagè peneppa meningtingi emmas dekket pirak, bagidi ngo utusen JAHOWA meningtingi imam-imam asa ipèlèken kalak i pèlèen dekket cara sinikelemoken atè JAHOWA.

⁴Asa bagè tikan sinderbi lemmo atè JAHOWA midah pèlèen sinipèlèken bangsa Juda bak Jerusalem bana.

⁵Idokken JAHOWA Pergegoh Sisotercodi, “Roh mo aku mendahi kènè lako merhukum. Kusudu mo roh gabè saksi taba kalak perhèlmu kasar, jelma perlangkah julu meddem, simenuhu-nuhui luap, simemaing curang tikan merèken upah bai kalak sigajien, simengkilang daberru mbalu, anak melumang, dekket kalak sidèban, bang taba karina kalak siso pesangapken Aku.”

⁶“Aku ngo JAHOWA, janah oda mobah Aku. Kumara i, alè kènè pinempar si Jakob, oda iripasken.

⁷Tosè bagè empung ndènè arnia, enggo karinana kènè menurimpang ipas pati-patinKu nai janah oda setia mengulakensa. Mulak mo kènè mendahi Aku, asa mulak ma Aku mendahi kènè. Tapi mengkuso ngo kènè, ‘Bakunè ngo sikennah ulaenken nami lako balik mendahi kono?’

⁸Bagèndari Kukuso mo kènè: Tertipu jelma ngo JAHOWA? Tentu oda. Tapi itipu kènè ngo Aku. Ikuso kènè, ‘Bakunè ngo?’ PengaloingKu: Sinderrang menggarar persipuluhen dekket merèken pèlèen.

⁹Karina bangsa menipu Aku, nai kenna sempetta mo kè karina.

¹⁰Taruhken mo persipuluhen ndènè karina mi BagesKu asa mbuè pangaen i sidi. Oji mo Aku, asa idah kènè Kubuka pèntu sorga, janah Kuberèken mo bai ndènè mertinèncuk karina simendè.

¹¹Oda kupadiat pengago mencèdai suan-suanen ndènè; pekken anggur ndènè pè rombang-rambing mo buahna.

¹²Nai oda kurangen kènè idokken karina bangsa, kumarna nagerri ndènè merandal bekkas ianen.”

¹³Idokken JAHOWA, “Sondel mo ranamu mengelèai Aku. Tapi mengkuso dèng ngo kènè, ‘Bakunè pana rana nami tersèngèt kono?’

¹⁴Idokken kènè, ‘Sia-sia sambing ngo menguèi JAHOWA. Kadè mo gunana siulaken ulaenta sinidokken JAHOWA Pergegoh Sisotercodi, barang menuduhken tabasa siselselli kesalahenta?

¹⁵Siidah ngo mersennang-sennang ngo kalak sijukkat. Oda pellin mertambah nduma kalak jelma jahat, tapi mula ioji kalak i kesobaren JAHOWA merkitè maing jahat, maluah ngo tong kalak i.’ ”

¹⁶Nai mengeranai mo samah-samah jelma simerkebiaren taba JAHOWA. Idengkohken janah iperatè-atèken JAHOWA ngo sinidokken kalak i. Jelma sipesangapkensa dekket simerkebiaren baNa, isuratken ngo gerarNa ibas bukku lapihen silot i hadeppenNa.

¹⁷Idokken JAHOWA Pergegoh Sisotercodi i, “Gabè bangsangKu ngo kalak i. Tupung ari pemalessenKu, kalak i ngo gabè milik kekelengenKu. Masèh ngo atèngku midah kalak i, tosè bagè sada kalak partua simengkekelengi dukak simenguèi bana.

¹⁸Idah bangsangKu i mo laènna jalonken kalak burju dekket kalak jahat, kalak simerpenguèi taba Aku dekket siso menguèi Aku.”