Read Batak Dairi Lukas 14 Bible Online

Lukas 14 - Batak Dairi bible

Lukas 14

¹Tikan sikali ari Sabat, laus mo Jesus mangan mi bages sada kalak Parisè. Karina nisidi dak memperatèken Jesus.

²Nai, roh mo sada kalak sipuru-mbèangen cènder i lebbèna.

³Nai ikuso Jesus mo guru-guru agama dekket Parisè silot isidi, nina, “Ndorok ngo pejuahken kalak simersakit tupung ari Sabat mengèkutken hatoren agamanta barang tah oda ndorok?”

⁴Sip ngo guru-guru agama bak kalak Parisè i. Nai idilo Jesus mo kalak i, ipemalum mo janah ipemolih.

⁵Enggo kessa i, idokken Jesus mo taba kalak idi, “Mula ndabuh dukak ndènè barang lembu ndènè mi geddung tupung ari Sabat, otang mènter iteggu kènè ngo dukak ndènè i barang pè lembu i mi darat, tukasi pè ari Sabat?”

⁶Tapi sada kalak poda ndorok mengaloi Jesus terrèngèt misi.

⁷Kumarna idatèken Jesus lot tamuè-tamuè memmilih bekkas simendèna janah simetunggungna, gabè ibakin mo sada codiin taba kalak idi karina.

⁸“Mula idilo dèba kènè mi sada pèsta, ulang mènter kundul kènè mi bekkas simendèna barang simetunggungna. Tah bakunè lot idilo sukut i kalak lebbih mersangap bamu nai,

⁹gabè roh nola sukut idi mendokken bamu, ‘Sentabi! Berrè lebbè bekkas idi bana.’ Gabè mèla kalohoon iakap kono laus isidi nai janah kundul nola kan podi kalohon.

¹⁰Asa, mula idilo dèba kènè, doliin mo kènè kundul i podi kalohon, nai mula roh sukut idi mendokken taba kono, ‘Mi takal bellagen ènda mo kono kundul’ nina. Nai gabè mersangap mo kono i hadeppen karinana tamuè idi.

¹¹Ai barang isè pedatesken dirina gabè peterruhen ngo i, janah barang isè pecerrepken dirina, gabè pedatessen ngo.”

¹²Enggo kessa bagidi, idokken Jesus mo taba sidasa bages idi, “Mula itenggo kono kalak mangan barang mènum pè, ulang mo tenggo sincelketmu barang supan-supanmu, barang denganmu sakuta sibèak. Kerna ibales nola ngo i merkitè menenggo kono, merkitè bagidi enggo ijalo kono balesna.

¹³Tapi mula ibaing kono pèsta dilo mo kalak sincoor, simertikas, kalak sikèpang, bagi ma sipètung.

¹⁴Nai gabè terolih pasu-pasu mo kono, kerna oda terbales kalak i simendè nibakinmi. Tapi karina simerandal nibakimu idi balessen Dèbata mo i ibas ari perkèkèen simbelgah i.”

¹⁵Mendengkoh rana Jesus idi, lot mo sada kalak mendokken ranana tikan rebbak mangan idi, nina, “Sayurntua mo kalak sinidilo mi pèsta i Kerajaen Dèbata!”

¹⁶Tapi nina Jesus mo taba kalak i, “Tikan sikali, lot mo sada kalak merpèsta, mbuè ngo kalak idilo mi pèsta idi.

¹⁷Tikan enggo dapet mata pèsta idi, ipasulak mo naposona mendilo undangen memagahken, ‘Roh mo kènè ai enggo hantar karina!’

¹⁸Tapi karina ngo kalak i mercudalihen. Siperlebbè mendokken bagèen, ‘Rimbaru dèng kutokor juma, oda terbakin aku mak kutongkir juma idi. Raja kono, ondiken aku.’

¹⁹Sidèbanna mendokken, ‘Rimbaru dèng kutokor lima rabaan lembu penarik, naing lako mengurus i mo aku. Raja ko, ondiken aku.’

²⁰Sidèbanna nola mendokken, ‘Rimbaru jejap dèng aku, jadi oda terbakin aku roh.’

²¹Molih mo naposo pasulaken i, ibagahken mo taba indukna. Mellaga mo Tuan idi, nina mo taba naposona i, ‘Ndor mo kono laus mi kasèan-kasèan dekket balè ni kuta, arahken mo kalak sincoor, nitempuk sigading, sipètung dekket kalak sipangpangen.’

²²Jadi nina naposo idi mo, ‘Tuan, enggo saut nidokkenmi, tapi lumbang dèng ngo.’

²³Gabè idokken sukut i mo taba naposona, ‘Laus mo kènè mi dalan-dalan kètèk kebasbasen, sapo juma i ruar kuta èn, dokken kènè mo kalak idi asa dom bagesku.

²⁴Èngèt mo! Sada poda ndorok kalak sienggo niundang idi kin kipangan pangaan pèsta sienggo hantar èn!’ ”

²⁵Mbuè ngo kalak rebbak merdalan dekket Jesus. Jadi tumulih mo Jesus, idokken mo taba kalak idi,

²⁶“Barang isè naing mengèkutken Aku, tapi kellengen atèna bai inangna, bapana, sinibagesna, dukak-dukakna, kaka-anggina dekket turangna, bang dirina sendiri pè, oda ndorok ia mengèkutken Aku.

²⁷Kalak siso uè menggong simpersuk lako mengèkutken Aku, oda ndorok ia gabè sisinKu.

²⁸Ai barang isè naing memajek palas-palas, tentu lebbè kundul ia lako mengètong siperluna, asa ibettoh tah cukup ngo riarna lako memahan palas-palas idi barang oda.

²⁹Mula oda ngo cukup riarna, keppè enggo ipajek batu cendina, tentu itertabai dèba mo ia.

³⁰Gabè idokken dèba mo, ‘Èah, enggo imulai kalak èn memajek, keppè oda lot pul!’

³¹Mula sada kalak raja lot sipuluh ribu tenterrana lako mergeraha mengalo raja sidèban lot duapuluh ribu tenterrana, bakunè pè kennah kundul ia lebbè merpikir tah terralosa ma musuhna idi.

³²Mula ibettoh ngo oda terralosa, tentu nderrang ndaoh dèng musuhna idi, ipasulak mo utusenna lako mengido asa merdamè.”

³³Perpodi idokken Jesus mo, “Bagi ma ngo bang kènè pè, isè poda ndorok kènè gabè sisinKu ukum oda tertadingkensa karinana i.”

³⁴“Merguna kalohon ngo sira. Tapi mula gabè ndèngap sira i, bakunè nola mo pemasinken?

³⁵Mikè poda lot nèngè gunana. Mi juma ningin, oda kadè lapatenna, mahan pupuk pè, oda lot datina. Isampakken mo i. Kènè simerpènggel merbineggè, radumi kènè mo i.”