Read Batak Dairi Lukas 16 Bible Online

Lukas 16 - Batak Dairi bible

Lukas 16

¹Nai idokken Jesus mo taba sisinNa, “Lot mo sada kalak sikaya joong, janah lot mo sada kalak kepala perkèpèngen mengurus hartana. Terbertik mo taba sikaya joong idi magahken enggo ihambur-hamburken kepala perkèpèngen idi riarna.

²Jadi idilo mo ia, nina mo mbangsa, ‘Bakunè ngo i, sikudengkoh terrèngèt kono? Bagèndari pacidah mo bangku perrètongen hartangu karinana. Mulai bagèndari, oda ndorok nèngè kono kesakaten hartangku.’

³Nai merpikir-pikir mo kesakaten hartana idi, ‘Kadè mo ndia kubaing bagèndari? Kerna indukku naing petadiken aku. Memangkur ningin, oda lot gegohku, mengido-ngido mèla diri.

⁴Oo, bagèn mo keppè; mula iperadiken aku, kennah mbuè mo denganku singgèut menjalo aku i bagesna!’

⁵Idilo kesakaten riar idi mo kalak simerutang taba indukna sada-sada. Nina mo taba siperlebbè, ‘Sadikè utangmu taba indukku?’

⁶‘Seratus goci minak,’ nina mengaloi. Nai idokken pugabè idi mo mbangsa, ‘Na, surat utangmu èn. Kundul mo kono isidi, ndor mo suratken lima puluh.’

⁷Kessa i, idokken mo taba sipeduaken, ‘Kono sadikè utangMu?’ ‘Seratus pikkul pagè ngo,’ nina. Nai idokken kesakaten riar idi mo mbangsa, ‘Na surat utangmi. Suratken mo ualuh puluh.’

⁸Nai ipoji induk sipesakatken riar idi ngo akkal kepala perkèpèngen siso bujur i; pandèen ngo jelma ni dunia èn mengatur urusenna sendiri ulang pada anak kecihuren i.”

⁹Nai nina Jesus nola mo, “Dengkohken kènè mo! Pakkè kènè mo harta dunia èn lako menulusi supan-supan ndènè, asa mula mak lot nèngè harta dunia ènda, terjalo mo kènè mi bekkas amman-sumendah idi.

¹⁰Barang isè kettoken ibas sicituk, kettoken ma mo ia bang i simbuè pe. Tapi barang ise oda kettoken ibas sicituk oda ma kettoken ibas simbuè pe.

¹¹Mula terrèngèt harta dunia èn, oda nèngè kettoken ukum kènè, nai isè mo tok bai ndènè terrèngèt harta sorga i?

¹²Janah mula oda kettoken kènè terrèngèt harta ni dèba, isè mo uè memerrèken bai ndènè barang kadè lako milik ndènè kin?

¹³Oda teruèen sada naposo dua induk; ceggo ngo atèna midah sisada, tapi ikekelengi ngo sisada nai. Barang, iuèi ngono sisada, tapi oda iparduliken sisada nai. Oda terulaken jelma rebakken menguèi Dèbata dekket harta.”

¹⁴Karinana rana sinidokken Jesus idi ibeggè kalak Parisè ngo. Nai gabè itertabai kalak idi mo Jesus, kerna karina kalak idi mbara ngo matana midah kèpèng.

¹⁵Tapi idokken Jesus mo mendahi kalak idi, “Dokatè ndènè ngo bennar kènè i hadeppen sinterrem, tapi ibettoh Dèbata ngo ukum perukuren ndènè. Simaharga dokatè jelma, oda kasèa i bai Dèbata.

¹⁶Hatoren-hatoren Agama, pati-patiin niberrèken si Musa dekket peddah silot ibas bukku nabi-nabi, menettap ngo i soh mi tikki si Johanes Perridiken. Mulai isidi nai, dak isukutken ngo Sukuten Simerandal terrèngèt Kerajaen Dèbata. Janah dak igegohken dèba ngo asa masuk ia mi sidi.

¹⁷Murahen ngo ncèda langit bak tanoh ulang pada sada surat ibas hatoren-hatoren niberrèken Dèbata idi nai gabè sondat.

¹⁸Merlangkah julu meddem ngo barang isè menirangken sinibagesna, mula kabin nola ia dekket daberru sidèban. Merlangkah julu meddem ma ngo anak laki simengkabini daberru sisirang idi.”

¹⁹“Lot mo sada kalak sibèak dak merpakèen maharga-maharga janah pernggelluhna pè sennang ngo gennep ari.

²⁰Nai lot mo sada kalak sincor mergerar si Lazarus, dom baroh ngo dagingna. Dak kundul-kundul ngo ia i lebbè babah pèntu bages sibèak idi.

²¹Ninganna naing ngo ia kipangan iba-iba pangaan simerrurusen i mèja sibèak idi nai. Roh mo biang dakdak mendilati barohna i.

²²Daoh-daoh ariin, matè mo kalak sincoor idi, nai iembah malaèkat mo ia mi bekkas mersangap i gembar si Abraham i sorga. Matè ma mo bang sibèak idi janah ikubur.

²³Soh mo ndersana iakap i bekkas kematèen idi. Nderrang bagidi, menarè mo ia mi babo, itatap mo si Abraham dekket si Lazarus i gembarna.

²⁴Nai dilo-dilo mo sibèak idi, ‘Ialè empung Abraham! Masèh mo atèmu midah aku, pasulak mo si Lazarus menernepken pucuk jari-jarina mi laè, asa itèktèkken giamken laè mi dilahku; ai soh mo mpiahna kuakap ibagasen api ènda!’

²⁵Tapi ialoi si Abraham mo ia, ‘Èngèt mo alè pa, tikan i nggelluhmu dèng enggo ijalo kono simendè, tapi ukum si Lazarus pellin menjalo singgodo ngo. Bagèndari pè, sennang mo iakap isènda, ukum kono mpersuk mo.

²⁶Janah lot ngo lembeng mbages ibakin mahan kellang-kellangta asa ulang terbakin laus misidi, janah asa ulang terbaing roh isidi nai misèn!’

²⁷‘Mula bagidi alè empung, kuèlèk-èlèk mo Kono, asa pasulak giamken si Lazarus mendahi bapa,’ nina sibèak idi.

²⁸‘Asa ipesèngèt si Lazarus nemmu kaka-anggingku idi, lot dèng lima kalak nai. Katerra pè ulang nemmu dekket kalak idi mi bekkas mpersah ènda.’

²⁹Ialoi si Abraham nola mo, ‘Otang lot ngo bai kalak idi bukku si Musa bak bukku nabi-nabi? Idi mo iuèi kalak i!’

³⁰Tapi nina sibèak idi mo, ‘Oda cukup dèng i alè Empung Abraham. Tapi ukum lot balik nggelluh sienggo matè kin, janah roh mendahi kalak i, tobat mo kalak idi ibas dosa-dosana nai.’

³¹Tapi idokken si Abraham mo mbangsa, ‘Mula oda iparduliken kalak idi si Musa dekket nabi-nabi, oda ma ngo uè percaya kalak idi mula pè lot balik nggelluh kalak sienggo matè.’ ”