Read Batak Dairi Mateus 2 Bible Online

Mateus 2 - Batak Dairi bible

Mateus 2

¹Ukum kuta bekkas Jesus tubuh imo kuta Betlehem i nageri Juda, tikan si Herodes Raja i sidi. Sinderrang nai roh mo mi Jerusalem kalak sipandè bintang i kebincaren nai, kuso-kuso,

²“Idikè ngo anak sirimbaru tubuh idi, sinaing gabè raja kalak Jahudi? Enggo kuidah kami bintangNa i kebincaren janah roh ngo kami naing mersembah tabasa”.

³Idengkoh si Herodes kessa kata i, ter- sengget kalohon mo ia bagi ma karina jelma silot i Jerusalem.

⁴Idokken mo pulung karina imam ekuten dekket guru-guru Agama Jahudi, ikusoken mo taba kalak idi, “Idikè ngo bekkas tubuh Raja Sipaluah i, siniperbagah-bagah Dèbata?”

⁵Ialoi kalak idi mo, “I Betlehem si ni nageri Juda ngo, ai bagèen ngo isuratken nabi,

⁶‘Ukum kono alè Betlehem si ni Juda kètèksu ngo ko nemmuken mertimbangken karina kuta silot i Juda. Kerna bamu nai ngo naing roh sada kalak raja, sinaing menggem-gemi Israel bangsangKu.’ ”

⁷Enggo kessa ibettoh si Herodes, idilo mo sipandè bintang i kebincaren i nai merkitè kosik. Ikuso mo kalak i, ndigan ngo tuhu mulai idah kalak i bintang i.

⁸Nai ipasulak mo kalak i laus mi Betlehem merkitè tennah bagèen, “Laus mo kènè, pemanat kènè mo Anak idi. Mula enggo jumpa kènè Ia, bagahken kènè mo bangku asa laus ma dekket aku mersembah baNa.”

⁹Nai laus mo kalak idi. I tengah ndalan, iidah kalak i nola mo bintang i, imo bintang siniidah kalak i tikanna i kebincaren. Merdalan ngo bintang idi i lebbè kalak i, nai kom mo i babo bekkas Anak idi.

¹⁰Soh mo lolona kalak idi mengidah bintang i.

¹¹Mbengket mo kalak idi mi bages i, janah idah kalak i mo Anak i dekket inangNa si Maria. Nai isembah kalak idi mo Anak i, enggo kessa i ibuka kalak i mo perbekasen hartana janah ipèlèken mo taba anak idi emmas, kemènjen, dekket minak mur mahan persembahenna.

¹²Tikan lako balik kalak i mi kutana, oda nèngè arap dalanna idi kin kalak i, karna enggo ipesèngèt Dèbata kalak idi ipas nipina, asa ulang nèngè pella balik mendahi si Herodes.

¹³Enggo kessa laus sipandè bintang i, iidah si Josep mo sada malaèkat ibas nipina, nina malaèkat i mo, “Kèkè mo kono, embah mo Anak idi dekket inangNa mbungkas mi Mesir. I sidi mo kènè merian pèma roh nola ranangku bamu, ai iletlet si Herodes ngo Anak idi naing ibunuh”.

¹⁴Nai kèkè mo si Josep, iembah mo Anak i dekket inangNa mbungkas mi Mesir bernginna idi.

¹⁵Merian i Mesir mo kalak i soh mi matè si Herodes. Saut mo sinidokken Tuhan i merkitè nabiNa, “I Mesir nai ngo Kudilo AnakKi”.

¹⁶Ibettoh si Herodes kessa enggo iakkali sipandè bintang idi ia, mellaga kalohon mo ia. Iperèntahken mo, kennah bunuhen nasa anak daholi simerumur dua tahun mi terruh,, i kuta Betlehem dekket i sikulilingna, ai bagi ngo cocok perndekkahna ibettoh bai sipandè bintang i nai.

¹⁷Merkitè bagidi, saut mo sinidokken Nabi Jeremia, bagèen,

¹⁸“Terdengkoh ngo sora derru-derru i kuta Rama, itangisi si Rahel ngo dukak-dukakna, oda terrapoon nèngè kalak i, ai enggo matè karina dukakna”.

¹⁹Enggo kessa matè si Herodes, iidah si Josep mo i Mesir sada kalak Malaèkat ibas nipina.

²⁰Idokken Malaèkat i mo tabasa, “Kèkè mo kono, embah mo Anak idi dekket inangna balik mi Israel, ai enggo matè kalak sinaing memunuh Anak i”.

²¹Nai kèkè mo si Josep, iembah mo Anak i dekket si Maria balik mi Israel.

²²Tapi ibettoh si Josep kessa, si Arkelaus anak si Herodes ngo mbangkit raja gancih bapana si Herodes mengerajai Juda, gabè mbiar mo si Josep balik mi sidi. Enggo kin ma ngo ipesèngèt Tuhan i ia ibas nipina terèngèt idi, gabè mi Galilea mo ia laus.

²³Merian i kuta Nazaret mo ia. Merkitè bagidi, saut mo sinidokken nabi-nabi bagèen, “Idokken dèba mo ia kalak Nazaret”.